رێژەیا كەسكاتیێ ل قەزا سێمێلێ دهێتە زێدەكرن
لەزگین جوقی
قایمقامێ قەزا سێمێلێ دیاركر، دەست ب زێدەكرنا رێژا كەسكاتیێ ل قەزا سێمێلێ هاتە كرن و نوكە ب كوژمێ دوو ملیار و 800 ملیۆن دیناران پارك و كەسكاتی دهێنە چێكرن.
خەلیل مەحمود، قایمقامێ قەزا سێمێلێ بۆ ئەڤرۆ راگەهاند، رێژا كەسكاتیێ ل قەزا سێمێلێ دێ هێتە زێدەكرن و نوكە چەند پرۆژە هەنە بۆ زێدەكرنا رێژا كەسكاتیێ ل سێمێلێ هەنە، ژ وانا ژی پاركەك یا دناڤ سەنتەرێ قەزا سێمێلێ دا هێتە چێكرن، هەروەسا ژ زانكۆیا ئەمریكێ هەتا دگەهتە ئوڤەرپاسا دووماهیا قەزا سێمێلێ و ژ ناحیا مسێریك هەتا سێمێلێ و جادا زانكۆیا ئەمریكێ دێ بنە.
قایمقامێ قەزا سێمێلێ دیاركر، كارەبا كارگەهێن نەیاسایێ هاتە بڕین و هەر پالاوگەهەكا ژێنگەهێ پیس بكەت یان هەر جۆرە كارگەهەك بیت دێ هێتە سزادان و چەندین پالاوگەهێن كواشی هاتنە دائێخستن.
تەكەز كر، هەموو كار بۆ پاقژ راگرتنا ژینگەها سێمێلێ دهێنە كرن و دێ دوڤچوون ل سەر موەلیدێن كارەبێ ژی یا بەردەوام بیت، هەر جهەكێ ببیتە ئەگەرێ تێكدان و پیسكرنا ژینگەهێ، دێ هێتە دائێخستن و سزادان و ئەم دێ بەردەوام دووڤچوونا هەموو كارگەه و جهێن پیشەسازی و موەلیدان كەین.
