رێڤه‌به‌رێ ئاماده‌یه‌كێ:خواندنا بابه‌تێن پار، بتنێ بوراندنا ده‌می بوو و بێ مفا بوو
ئه‌ڤرۆ، سالار محه‌مه‌د دۆسكی:
ل دووڤ بریارا وه‌زاره‌تا په‌روه‌ردێ یا حوكمه‌تا هه‌رێما كوردستانێ، ماوێ سێ حه‌فتیان دڤێت هه‌موو قوناغێن خواندنێ پێداچوونێ ل بابه‌تێن سالا بووری بكه‌ن، رێڤه‌به‌رێن قوتابخانا ژی بۆچوونێن جودا هه‌نه ل سه‌ر ڤێ بریارێ.
مامۆستا اسماعیل ابراهیم حه‌سه‌ن رێڤه‌به‌رێ ئاماده‌یا باتیفا یا ئێڤاران بۆ به‌رپه‌رێ په‌روه‌رده و زانكۆ ل رۆژناما ئه‌ڤرۆ گۆت”خواندنا بابه‌تێن سالا پار گه‌له‌ك گرفت بۆ قوتابخانا دروستكرینه و پێدڤی بوو هه‌ر قوتابیه‌كی دو ده‌ستێن په‌رتووكان هه‌بانه، بتنێ ئه‌ڤه بریاره‌ك بۆ ل سه‌ر كاغه‌زێ و قوتابیان چ مفا ژێ وه‌رنه‌گرت، باشتر بۆ وه‌ك سالێن به‌رێ ده‌سپێكا ده‌وامێ ده‌ست ب پرۆسێسا خواندنێ وسالا نووی هاتباكرن و ره‌نگه گه‌له‌ك قوتابخانه ئه‌ڤ ماوه بۆ بهێنڤه‌دانا خوه ته‌رخانكربیت و هه‌ر چ بابه‌ت نه‌هاتینه گۆتن و بتنێ هنده‌ك به‌هره چوون ژ مامۆستا ب دیتنا من گه‌له‌ك شاشیێن ڤێ بریارێ زێده‌ر بووینه ژ باشیێن وێ.
رێڤه‌به‌رێ هه‌مان قوتابخانه بگرنگی زانی بۆ سالا داهاتی په‌روه‌ردێ پلانه‌ك هه‌بیت ل سه‌ر به‌لاڤه‌كرنا په‌رتوكان ل سه‌ر قوتابخانان، گۆت: هه‌تا نوكه بدروستی په‌رتووك نه‌هاتینه به‌لاڤه‌كرن و په‌رتووكێ، قوناغێن (10 و 11)ێ ئاماده‌یی بتنێ دو په‌رتووك ل عومبارێن په‌روه‌ردێ هه‌بووینه، ئه‌ڤه ده‌مه‌كی دا هه‌ر قوناغا پتر ژ (10) بابه‌تان هه‌نه و ئه‌ڤه ده‌مه‌كی دا خواندن ب په‌رتووكان دهێته خواندن و قوتابی نه‌شێـت بێ په‌رتووك بخوینت و مامۆستا ژی نه‌شێت بابه‌تی شرۆڤه بكه‌ت بێ په‌رتووك و ئه‌ڤه ئاریشه‌كا سه‌ره‌كی یه.
اسماعیل ابراهیم رێڤه‌به‌رێ ئاماده‌یا باتیفا یا ئێڤاران گۆتژی: ئه‌ڤ ده‌مێ بۆ پێداچوونا بابه‌تێن سالا بوری هاتیه ته‌رخانكرن هه‌ر چ مفا تێدا نه‌بوو و قوتابیان چ مفا ژێ وه‌رنه‌گرت و بتنێ ده‌م بوراندن بوویه.
مامۆستا محه‌مه‌د ئه‌حمه‌د مشه‌ختی رێڤه‌به‌رێ قوتابخانا ئوناس یا بنه‌ره‌ت یا تێكه‌ل ل قه‌زا ئامێدیێ یه پتر ژ 25 سالان بوچوونه‌كا جێوازتر ژ رێڤه‌به‌رێ ئاماده‌یا باتیفان یا ئێڤاران هه‌بوو و گۆت: هه‌ر بابه‌ته‌كێ بهێته خواندن گومان نینه مفایێ خوه هه‌یه و قوتابی مفایی ژێ وه‌ردگرن و ه‌ئڤه تایبه‌ت ل بازنێ ئێكێ قوناغا بنه‌ره‌تی چونكه سالێن بوری ژ به‌ر كورونایێ چ نه وه‌رگرت بوو و گرنگ بوو په‌روه‌ردێ ئه‌ڤه ماوێ پێداچوونێ و دووباره خواندنا په‌رتووكێن سالا بووری هێشتا زێده‌كربا..
