رێڤه‌به‌رێن قوتابخانان: ساخله‌می یا مامۆستا و قوتابیان ژ پرۆژێ برێتش كانسل گرنكتره
ئه‌ڤرۆ، سالار محه‌مه‌د دۆسكی:
دو لقێن مامۆستان ل هه‌رێما كوردستانێ د یاداشته‌كێ دا داخاز ژ وه‌زاره‌تا په‌روه‌ردێ كرینه كو ئه‌ڤ ساله هه‌سه‌نگاندنا قوتابخانا نه‌هێته‌كرن ب باهانا وێ چه‌ندێ كو زێده‌تر گرنگی ب كه‌رتێ ساخله‌می یا قوتابیان و مامۆستان و خوه پاراستن ژ په‌رژیكا كورۆنایێ بهێته‌كرن، هژماره‌كا رێڤه‌به‌رێن قوتابخانێن پارێزگه‌ها دهۆك ژی پشته‌ڤانیێ ل ڤێ پشنیارێ دكه‌ن.
مامۆستا هێرش حسێن عه‌زیز، رێڤه‌به‌رێ ئاماده‌یا هێتیتێ یا تێكه‌ل سه‌ر ب په‌روه‌ردا قه‌زا ئامێدیێ ڤه بۆ به‌رپه‌رێ په‌روه‌رده و زانكۆ ل رۆژناما ئه‌ڤرۆ گۆت: پتریا قوتابخانا نوكه گرنگیێ ده‌نه خوه‌پاراستن ژ نه‌خوشیا كورونایێ و قوتابخانا مه به‌ری چه‌ند رۆژان چار مامۆستا تووشی كورۆنایێ ببوون و هه‌ر ده‌وام نه دهاته‌كرن و ژبلی قوتابیان ئه‌ڤجا چه‌وا دێ شێم پرۆژێ برێش كێنسل جێبه‌جێ كه‌م، ژ ینگه‌ها قوتابخانان نه‌یا هاریكاره ئه‌ف كاره بهێته‌كرن و دیسا كاودانێن كورۆنایێ ژی نه دهاریكارن ئه‌ڤ پرۆگرامه بهێته بجهئینان، سالا بوری ژی ده‌وام هاته راوستاندن و قه‌ده‌غا هاتن و چوونێ بوو و پرۆژه نه‌هاته بجهئینان و ل گه‌ل وێ چه‌ندێ مه ئه‌ف ساله ئه‌ڤ پرۆگرامه بهێته رارگرتن و پتر گرنگی ب لایه‌نێ ساخله‌میێ بهێته‌دان چونكه ره‌نگه هه‌كه كاودان بڤی ره‌نگی بین مه‌ترسیا گرتنا ده‌رگه‌هێن قوتابخانان هه‌یه.
رێڤه‌به‌رێ هه‌مان قوتابخانه ئه‌و ژی گۆت: پرۆژه‌كێ سه‌ركه‌فتی بوو و مامۆستا نه‌چار بوو گرنگیێ ب وانێن خوه بده‌ت و هه‌لسه‌نگاندنه‌كا دروست بخوه بكه‌ت چونكه مامۆستا دێ كه‌ڤیته بن چاڤدێری یا رێڤه‌به‌رێ قوتابخانێ باشتر ژ جاران و هه‌مان ده‌م رێڤه‌به‌ر دێ كه‌ڤیته بن چاڤدێری یا سه‌رپه‌رشتیاری و هه‌مان ده‌م لژنا ده‌ركی یا هه‌لسه‌نگاندنێ و ئه‌ڤه هه‌می دبه‌رژوه‌ندا قوتابخانێ قوتابی دانه و هێدی هێدی قوتابخانه گوهورینا دكه‌ت و خوه دگوهورین، دیسا دیفچوون ل سه‌ر پلانا مامۆستا یا هه‌یڤانه و رۆژانه و سالانه دهێته‌كرن و ئه‌ڤه پتر دێ كوالێتی یا وانێ پێشئێخیت.
هه‌مان رێڤه‌به‌ر گۆتژی: ئه‌و قوتابخانا ئه‌ڤ سیسته‌مه ل سه‌ر دهێته جێبه‌جێكرن دڤێت حوكمه‌ت پشته‌ڤانیه‌كا ئابووری ژی بۆ بكه‌ت، نه‌كو ژینگه‌ها قوتابخانێ ئه‌فریقی بیت و سیسته‌مێ بریتانی بیت .
