رێڤه‌به‌رێ قوتابخانه‌كێ:پێشنیاردكه‌م هه‌ر ده‌ستیردانه‌كا پێنچ رۆژا یا مامۆستا مووچه ژێ بهێته‌برین
ئه‌ڤرۆ، سالار محه‌مه‌د دۆسكی:
پتریا رێڤه‌به‌رێن قوتابخانا گازاندا وێ چه‌ندێ دكه‌ن كو دانا ده‌ستیردانێن مامۆستان ژلایێ نوژداران ڤه و تایبه‌ت بنگه‌هێ زانین گه‌له‌ك ب ساناهی كه‌فتیه و هه‌ر كه‌سه‌كێ بچیت دشێت ب ساناهی وه‌ربگریت.
مامۆستا سامی ئه‌سعه‌د شندو رێڤه‌به‌رێ قوتابخانا چارستین ل په‌روه‌ردا دهۆك یا رۆژئاڤا بۆ به‌رپه‌رێ په‌روه‌رده و زانكۆ ل رۆژناما ئه‌ڤرۆ گۆت: رێڤه‌به‌رێ گه‌له‌ك مامۆستا ده‌ستیردانێن بنگه‌هێ زانینن بخوه بده‌لیڤه دبینن و هه‌ر چه‌ند رۆژ دڤێت بخوه وه‌رگرتن و هه‌مان ده‌م هنده‌ك مامۆستا هه‌نه پێدڤی ب وه‌رگرتنا ده‌ستیردانێ نه و ل سه‌ر بابه‌تی ژی مه په‌یوه‌ندی ب د. نوره‌دین به‌رپرسێ بنگه‌هێ زانین كریه كو مامۆستا هه‌نه چه‌ند جاران ده‌ستیردانێ وه‌رگرن، د.نوره‌دینی دیاركر كو ژ به‌ر زوری یا مامۆستا نه‌شێن زێده‌تر هزر ل سه‌ر بكه‌ن و گڤاشتنێن زور ل سه‌ر بنگه‌هێ زانین هه‌یه و دیسا ئه‌و تێبینی ل به‌رچاف وه‌رگرتن.
هه‌مان رێڤه‌به‌ر گۆت: پێشنیار دكه‌م هه‌ر مامۆستایه‌كێ زێده‌تری پێنچ رۆژان ده‌ستیردانێ وه‌ربگریت كو ژمه‌كێ پاره‌ی ژ مووچێ وان بهێته‌برین و ئه‌ڤه باشترین چاره‌سه‌ری یه بۆ ڤێ چه‌ندێ.
مامۆستا عومران ره‌شید رێڤه‌به‌رێ ئاماده‌یا شه‌رمه‌ن ل قه‌زا ئاكرێ ل دور بابه‌تی بۆ به‌رپه‌رێ په‌روه‌رده و زانكۆ ل رۆژناما ئه‌ڤرۆ گۆت: زێده‌تر مه كێشه ل گه‌ل قوتابیان هه‌یه ل سه‌ر وه‌رگرتنا ده‌ستیردانا نه مامۆستا و تایبه‌ت ده‌مێ قوتابیان تاقیكرن هه‌بیت و گه‌له‌ك ب وه‌سته وه‌رگرن و راپورتا نوشداری وه‌ردگرن.
هه‌مان رێڤه‌به‌ر گۆت: باشتره نوژدارێ تایبه‌تمه‌ند ده‌ستیردانێ بده‌ته قوتابیان وی ده‌می ده‌ستیردان بۆ بهێته هه‌ژمارتن و نه هه‌ر نوژداره‌كێ ڤیا ده‌ستیردانێ بده‌ته مامۆستا و قوتابیان.
مامۆستا كاژین عه‌بدوللا نعمه‌ت رێڤه‌به‌را قوتابخانا ره‌وشه‌ن یا بنه‌ره‌ت ل په‌روه‌ردا دهۆك یا رۆژئاڤا بۆ به‌رپه‌رێ په‌روه‌رده و زانكۆ گۆت:گرنگه دانا ده‌ستیردانێ د ده‌ستێ لژنه‌كا تایبه‌ت مه‌ندا بیت نه بتنێ نوژداره‌كی ماف هه‌بیت پێنج رۆژان ده‌ستیردانێ بده‌ته مامۆستای یان قوتابی و مه رێزه‌كا مه‌زن بۆ مامۆستا هه‌یه به‌حسێ هه‌ما ناكه‌م به‌لێ گه‌له‌ك مامۆستا ب هاریكاریا كه‌س و كارێن خوه یان كه‌سانێن ناسیار ده‌ستیردانێ بخوه وه‌ردگرن و بڤێ چه‌ندێ ژی دێ كارتێكرنه‌كا مه‌زن ل سه‌ر قوتابخانێ هه‌بیت وێ حه‌فتیێ ئه‌و 20 به‌شه وانه دێ ڤالا مینن و كه‌سه‌ك نینه ئه‌وان وانا بێژیت و دیسا پشتی هه‌یڤا 10 ده‌ست ب گۆتنا پرۆگرامێ نوو هاتیه‌كرن و هه‌كه تاقیكرن نێزیك بوون دێ مامۆستا بێژیت من ده‌م نینه و دێ كارتێكرن ل سه‌ر قوتابی هه‌بیت.
