رێژەیا گەنجان بۆ پشكداریكرنێ د كارێن رێكخراوەیی دا پترە
دهۆك، بێوار حەمدی
پشكداریا گەنجان د كارێن رێكخراوەی دا گرێدانەك دگەل ئاستێ ڕەوشەنبیریا وی جڤاكی دا هەیە و ئەو ژینگەها تێدا دژیت. چاڵاكڤانەكی ژی گۆت: پشكداریكرنا گەنجان د كارێن رێكخراوەی دا پترە، ژبەركۆ گەنج پتر هزر ل داهێنان و گۆهوڕینان دكەت و ب هاریكاری و پشتەڤانیا ڤەلڤین و گڕوپ و رێكخراوین جڤاكی و مەدەنی تێكوشینەكا بەردەوام دكەت.
لاوین سەوری، چاڵاكڤانە و بەرپرسێ تۆرا هەماهەنگیا رێكخراوان CNO ئوفیسا دهۆكێ یە د دیدارەكێ دا بۆ ڕۆژناما ئەڤرۆ گۆت: ل جیهانێ هەموویێ گەنج ڕولەكێ مەزن د كارێن مرۆڤایەتی و گەشەپێدان و فێربونێ دا دبینن و گۆت: (گەنج ل دەرفەتەكێ دگەڕن بۆ باشتر دابینكرنا وان ڕێكێن ئەو خۆ تێدا دبینیت ل ناڤ جڤاكی دا و پشكداریا گەنجان ژی د كارێن ڕێكخراوەی دا گرێدانەك ل گەل ئاستێ وی جڤاكی دا هەیە و ئەو ژینگەها تێدا دژیت.
د بەردەوامیا ئاخفتنا خۆدا لاوینی گۆت: هەبوونا یاسایەكا رێگەپێدای و خێزانەكا پشتەڤان و بەرامبەر هەبوونا سەقامگیریا سیاسی و ئابوری و پەروەردەی ل ڤێرە زەمینەیەكا خۆشتر پەیدادكەت ل هەر دەڤەرەكێ و گۆت: (ڕێژەیا پشكداریا گەنجان د كارێن ڕێكخراوەی دا پترە، ژبەركۆ گەنج پتر هزر ل داهێنان و گۆهوڕینان دكەت ب هەڤكاری و پشتەڤانیا ڤەلڤین و گڕوپ و رێكخراوێن جڤاكی و مەدەنی).
لاوینی ئەو چەندە ژی دا زانین: ژبلی دەولەت یاسایا دابینكرنا دەرفەتان بۆ گەنجان پەیدابكەت، دڤێت دەرگەهێن سازیێن مەدەنی ژی بۆ گەنجان د ڤەكری بن و وەكۆ ویستگەهەكێ بن خۆ ل بیروكە و خەون و ئارمانجێن وی بكەتە خودان و گۆت: (ب مخابنی ڤە هێشتا ل ڕوژهەلاتا ناڤەڕاست لێك تێگەهشتنەكا دیار پەیدانەبوویە بۆ پشكداریا گەنجا ل سازیێن مەدەنی، هەر چەندە دەرفەت هاتیە دان ب هەبوونا سەدان رێكخراوێن نەحكۆمی، بەلێ هێشتا ئەو پشكداریە پەیدانەبوویە كۆ كارتێكرنێ بكەت یان ل هەمبەر داخوازی و گازندەیێن گەنجان بگەریت و شیانێن خۆ ب مەزێخیت كۆ باوەری ب كارێن ڕێكخراوەی هەبیت، ژ بۆ هندێ ل داهاتی جیلەكێ دروست بكەن پشكداریێ د سەركردە و گوهڕینێن جودا جودا دا بكەت).