ماموستا محه‌مه‌د ئه‌حمه‌د مشه‌ختی رێڤه‌به‌رێ قوتابخانا ئوناز یا تێكه‌ل ل دێره‌لوكێ سه‌ر ب په‌روه‌ردا ئامێدیێ ڤه بۆ به‌رپه‌رێ په‌روه‌رده و زانكۆ ل رۆژناما ئه‌ڤرۆ گۆت: داخازێ دكه‌ین سیسته‌مێ برتش كێنسل ئه‌ف ساله بهێته راگرتن چونكه زێده‌تر كارگێریێن قوتابخانا مژوولی خوه پاراستنێ نه ژ نه‌خوشیا كورۆنایێ و گیانێ مامۆستا و قوتابیان به‌ری هه‌ر تشته‌كی یه و په‌روه‌رده ژی دووپاتیێ ل سه‌ر ڤێ چه‌ندێ دكه‌ت، پتر ژ 400 قوتابیان من هه‌نه رۆژانه سه‌ردانێن پولان دكه‌م و دیفچوونا ماسك و پاقژیێ دكه‌م و ژبلی كارێ رۆژانه یێ كارگێریێ و نابینم ده‌م ڤی كاودانی دا یێ گونجای بیت كو سیسته‌مێ برێتش كێنسل بهێته بجهینان وه‌سیانه‌كا ئێكجار مه‌زنه.
رێڤه‌به‌رێ هه‌مان قوتابخانه ئه‌و ژی گۆت: گرنگه سازیێن راگه‌هاندنێ زێده‌تر خه‌مێ ژ ئێش و ئازارێن قوتابیان بخوه‌ن و ئه‌ڤه 24 ساله رێڤه‌به‌رێ قوتابخانێ مه و ئێكم جاره ده‌زگه‌هه‌كێ راگه‌هاندنێ بۆچوونا مه وه‌رگریت ل سه‌ر ئێش و ئازارێن په‌روه‌ردێ، گه‌له‌ك كێماسی هه‌نه و هه‌كه ئه‌ف ساله پرۆژه بهێته راگرتن دێ باشتر بیت چونكه زێده‌تر ئه‌م گرنگیێ ده‌ینه كه‌رتێ ساخله‌میێ و گیانێ مامۆستا و قوتابیان ژ هه‌ر تشته‌كی گرنتره، سیسته‌م گه‌له‌كێ سه‌ركه‌فتی یه و قوتابخانه هاتینه پێشڤه‌برن لێ نه د ئه‌ڤی كاودانی دا.
مامۆستا ئاده‌م محه‌مه‌د یه‌حیا رێڤه‌به‌رێ قوتابخانا ئاریاس ل سنورێ په‌روه‌ردا دهۆك یا رۆژئاڤا بۆ به‌رپه‌رێ په‌روه‌رده و زانكۆ ل رۆژناما ئه‌ڤرۆ گۆت: پرۆژێ برێتش كانسل باشی و خرابیێن خوه هه‌نه و باشیێن وی قوتابخانه و كه‌سایه‌تی یا قوتابی گه‌له‌ك هاتیه ئاڤاكرن و پێشڤه‌برن و هێدی هێدی قوتابخانه دهێته‌ئاڤاكرن، لێ لایه‌نێ نه‌باشیا پرۆه‌ژی پێش به‌ستن ل سه‌ر قوتابیێ ده‌وله‌مه‌ند دهێته‌كرن و دیسا ئێك ژ برگێن پرۆژه‌ی كو داهات ژ قوتابیێن ده‌وله‌مه‌ند بهێته وه‌رگرتن بۆ قوتابخانێ و ده‌مێ ئه‌ڤ كاره دهێته‌كرن گومان نینه دێ فه‌زلێ وی قوتابی زێده‌تر ژ قوتابیێن دی و بگشتی دیتنا من بۆ پرۆژه‌ی دبینم بتنێ هنده‌ك مفادارن ژ پرۆژه‌ی و لایه‌نێ په‌روه‌ردێ چ مفا تێدا نینه.
