رێڤه‌به‌ریائاڤا ده‌وروبه‌رێن دهۆكێ: ئه‌ڤ ساله مه‌ترسی ل سه‌ر ژێده‌رێن ئاڤێ یا هه‌ی
دهۆك، له‌زگین جوقی:
رێڤه‌به‌رێ ئاڤا ده‌وروبه‌رێن پارێزگه‌ها دهۆكێ دیار كر، وان داخواز ژ هه‌موو فه‌رمانگه‌هێن ئاڤێ كریه ده‌ست ب دانانا به‌رنامه و پلانێن خوه بكه‌ن ژ به‌ر مه‌ترسیا هشكه‌سالیێ و دبێژیت: ئه‌م دخوازین ئه‌ڤ ساله پتر ژ هه‌موو سالان وه‌لاتی ئابووریێ د ئاڤێ دا بكه‌ن.
خه‌لات ئه‌مین، رێڤه‌به‌رێ ئاڤا ده‌وروبه‌رێن پارێزگه‌ها دهۆكێ بۆ رۆژناما ئه‌ڤرۆ گۆت: “ئه‌ڤ ساله گه‌له‌ك مه‌ترسی ل سه‌ر ژێده‌رێن ئاڤێ یا هه‌ی، له‌ورا ژی بۆ به‌رهنگاریا هشكه‌سالیێ مه ده‌ست ب كارێ خوه كریه و به‌رنامه و پلان دێ هێنه دانان، داكو كار ل سه‌ر بهێته كرن، مه داخواز ژ هه‌موو فه‌رمانگه‌هێن ئاڤێ ل ده‌ڤه‌رداری و ناوچه‌داریان كریه ب رێیا راپۆرته‌كێ مه ل سه‌ر ره‌وشا ئاڤێ ئاگه‌هداریا بكه‌ن، بۆ وێ چه‌ندێ ل گۆره‌ی پێدڤیاتیێن هه‌موو ده‌ڤه‌ران به‌رنامه و پلان بهێنه دانان، هه‌كه ئاریشا كێمبوونا ئاڤێ ل ده‌ڤه‌ره‌كێ روو بده‌ت زوو بهێته چاره‌سه‌ركرن”.
گۆتژی: “ئه‌م داخوازێ ژ وه‌لاتیان دكه‌ین، ئه‌ڤ ساله ئابووریێ د ئاڤێ دا بكه‌ن، چونكو هه‌كه ئاڤ كێم بیت، پلا ئێكێ هه‌ر وه‌لاتی دێ زیاندار بن، له‌ورا هه‌ڤكاریا وه‌لاتیان دێ بیته ئه‌گه‌ر قه‌یرانا ئاڤێ كێمتر بیت”.
ناڤهاتی زێده‌تر گۆت: “ژ ئه‌گه‌رێ كێم بارینا بارانێ، نوكه ل ده‌ڤه‌رداریا سێمێلی پتر ژ 200 مه‌تران ئه‌رد دهێته كولان و ئاڤ نینه”.
