رێڤه‌به‌ریا گشتی یا وه‌رزشی ب 47 ملیۆن دینارا قه‌ردارێ یانا باتیفایه
ئه‌ڤرۆ، عه‌لی حاجی:
د داخویانیه‌كا تایبه‌ت دا سه‌رۆكێ یانا باتیفا یا وه‌رزشی بۆ رۆژناما ئه‌ڤرۆ دیاركر كو كۆمبوونا وان ل گه‌ل سه‌رپه‌رشتێ ئیدارا سه‌ربه‌خۆیا زاخۆ ده‌رئه‌نجامێن باش هه‌بوون و هه‌تا نوكه ژی 47 ملیۆن دینارێن یانێ ژلایێ وه‌زاره‌تا ره‌وشه‌بیری و لاوان ڤه نه هاتینه خه‌رج كرن.
زێده‌تر ئه‌یهه‌م جامی گۆت: كۆمبوونا ده‌سته‌یا كارگێریا یانا باتیفا ل گه‌ل گوهدار شێخۆ سه‌رپه‌رشتێ ئیدارا زاخۆ چه‌ند ته‌وه‌ره‌ك ب خوه‌ڤه‌گرت بوون و گه‌له‌كا گرنگ بوو، ژ بڕیارێن كۆمبوونێ په‌لۆكێن یاریگه‌هێ بۆ پشته‌ڤانان بهێنه دروستكرن، جهێ خوه گوهۆڕینا یاریزانان بهێته ئاڤاكرن، دابینكرنا ترۆمبێله‌كا ڤه‌گۆهاستێ بۆ یاریزانێن مه، سه‌رباری ل وه‌رزێ بوری ژی ئیدارا سه‌ربه‌خۆیا زاخۆ پشته‌ڤانی دكر لێ بۆ وه‌رزێ نوو بشێوه‌كێ به‌رفره‌هتر و باشتر هاتیه كرن و ئه‌ڤچه‌نده ژی جهێ ده‌ستخووشیێ یه به‌رێز گۆهدار شێخۆ پشته‌ڤانیێ دكه‌ت، یا گرنتر بڕیار ژی هاتیه دان كۆژمه‌كێ پاره‌یی وه‌كو سلڤ هه‌یڤانه بۆ یانێ بهێته دابینكرن.
ژلایه‌كێ دووڤه سه‌رۆكێ یانێ ئه‌وچه‌نده ژی دیاركر ل گه‌ل دامه‌زراندنا یانا باتیفا دكتور شاكر ئه‌حمه‌د سمۆ رێڤه‌به‌رێ گشتی یێ وه‌رزشی ل كوردستانێ سۆز ب مه دابوو كو دێ 47 ملیۆن دیناران بۆ یانێ دابینكه‌ت، لێ ئه‌ڤه زێده‌تر ساله‌كێ یه ئه‌و سۆز مایه هه‌لاویستی و نه هاتیه بجهئینان و چه‌ند جاران مه داخواز ژ وی كریه هاریكاریا مه بكه‌ت لێ سۆزا وی مایه هه‌لاویستی و گۆت: هه‌روه‌سان مه داخواز ژ قائیممقامێ قه‌زا باتیفا كریه وه‌به‌رهێنان ب دانانا خارنگه‌هه‌ك و هۆتێله‌كێ بۆ یانا باتیفا دروستبكه‌ت پێخه‌مه‌ت ببیته داهاتی بۆ یانێ ئه‌وێ ژلایێ خوه‌ڤه سۆز دایی ئه‌و بابه‌ته بهێته چاره‌سه‌ركرن و مه هزر د وێ چه‌ندێ دا كریه پانزینخانه‌ك بۆ یانێ ژی بهێته دروستكرن.
