رێژەیا وەرگرتنا گەنمێ جۆتیارێن ئاكرێ و بەردەڕەش و شێخان هاتە زێدەكرن
ئاكرێ، رەمەزان زەكەریا:
كۆمبوونەكا سێ قولی د ناڤبەرا دەڤەردارێن ئاكرێ و بەردەڕەش و شێخان و رێڤەبەریێن چاندنێ ل هەرسێ دەڤەرەداریان و رێڤەبەرێ سایلۆیا شێخان ب مەرەما زێدەكرنا رێژەیا وەرگرتنا گەنمێ جۆتیاران هاتە كرن.
د. دلاوەر بۆزۆ، دەڤەردارێ ئاكرێ بۆ ئەڤرۆ گۆت: «پشتی جۆتیارێن دەڤەرێن ئاكرێ و بەردەڕەش و شێخان گازندە ژ هەبوونا رێكارێن وەرگرتنا گەنمی ل سایلۆیا شێخان گەهاندینە مە، كۆمبوونەكا بەفرەه هاتە كرن و ئاریشە هاتە چارەسەركرن و رێژەیا وەرگرتنا گەنمی هاتە زێدەكرن».
ناڤهاتی ئاشكرا ژی كر، ل گەل جهێن پەیوەندیدار رێژەیا وەرگرتنا گەنمی ژ 70 ترۆمبێلان هات زێدەكرن بۆ 140 ترۆمبێلان، مە ئامیرە گرتینە بۆ ڤالاكرنا گەنمی و گۆت: «ل ئاكرێ 43 ترۆمبێل و ل شێخان 43 و ل بەردەڕەش ژی 56 ترۆمبێل دێ هێنە زێدەكرن ل گەلڤێ چەندێ مە داخواز كریە دەواما سایلۆیێ بهێتە زێدەكرن بۆ وێ چەندێ رێژەكا زێدەتر یا گەنمی ژ جۆتیاران بهێتە وەرگرتن».
