رێورەسمێن جەژنا ڕۆژیێن ئێزی دێ هێنە گێڕان
سێمێل، دلڤین رەشید:
بەرپرسێ راگەهاندنا پەرستگەها لالش بۆ رۆژناما ئەڤرۆ دیار كر، جەژنا رۆژیێن ئێزی ئێك ژ كەڤنترین جەژنێن ئێزدیانە، ئەڤ جەژنە دكەڤیتە مەها كانونا ئێكێ، ئێزدی سێ رۆژان ب رۆژی دبن، ئانكو سێشەمب و چارشەمب و پێنجشەمبیێ ب رۆژی دبن و رۆژا چارێ دبیتە جەژن، ل سەرانسەری دەڤەرێن ئێزدیان رێورەسمێن ڤێ جەژنێ دهێنە گێڕان و هەتا نوكە ژی ئێزدی خوە ئامادە دكەن، وەكو داب و نەریتەك ژی بۆ ڤێ جەژنێ ئەڤ سالە ژی رێورەسمێن وێ دێ هێنە گێڕان.
لوقمان سلێمان، بەرپرسێ راگەهاندنا پەرستگەها لالش گوت: “ئەڤ جەژنە ژی وەكو پڕانیا جەژنێن دی یێن ئێزدیان گرێدانەك ب سروشتی ڤە هەیە، بەری جەژنێ هەر مالەكا ئێزدی ل دووڤ پێچێبوونا خوە قوربانیەكی سەرژێ دكەت، گرنیگیا ڤێ جەژنێ بۆ وێ چەندێ ڤەدگەڕیت، كو ئەڤ رۆژیێ دهێنە گرتن بۆ خۆدێ نە، ئانكو ئێزی ناڤەكە ژ ناڤێن خودێ، د ڤێ جەژنێ دا گەلەك خێر و خێرات دهێنە گێڕان و ئێزدی سەرا گورستانێن مریێن خوە ددەن و ل وێری ژی خێرا خوە ل سەر هەڤ بەلاڤ دكەن”.