رێژەیا هاتنا گەشتیارێن بیانی بۆ هەرێمێ بۆ 25%ێ زێدەبوویە
هەولێر، قائید میرۆ:
سەرۆكا دەستەیا گەشتوگوزارێ ئاشكراكر، د چار سالێن بۆری دا رێژەیا گەشتیارێن نێڤدەولەتی ب شێوەیەكێ بەرچاڤ بلندبوویە و دبێژیت: خەلك ل وەلاتێن دەرڤە بۆ نشتەرگەریێن جوانكاریێن نۆشداری سەرەدانا هەرێما كوردستانێ دكەن و كاریگەری ل سەر گەشتوگوزارێ ژی پەیداكریە.
ئەمەل جەلال، سەرۆكا دەستەیا گەشتوگوزارێ بۆ رۆژناما ئەڤرۆ دیاركر، نوكە ل وەلاتێن جودا گەشتیار سەرەدانا هەرێما كوردستانێ دكەن و بەری نوكە رێژەیا گەشتیارێن نێڤدەولەتی نەدگەهشتە ئێك ژ سەدێ، بەلێ نوكە رێژەیا گەشتیارێن نێڤدەولەتی گەهشتیە 25%ێ و گۆت: «د چار سالێن بۆری دا كارێن زۆر هاتینە ئەنجامدان بۆ راكێشانا گەشتیارێن بیانی، گەشتیار ل وەلاتێن جیران و كەنداڤی و هەرێمی سەرەدانا هەرێما كوردستانێ دكەن، ئەم دخوازین مفای ژ بیاڤێ وەرزشێ بكەین بۆ راكێشانا گەشتیاران».
ئەمەل جەلال گۆتژی: «راستیەكا دی هەیە، نوكە كوردستان بوویە دەرازینكا لایەنێ جوانكاریا نۆشداری و ل سەر ئاستێ دەڤەرێ وەلاتی دهێنە هەرێما كوردستانێ بۆ ئەنجامدانا نەشتەرگەریێن جوانكاریێ، ئەڤە ژی بوویە ئەگەرێ زێدەبوونا گەشتیاران، چونكی بهایێ چارەسەری و نەشتەرگەریێن جوانكاریێ ل پارێزگەهێن هەرێمێ گەلەك ژ وەلاتێن دی ئەرزانترە و كاریگەری ل سەر كەرتێ گەشتوگوزارێ ژی كریە».
