رێڤه‌به‌ریا دارستان و پاوانان 80 سكالا ل سه‌ر داربران ل دادگه‌هێ توماركرینه
ئه‌ڤرۆ، هه‌رهین محه‌مه‌د:
رێڤه‌به‌رێ دارستان و پاوانان ل دهۆكێ دیار كر، ژ ئه‌گه‌رێ شه‌رێ دناڤبه‌را په‌كه‌كێ و توركیا د ئه‌ڤ ساله دا نێزیكێ هه‌شتێ سكالا ل دادگه‌هێ ل سه‌ر وان كه‌سان هاتینه توماركرن یێن كو زه‌ره‌ر و زیانی دگه‌هینه دارستانێ ب چ رێیا هه‌بیت و ئه‌و زیانێن ب كاژا زاویته كه‌فتین نێزیكی حه‌فتێ ملیار دیناران بوون.
كاوه سه‌بری، ئه‌ندازیارو رێڤه‌به‌رێ دارستان و پاوانان ل پارێزگه‌ها دهۆكێ بۆ ئه‌ڤرۆ گۆت: د ئه‌ڤ ساله دا پتری هه‌شتێ سكالا ل دادگه‌هێ هاتینه توماركرن ژ ئه‌گه‌رێ سه‌رپێچیانه وه‌كو داربرین و سوتنا ژینگه‌هێ و ئاڤاكرنا خانیان دناڤ دارستانێ راست كرن و سیمكرنا ئه‌ردێ دارستانێ و گه‌له‌ك سه‌رپێچین دی و مه هه‌تا راده‌كی هنده‌ك رێنما ده‌ركرینه و به‌لاڤكرینه ل سه‌ر قایمقامیا و ئه‌و ژی بلاڤكه‌ن ل سه‌ر رێڤه‌به‌رێن ناحیان كو هه‌ماهه‌نگیێ بكه‌ن ل گه‌ل هوبێن مه‌یێن دارستانێ بكه‌ن ب ره‌نگه‌كێ وه‌سا دار بهێته برین ب ره‌نگه‌كی كو زیان ب دارستانێ نه‌كه‌ڤیت.
زێده‌تر گۆت: بۆ نموونه ده‌مێ كه‌زاختنێ بیت مفای ژ وان داران بینن، به‌لێ برینا داری ب مشاری هه‌ر یا به‌رده‌وامه و به‌رده‌وام ئه‌م دووڤچوونێ دكه‌ین و ئه‌م درژدین سكالایێ ل سه‌ر وان كه‌سان توماركه‌ین یێن سه‌ر پێچیان دكه‌ن دراستا ژینگه‌هێ و دارستانێ و ل سه‌رانسه‌ری پارێزگه‌ها دهۆكێ مه سێ نه‌مامگه‌هێن سه‌ره‌كی هه‌نه ل مالتایێ و زاخۆ و ل ئاكرێ و سالا بوری ل هه‌رسێ نه‌مامگه‌هێن مه پتری سه‌د هزار شتلا مه فروتینه و داهاته‌كێ باش ژێ هاتیه و رێژا كه‌سكاتیێ ژی زێده‌كریه.
زێده‌تر گۆت: ب هاریكاریا پارێزگه‌رێ دهۆكێ و وه‌زاره‌تا چاندنێ و ژێده‌رێن ئاڤێ ئه‌م یێن بزاڤێ دكه‌ین ل هنده‌ك جهان ئه‌وێن دار هشك بووین و سوتین دووباره ل وان جهان ب چینه‌ڤه و رازه‌مه‌ندی ژ لایێ حكومه‌تێ ڤه هاتیه كرن و كوژمه‌كێ پاره‌ی بۆ هاتیه ته‌رخانكرن بۆ كرێكرنا چه‌ندین كرێكاران كو ب ڤی كاری رابن ب تایبه‌ت ناحیا زاویته، چونكو كاژا زاویته یا تایبه‌ته ب زاویته ڤه و ل سه‌رانسه‌ری زاویته هاتیه توماركرن وه‌كو كاژا زاویته، به‌لێ سوتنا دارستانا زاویته كارتێكرن ل ژینگه‌ه و دارستانا زاویته كریه و پتری هزار و حه‌فت سه‌د دونه‌مێن ئه‌ردی زیان ڤێ كه‌فتیه و ل دووڤ ئه‌وێ دووڤچوونا مه كری ئه‌و زیانێن ب تنێ ب كاژا زاویته كه‌فتی نێزیكی حه‌فتێ ملیار دیناران بوون.
خویاژی كر، ب مخابنی ڤه ل هه‌موو ده‌ڤه‌ران ئاگر به‌ربوویه دارستانێ ب تایبه‌تی ل ده‌ڤه‌رێن سنوری ژ ئه‌گه‌رێ شه‌رێ دناڤبه‌را په‌كه‌كێ و توركیا زیانێن مه‌زن لدوڤ خوه هێلاینه وه‌كو سوتن و داربرین و ژناڤچوونا ژینگه‌هێ و ب مخابنی ڤه ئه‌و جهێ ئاگر به‌ردبیتێ بۆ مه گه‌له‌ك یا ب زه‌حمه‌ته وه‌كو به‌رێ ب زڤرینه‌ڤه، چونكو سوتنا دارستانێ نه‌بتنێ زیان ب دارێ دكه‌ڤیت، به‌لكۆ ب ئاخێ و ئاڤ و هه‌وای و گیانه‌وه‌ران ژی دكه‌ڤیت و ده‌مێ ئه‌م وی جهی جاره‌كا دی شین دكه‌ینه ڤه وه‌كو به‌رێ نازڤریته ڤه بۆ نمونه دارێن مه‌یێن دارستانێ دوائكسیدی كاربوونێ دكێشته خوه و ئوكسجینێ بۆ مه دهاڤێژیت ده‌مێ دهێته سوتن و ئه‌و كاربوونه جاره‌كا دی دهێته دناڤ ژینگه‌هێ دا و پیس دكه‌ته ڤه و كارتێكرنا خوه ل سه‌ر ساخله‌میا مرۆڤی و گیانه‌وه‌ران و هه‌موویان دكه‌ت.
