رێڤه‌به‌رێ نه‌خۆشخانا لالاڤ: گه‌له‌ك ژ تووشبوویێن كۆرۆنایێ ئه‌ندامیێن ئێك خێزانن
دهۆك، له‌زگین جوقی:
رێڤه‌به‌رێ نه‌خۆشخانا لالاڤ یا كۆرۆنایێ ل دهۆكێ دیاركركو پتریا تووشبوویێن كورۆنایێ یێن دناڤ نه‌خۆشخانێ دا هاتینه نڤاندن به‌ركه‌فتنی نه و ئه‌ندامێن خێزانێن ئێكن، ئه‌ڤه ژی ڤه‌دگه‌ریت دبیت ئێك ژمالێ تووشی كۆرۆنایێ بوویه لێ پشكنین نه‌كریه وخوه كه‌ره‌نتین نه‌كریه و هه‌موو ئه‌ندامێن خێزانا خوه تووشی كۆرۆنایێ كرینه و نۆكه دناڤ نه‌خۆشخانێ دا نڤاندینه.
د. وه‌لید مسته‌فا محمد، رێڤه‌به‌رێ نه‌خۆشخانا لالاڤ یا كۆرۆنایێ ل دهۆكێ دیاركركو نیشانێن كۆرۆنایێ ل ده‌ڤ وان كه‌سان دسڤكن یێن ڤاكسینێ دژی كۆرۆنایێ وه‌رگرتین، ئه‌گه‌ر تووش ژی ببن پێدڤی ب نڤاندنێ دناڤ نه‌خۆشخانێ دا نابن و گۆت: نوكه 90 تووشبوویێن كۆرۆنایێ دناڤ نه‌خۆشخانا لالاڤ دا چاره‌سه‌ریێ وه‌ردگرن كو نه‌خۆشخانه 110 ته‌ختان پێكهاتیه ژوانا ژی 10 ته‌خت یێن چاڤدێریا چرن و پتریا تووشبوویێن كۆرۆنایێ تووشی جۆرێ ده‌لتا بووینه و نیشانێن گه‌له‌ك ژێ د دژوارن و تووشی ره‌وشه‌كا نه‌باش بووینه، گه‌له‌ك ژ تووشبوویان به‌ركه‌فتیێن ئێكدونه، ئه‌وژی كه‌سه‌ك دخێزانه‌كێ دا تووشی كۆرۆنایێ بووینه و بوویه ئه‌گه‌ر هه‌موو ئه‌ندامێن خێزانا خۆ تووشی كۆرۆنایێ كرینه ئه‌ڤه ژی ڤه‌دگه‌ریت بۆ وێ چه‌ندێ وی كه‌سی پشكنینا خوه نه‌كریه یانژی خوه كه‌ره‌نتین نه‌كریه و هه‌ر كه‌سه‌كێ نیشانێن كورۆنایی َهه‌بن پێدڤیه خوه ژ خێزان و كه‌س و كار و هه‌ڤالێن خوه دوور بكه‌ت.
د. وه‌لید مسته‌فا، ئه‌وژی ئاشكه‌را كركو ژنێن دوگیان دناڤ تووشبوویێن كۆرۆنایێ دا هه‌نه و ل نه‌خۆشخانێ هاتینه نڤاندن لێ ره‌وشا وان گه‌له‌ك دژوار نینه، هه‌كه پێدڤی ب نشته‌رگه‌ریێ بن دێ بۆ وان هێته ئه‌نجامدان، هه‌روه‌سا گه‌له‌ك یا گرنگه كه‌سێن دانعه‌مه‌ر ژمال نه ده‌ركه‌ڤن، چونكو ده‌مێ تووشی كۆرۆنایێ دبن مه‌ترسیه‌كا مه‌زن دكه‌ڤیته ل سه‌ر ژیانا وان له‌ورا ئه‌م ئاموژگاریان ل خه‌لكێ خوه دكه‌ین بێ كارێن فه‌ر ژمال نه ده‌ركه‌ڤن.
رێڤه‌به‌رێ نه‌خۆشخانا لالاڤ یا كۆرۆنایێ ل دهۆكێ ئه‌وژی گۆت: هه‌موو جۆرێن خزمه‌تان بۆ تووشبوویان دهێنه پێشكیشكرن نوكه ئوكسجینێ مه‌ركه‌زی و بوتلا ژی ل نه‌خۆشخانا لالاڤ هاتیه دابینكرن لێ یا مه دڤێت ئه‌وه هه‌ر كه‌سێ كۆرۆنا لێ بیت خوه ل مال كه‌ره‌نتین بكه‌ت و خوه ژئه‌ندامێن خێزانا خوه دوور بكه‌ت و نه‌چیته بازاری و مۆلا و سه‌ره‌دانان وگه‌ریانا دگه‌ل هه‌ڤالان گه‌له‌ك تووشبوویێن كۆرۆنایێ گه‌نجن وره‌وشا وان یا باش نینه.
ئاشكه‌را كركو هه‌ر كه‌سه‌كێ كۆرۆنا لێ هه‌بیت ده‌مێ پێدڤی ب نۆشداری دبیت، پێدڤیه ماسكێ بكاربینیت ده‌مێ بچنه ده‌ڤ نۆشداری ژی پێدڤیه خوه ژ خه‌لكی دوور بكه‌ت، هه‌روه‌سا ژی ئه‌گه‌ر نیشانێن ڤایرۆسێ كۆرۆنایێ ل ده‌ڤ كه‌سه‌كی ژخێزانێ دیاردبن باشتره پشكنینا وی بكه‌ن و تێكه‌لیێ نه‌كه‌ت هه‌تا ئه‌نجامێن پشكنینێ ده‌ردكه‌ڤن داكو ڤایرۆس پتر به‌لاڤ نه‌بیت”.