عه‌بدوالواحد محه‌مه‌د سه‌رۆكێ ئێكه‌تیا مامۆستایێن كوردستانێ بۆ به‌رپه‌رێ په‌روه‌رده و زانكۆ ل رۆژناما ئه‌ڤرۆ گۆت: توشبوونا قوتابیان و مامۆستا ب كورۆنایێ ل قوتابخانا هه‌یه به‌لێ گه‌له‌ك نینه كو مه‌ترسی ل سه‌ر گرتنا ده‌رگه‌هێن قوتابخانا هه‌بیت یان ده‌ست كاری ل ده‌وامێن قوتابیان دا بهێته‌كرن و ره‌وشا كوردستانێ گه‌له‌ك باشتره ژ به‌غدا چونكه هێشتا ل به‌غدا ده‌ست ب ده‌وامێ نه هاتیه‌كرن و چوو 1/11/ ده‌رگه‌هێن قوتابخانا بهێنه‌ڤه‌كرن و باشترین چاره‌سه‌ری بۆ مامۆستا و قوتابیان دانا ڤاكسینێ.
سه‌رۆكێ ئێكه‌تیا مامۆستایێن كوردستانێ ئه‌و ژی ئاشكراكر كو هه‌ر دو لقێن ئێكه‌تیام امۆستایێن كوردستانێ سلێمانی و گه‌رمیان داخازكرینه پرۆگرامێ برێتش كێنسل ئه‌ف ساله بهێته راگرتن ژ به‌ر كو كو ماودێ دو ساله قوتابخانه ب دروستی نه‌هاتینه ڤه‌كرن و زێده‌تر گرنگی ب كه‌رتێ ساخله‌می یا قوتابیان و مامۆستا بهێته‌دان دێ باشتر بیت و كارگێریێن قوتابخانا ده‌م زێده‌تر دڤێت هه‌تا بشێن خوه به‌رهه‌ڤی ڤی پرۆژه‌ی بكه‌ن و لدووڤ خواستا هه‌ر دو لقێن مامۆستا وه‌ك سكرتاریه‌تا مامۆستا دڤێت ڤه‌كولین ل سه‌ر ڤێ هزرێ بهێته‌كرن و كا هه‌تا چ ئاست دبه‌رژوه‌ندا قوتابیان و مامۆستان دایه پرۆژه بۆ ئه‌ڤ ساله بهێته راگرتن و هه‌ر نوكه نه‌شێن هه‌لویستێ خوه دیار بكه‌ین.
عه‌بدوالواحد محه‌مه‌د ئه‌و ژی ئاشكراكر كو ل وه‌رزێ هاڤینێ چه‌ندین داخازی ب نڤیسار ئاراسته‌ی وه‌زاره‌تا په‌روه‌ردێ كرینه وه‌ك كێشا وانه‌بێژان و دیسا دادپه‌روه‌ری د به‌لاڤه‌كرنا میلاكی دا ل قوتابخانان بهێته‌كرن و دیسا پرۆگرامێن خواندنێ بهێنه گوهورین و هه‌تا لدووڤ قانوونا وه‌زاره‌تا په‌روه‌ردێ مامۆستا بۆچوون هه‌بیت و بگشتی پرۆسێسا په‌روه‌ردێ ب باشی برێڤه‌بچیت و مخابنی ڤه گرنگی ب ئه‌وان پێشنیار و داخازیان نه‌هاته‌دان و له‌وما ژی هه‌تا نوكه ئه‌ڤ كێشه بۆ په‌روه‌ردێ دروست بوورینه.
سه‌رۆكێ ئێكه‌تیا مامۆستان ئه‌و ژی گۆت: ب رێكا رۆژناما هه‌وه داخازێ ژ وه‌زاره‌تا په‌روه‌ردێ دكه‌ین كێشا وانه‌بێژان چاره‌سه‌ربكه‌ت بۆ وێ چه‌ندێ ئه‌ف ساله پرۆسێسا خواندنێ نه هێته راوستاندن و باشتر برێڤه‌بچیت و كێشه دروست نه‌بن و پلێن مامۆستا و فه‌رمانبه‌ران بهێنه بلندكرن چونكه ئه‌ڤه ژی كێشه‌یه ل ده‌ف مامۆستان ئه‌ڤه چه‌ندین ساله.