هه‌مان رێڤه‌به‌ر گۆت: هه‌كه لژنه‌كا بسپور و چه‌ند نوژدار تێدا هه‌بن ده‌ستیردانێ بده‌نه مامۆستای یان قوتابی و ئه‌و ده‌ستیردان چوو په‌روه‌ردێ و هات وی ده‌می ئه‌و مامۆستا نه‌شێت ده‌ستیردانێ وه‌ربگریت و نه‌شێـ سێ نوژداران رازی بكه‌ت هه‌كه ئه‌و مامۆستا یا ساخله‌م بیت و زێده‌تر مامۆستایێن ژن ده‌ستیردانا وه‌ردگرن چونكو كارێن مال هه‌نه و ئافره‌ت ب خێزانێ ڤه گرێدایه و تایبه‌ت ڤی وه‌رزی و گرێدایی كاری یه و گه‌له‌ك مامۆستا هه‌نه ده‌ستیردانێ وه‌ردگرن و بێ كار و هه‌كه رێڤه‌به‌رێ شاره‌زابیت دێ هه‌ر زووی زانیت كا راسته یان نه، گه‌له‌ك مامۆستا ده‌ستیردانێ وه‌ردگرن بۆ سویشتا مه‌حفیرا و مالێ ببهانا وێ چه‌ندێ كو یێ نه‌خوشه و ئه‌ڤ كێشه مه گه‌هاندیه هه‌ڤالێ ره‌خنه‌گر كو دانا ده‌ستیردانا مامۆستا بیته لژنه چونكه دو مامۆستایێن من كورونا هاتیێ و دو مامۆستایێن دی ژی دێ پشكنینێ كه‌ن بڤی ره‌نگی مامۆستا هه‌بن ده‌ستیردانێ ژی وه‌ربگرن دێ كێشه و گرفت بۆ قوتابخانێ و كارگێریێ و گشت قوتابیان دروست بن.
مامۆستا عیماد صالح حه‌سه‌ن رێڤه‌به‌رێ قوتابخانا زانیاری ل په‌روه‌ردا دهۆك یا رۆژهه‌لات بۆچوونه‌كا جوداتر هه‌بوو بۆ به‌رپه‌رێ په‌روه‌رده و زانكۆ رۆژناما ئه‌ڤرۆ گۆت: پتریا ئه‌ڤێ كێشێ رێڤه‌به‌رێن قوتابخانا ژی ئه‌گه‌رن نه‌بتنێ بنگه‌هێن ساخله‌میێ چونكه دڤێت رێڤه‌به‌رێن قوتابخانا زێده‌تر ده‌ست هه‌لاتا بده‌نه خوه و ئه‌و مامۆستایێن خوه دنیاسن كا پێدڤی ب ده‌ستیردانێ یه یان نه، دبینم كارگێری نوزانن بدورستی سه‌رده‌ریێ ل گه‌ل مامۆستا بكه‌ن و ئه‌ڤه دبیته بارگرانی بۆ قوتابخانا و په‌روه‌ردێ ژی .
مامۆستا عیمادی ئه‌و ژی گۆت: هه‌كه مامۆستایه‌ك پێدڤی ب دو رۆژا و ده‌ستیردانێ بوو نابینم كێشه یه هه‌كه كارگێری دو رۆژان ده‌ستیردانێ بده‌تێ و هه‌كه بڤی ره‌نگی ده‌ستیردان دایێ ئێدی مامۆستا بخوه ژی ده‌ستیردانا نا وه‌رگریت ،پشنیاردكه‌م رێڤه‌به‌ر هاریكاربن چ كێشه دروست نابم و هه‌تا نوكه مامۆستایێن من مووله‌تێن درێژ ژ من نه‌خواستینه.
ژڤان محه‌مه‌د حسێن رێڤه‌به‌رێ قوتابخانا ناڤشكی یا بنه‌ره‌ت بۆ به‌رپه‌رێ په‌روه‌رده و زانكۆ رۆژناما ئه‌ڤر گۆت: هه‌ر مامۆستایه‌كێ ناسیاره‌ك یان نوژداره‌كی بنیاسیت دێ چیت چه‌ندین رۆژان ده‌ستیردانێ وه‌رگریت، هه‌ر مامۆستایه‌كێ جاره‌كێ مووله‌ت وه‌رگرت بۆ جارا دووێ مووله‌تێ ناده‌ینێ، پشنیاردكه‌م بنگه‌هێ ساخله‌میێ یا مامۆستا زێده‌تر دیفچوونێ بكه‌ت و هه‌كه مامۆستا پێدڤی نه‌بوو ده‌ستیردانێ نه‌ده‌نێ و بهێته ره‌وانه‌كرن بۆ لژنه‌كا ساخله‌می.
