رێژه‌یا ته‌لاقێ زێده‌بوویه
هه‌ولێر، قائید میرۆ
گوره‌ی ئامارێن دادگه‌ها هه‌رێما كوردستانێ ئه‌ڤساله 11 هزار حاله‌تێن ته‌لاقێ هاتینه تۆماركرن و شاره‌زایه‌كا جڤاكی ژی ئاماژه بڤێ چه‌ندێ دكه‌ت، زۆربوونا رێژا ته‌لاقێ ئه‌گه‌رێن خۆ هه‌نه و دبێژیت، پێدڤیه ل دادگه‌هێن هه‌رێما كوردستانێ به‌ری گرێبه‌ستا هه‌ڤژینیێ ئێك هه‌یڤ كچ و كوڕ بن چاڤدێریێ بن.
جڤاكناس بنار قه‌ره‌نی، بۆ رۆژناما ئه‌ڤرۆ دیاركر” سالانه رێژه‌یا ته‌لاقێ لهه‌رێما كوردستانێ زێده دبیت ئه‌ڤساله‌ژی گوره‌ی ئامارێن هاتینه به‌لافكرن دده‌مێ 11 هه‌یڤێن بۆری دا 11 هزار حاله‌تێن ته‌لاقێ ل دادگه‌هێن هه‌رێما كوردستانێ هاتینه تۆماركرن، ئه‌گه‌رێ سه‌ره‌كیێ ته‌لاقێ ژی بۆ ڤێ چه‌ندێ ڤه‌دگه‌ڕیت ده‌مێ پڕۆسا هه‌ڤژینیێ دهێته پێك ئینان د بنه‌ڕه‌تدا تێگه‌هشتنه‌ك دناڤبه‌را هه‌ڤژینان نینه، پێدڤیه ل دادگه‌هان به‌ری گرێبه‌ستا هه‌ڤژینیێ بۆ هه‌ر كه‌سه‌كی بهێته‌كرن ئێك هه‌یڤ لبن چاڤدێریێ دا بن و هه‌ڤژین به‌ری بچنه ناڤا ئه‌ڤێ پڕۆسێ بهێنه هشیاركرن، لایه‌نێن ئابوری و جڤاكی و مایتێكرنا خزم و كه‌سان پالنه‌رن خێزان جوداببن بۆ نموونه گه‌نجه‌ك دێ ل عه‌شیره‌ته‌كادی یان ملله‌ته‌كێ دی كچه‌كێ خوازیت، ده‌مێ دچنه ناڤا پڕۆسا هه‌ڤژینیێ دو كه‌لتوورێن جودانه و زۆر كاراندا ئێك ناگرن، بێی هه‌بوونا فلته‌ران ل دادگه‌هێ نابیت پڕۆسا هه‌ڤژینیێ بهێته تۆماركرن.
ئه‌ڤێ جڤاكناسێ ئاماژه‌كر” خه‌لكێ هه‌رێما كوردستانێ زێده‌تر دخوازن ژنێن ده‌رڤه‌ی هه‌رێما كوردستانێ بخوازن، بتایبه‌تی بازاڕێ ئینانا ژنێن عه‌ره‌ب ل ده‌ف زه‌لامێن هه‌رێما كوردستانێ گه‌رم بوویه، به‌هانه‌یا زه‌لامان ئه‌ڤه دبێژن ژنێن عه‌ره‌ب زێده‌تر باشترن بۆ زه‌لامی، به‌رۆڤاژی ئه‌ڤێ چه‌ندێ چو راستی بۆ نینه، مخابن ژنێن عه‌ره‌ب فێربووینه تنێ سه‌رنجا زه‌لامێن هه‌رێما كوردستانێ بۆ لایێ خۆ دبه‌ن و ده‌مێ دچنه ناڤا پڕۆسا هه‌ڤژینیێ و ده‌مه‌ك دبۆریت بهه‌ر به‌هانه‌یه‌كا هه‌بیت ژنێن عه‌ره‌ب خۆ دده‌ن به‌ردان، چونكه د بنه‌ڕه‌تدا مه‌ره‌ما وانا ئه‌ڤه بۆ پاره‌ی یان ده‌ستكه‌فتێن مادی پڕۆسا هه‌ڤژینیێ دگه‌ل زه‌لامێن كورد پێك دئینن، ده‌مێ ژنێن عه‌ره‌ب پاره‌ی دبینن ده‌ست ب خیانه‌تێ دكه‌ن دگه‌ل زه‌لامێن كورد.
بنار قه‌ره‌نی ئاشكراكر” پڕۆسا هه‌ڤژینیێ لسه‌ر چه‌ند بنه‌مایه‌كان دهێته پێك ئینان ژوانژی هۆگر بوون، ئینتیما و ڤیان، زۆربه‌یا كچێن جڤاكێ مه دخوازن ده‌مێ دچنه پڕۆسا هه‌ڤژینیێ مالا جودا هه‌بیت، ژبه‌ر كاودانێن ئابوری گه‌نجێن مه ئه‌ڤرۆ نه‌شێن ئێكسه‌ر مالا خۆ جودا بكه‌ن، مالا جودا بۆ كچێ ژی زیان هه‌ن، مخابن كچێ نمه ئه‌ڤرۆ ب شاشی تێگه‌هشتینه چو ئاریشه ب جودابوونێ ل مالبابێ ناهێنه چاره‌سه‌ركرن، باشتره دگه‌ل مالا بابێ كوڕی بژین، نه‌ك مالا جودا ئاریشه‌یان چاره‌سه‌ر ناكه‌ت به‌رۆڤاژی له‌وانه‌یه هنده‌ك ئاریشه‌یێن دی په‌یدابكه‌ت.
