رێژەیا قەیرەبوونێ بەر ب زێدەبوونێ یە
ئه‌ڤرۆ نيوز:
شارەزایەکێ دەروونی بۆ ئەڤرۆ دیار کر کو رێژەیا قەیرەبوونا گەنجان یا بەر ب زێدە بۆنێ دچیت و سالێن داھاتی دێ بیتە مەترسی بۆ سەر جڤاکێ کوردستانێ و گۆت: نەبوونا مەزاختیێن ژن ئینانێ و نە دامەزراندن ئەگەرێن سەرەکی نە کو گەنج نەشێن بچنە دناڤا پڕۆسا ھەڤژینیێ.
کەریم قەرەچەتانی، شارەزایێ دەروونی بۆ رۆژناما ئەڤرۆ دیار کر کو راستە ل ڤان سالێن دووماھیێ پڕۆسا ھەڤژینیێ دناڤا جڤاکێ مە دا بەر ب کێمبوونێ چوویە و زۆربەیا کۆڕ و کچێن جڤاکێ مە یان ناچنە ناڤا پڕۆسا ھەڤژینیێ یانژی د تەمەنەکێ مەزندا پڕۆسا ھەڤژینیێ پێک دئینن و گۆت: ئانکو نە پێکئینانا پڕۆسا ھەڤژینیێ بویە دیاردە دناڤا جڤاکێ مە دا و ھژمارەکا زۆرا گەنجێن مە د مەزنن و پڕۆسا ھەڤژینیێ پێک نەئینایە.
شارەزایێ دەروونی ئەگەر ژی دانە دیار کرن و گۆت: ئەگەر زۆرن، بەلێ ئەگەرێن سەرەکی ھەنە ژ وان ژی ئەڤ رەوشا ئابوری ئاستەنگە ل ھەمبەر گەنجان، چونکی ئەڤە چار سالن ژبلی دەرچوویێن کۆلیژا گشتی چ دەرچوویێن دی نەھاتینە دامەزراندن، سالانە ھژمارەکا گەنجا ل کۆلیژ و پەیمانگەھان دەردچن، لێ ناھێنە دامەزراندن دەمێ گەنجەک نەھێتە دامەزراندن چاوا بچیتە د ناڤا پڕۆسا ھەڤژینیێ؟ دەمێ نەشێت مەزاختیێن خوە پەیدا بکەت، ئەڤە ئەگەرێ سەرەکیە.
شارەزایێ دەروونی زێدەتر گۆت: ئەگەرێن دیژی زۆرن، بۆ نموونە تەکنەلۆژیا نوو، ھەبوونا ھژمارەکا زۆرا جھێن لەشفرۆشیێ ئەگەرن کو گەنج بچن حەزێن خوە یێن سێکسی لێ تێر بکەن و ژ پڕۆسا ھەڤژینیێ دوور بکەڤن.
شارەزایێ دەروونی ئەو چەندە ژی دیار کر کو ل گورەی ئامارێن نە فەرمی ھژمارا کچێن قەیرە و کۆڕێن قەیرە ژی بەر ب زێدەبۆنەکا مەترسیدار دچیت و ژبەر نەبوونا پێدڤیێن ژیانێ گەنج نەچار دبن بچنە دەرڤەی وەلاتی و گۆت: چونکی خویایە ل دەرڤە یان پڕۆسا ھەڤژینیێ چ مەزاختی نەڤێن یانژی ئەو حەزێن سێکسی ب ساناھی دھێنە پر کرن و پێدڤی ب پڕۆسا ھەڤژینیێ ناکەت.
ھەروەسا کەریم گۆت: ئەگەرەکێ دی کو دناڤا جڤاکێ مە دا زۆر یێ بەربەلاڤە داخوازیێن مالا بووکێ ئەڤرۆ زۆرن، گەنج د بەرھەڤن بچنە دناڤا پڕۆسا ھەڤژینیێ، بەلێ دێ دەمێ گەنجەک کچەکێ دخوازیت و کڕینا زێڕا و ئاڤاکرنا مالا سەربخوە بارگرانیێ بۆ پەیدا دکەت و ئاستەنگە ل ھەمبەر پڕۆسا ھەڤژینیێ.
کەریم قەرەچەتانی گۆت: رەنگە نھا ئەم ھەست بڤێ مەترسیێ نەکەین، لێ د داھاتی و سالێن بھێت دا دێ جڤاکێ مە کەڤیتە د مەترسیەکا گەلەک مەزن دا، چونکی قەیرەبوونا تاکێن جڤاکی ئاریشەیێن مەزن دووڤدا دھێن، ژبەرکو ئەو کچ و کۆڕێن چووینە د ژیەکێ مەزندا و پڕۆسا ھەڤژینیێ نە پێکئینای ھەکە ئەڤرۆ ل گەل دایک و بابێن خوە بژین ئەڤە بێگومان دێ چەند سالێن دی دایک و بابێن وان ژی وەغەر کەن و دێ ئەف گەنجێن قەیرە ھەموو بێکەس مینن، ژبەرکو مرۆڤی پێدڤی ب خزمەتکرنێ ھەیە و دبیت ل پاشەڕۆژێ ئەڤ گەنجە تووشی نەساخی و چەندین ئاریشەیان ببن و کەس نەبیت ئەوان خودان بکەت.