رێڤه‌به‌رێ هه‌مان قوتابخانه ل دور كێماسیێن هه‌مان بریار ژی گۆت: گه‌له‌ك جاران قوتابیان ئه‌ركێ خوه یێ مامۆستا دایێ جێبه‌جێنه‌دكر چونكه زانی چ نمره ل سه‌ر نینن و گه‌له‌ك جاران دایك و بابێن زارۆكان ژی دگۆتنه مه كه‌نگی دێ ده‌وام ده‌سپێ كه‌ت ئانكو هزر دكه‌ن ئه‌ڤه بتنێ پێداچوونا بابه‌تێن سالا بووری یه و هێشتا ده‌ست ب خواندنا سالا نووی نه‌هاتیه‌كرن..
رێڤه‌به‌رێ قوتابخانا ئوناس یا بنه‌ره‌ت ل سنورێ ئامێدیێ گۆتژی: چه‌ندین جارا مه داخازا دیتنا وه‌زیرێ په‌روه‌ردێ كریه ل ئامێدیێ و كومبوونێ ل گه‌ل رێڤه‌به‌را ئه‌نجام بده‌ت چونكه گه‌له‌ك كێماسی دكارێن مه دا هه‌یه و تایبه‌ت میلاكێ قوتابخانێ یێ كێمه و هه‌تا ئاڤاهی ژی نه ل ئاستێ پێدڤی نه و رێڤه‌به‌ره‌كێ پتر ژ بیست سالان رێڤه‌به‌ر بیت گومان نینه دزانیت ئاریشێن قوتابخانێ و پرۆسێسا په‌روره‌دێ چه‌ند و چنه، پتریا ئاریشێن په‌روه‌ردێ نه‌بوونا سیسته‌مه‌كێ ئێكگرتی یێ ب رێك و پێكه و قوتابی ل قوناغا زانكۆیێ دبیته قوربانیێ قوناغێن بنه‌ره‌ت و ئاماده‌یێ و چ پێزانینێن باش ل ده‌ف نابن، دیسا په‌رینه‌وه و پرسیار هه‌لبژارتن ژی ئاستێ زانستی هه‌تا ئاسته‌كێ گه‌له‌ك نزم دابه‌زاندن و دڤێت په‌روه‌رده پێداچوونه‌كێ ئه‌ڤان بریاران ژی دا بكه‌ت.
مامۆستا صائیب ره‌مه‌زان عومه‌ر رێڤه‌به‌رێ قوتابخانا میرگه ه ل قه‌زا سێمێلێ هه‌مان بۆچوونا رێڤه‌به‌رێ قوتابخانا ئامێدیێ هه‌بوو، بۆ به‌رپه‌رێ په‌روه‌رده و زانكۆ گۆت: گومان نینه مفایێ ڤێ خواندنێ گه‌له‌كه بۆ قوتابیان، چونكه سالا بووری گه‌له‌ك بابه‌ت ژ قوتابیان چووینه و بریارا وه‌زاره‌تا په‌روه‌ردێ یا دجهێ خوه دابوو، ئه‌ڤ بابه‌تێن ئه‌ڤان رۆژان دا دهێنه شرۆڤه‌كرن بۆ قوتابیان دێ بنه زنجیره‌ك بۆ ته‌مامكرنا خواندنا ئه‌ف ساله و ده‌سپێكه‌كا هه‌ره باشه بۆ قوتابی كو خوه به‌رهه‌ڤ بكه‌ت بۆ سالا نوویا خواندنێ.
مامۆستا صائیب ره‌مه‌زان رێڤه‌به‌رێ قوتابخانا مه‌رگه ه ئه‌و ژی گۆت: هه‌بوونا په‌رتووكان ل قوتابخانێ 100% نه‌بوو لێ هه‌تا راده‌كێ باش شیاین ڤی ماوه‌ی دا خوه ل گه‌ل كاودانان ب گونجینین و ب چ رێكا هه‌بیت وانێن سالا بووری بهێنه دووباره‌كرن بۆ وێ مه‌به‌ستێ قوتابی مفاداربیت.
هه‌مان مامۆستایێ قوتابخانا سێمێلێ ئه‌و ژی گۆت: گرنگ وه‌زاره‌تا په‌روه‌ردێ ل وه‌رزێ هاڤینێ په‌رتووكێن نوو ل سه‌ر قوتابخانا به‌لاڤه بكه‌ت و ئاریشا كێمبوونا په‌رتووكان یا گیربوونا وان یا هه‌ر ساله و گرنگه ئه‌ڤ ئاریشه نه‌مینت دا هه‌ر ل ده‌سپێكا سالا خواندنێ ده‌ست ب خواندنێ بهێته‌كرن.