رێناس جانۆ: دڤێت لاو پتر ژ هه‌ر ته‌خه‌كا دی كار بۆ سه‌رخستنا لیستا پارتی بكه‌ن
ئامێدیێ، مه‌حمود نهێلی:
د سمیناره‌كی دا ل دێره‌لۆكێ رێناس جانۆ، كادرێ پێشكه‌فتی یێ پارتی و ئه‌ندامێ خولا به‌رێ یا جڤاتا نوونه‌رێن عیراقێ دیار كر كو گه‌نج و لاو ته‌خه‌كا كارتێكه‌ر و هه‌ستیارن د پێشڤه‌برن و خزمه‌تكرنا جڤاكی دا و دبێژیت: پێددڤیه د ڤان هه‌لبژارتنان دا لاو پتری هه‌ر ته‌خه‌كا دی دچالاك بن و پشته‌ڤان بن بۆ سه‌رخستنا پارتی.
د سمینارێ دا كو بۆ گروپێ 75 یێ لاوێن خوه‌به‌خشێن دێره‌لۆكێ هاتبوو رێكخستن، رێناس جانۆ باسێ رولێ گه‌نج و لاوان د هه‌موو بیاڤێن جڤاكی دا كر و گۆت: “پێدڤیه لاو رۆلێ خوه یێ چالاك بگێرن و هه‌موو شیانێن خوه بده‌نه كاری بۆ سه‌رخستنا به‌ربژارێن پارتی دیموكراتی كوردستان”.
ناڤهاتی د سمینارا خوه دا به‌حسێ گرنگیا ڤان هه‌لبژارتنان كر و گۆت: “ئه‌ڤ هه‌لبژارتنه دێ سه‌نگا هه‌رێمێ گوهۆڕن و ب سه‌ركه‌فتنا پارتی سه‌نگا هه‌رێمێ ژی ل به‌غدا دێ ب هێزكه‌ڤیت، چونكو ب تنێ پارتی یه دشێت وه‌ك نوونه‌رێ راسته‌قینه‌یێ هه‌رێما كوردستانێ به‌ره‌ڤانیێ ژ ماف و خواستێن گه‌لێن كورستانێ بكه‌ت”.
رێناس جانۆ، كادرێ پێشكه‌فتی یێ پارتی پشته‌ڤانیا لقێ 18 و پارتی دیموكراتی كوردستان بۆ گه‌نجان دوپات كر و هیڤیا سه‌ركه‌فتنێ بۆ گروپێ 75 یێ لاوێن خوه‌به‌خش خواست كو بشێن خزمه‌تا گه‌ل و وه‌لاتێ خوه بكه‌ن.
