رێڤه‌به‌رێ گشتی: ره‌نگه هنده‌ك نه‌خوشی په‌یدا ببن كو به‌ری نوكه نه‌بوون
دهۆك، له‌زگین جوقی:
ساخله‌میا پارێزگه‌ها دهۆكێ ب مه‌ره‌ما خوه به‌رهه‌ڤكرنێ بۆ حاله‌تێن ته‌نگاڤیان و قه‌یرانێن ساخله‌میێ دگه‌ل ساخله‌میا جیهانێ كۆمبوو.
شانده‌كێ رێكخراوا ساخله‌میا جیهانی بۆ هه‌لسه‌نگاندنا ره‌وشا ساخله‌میێ و پتر هه‌ماهه‌نگیێ سه‌ره‌دانا ساخله‌میا پارێزگه‌ها دهۆكێ كر و د كۆمبوونه‌كێ دا دگه‌ل د. ئه‌فراسیاب موسا، رێڤه‌به‌رێ گشتی یێ ساخله‌میا پارێزگه‌ها دهۆكێ گه‌نگه‌شه ل سه‌ر خوه به‌رهه‌ڤكرنێ بۆ حاله‌تێن ته‌نگاڤیان و قه‌یرانێن ساخله‌میێ و هه‌ڤركیێن دكه‌ڤنه د رێكێ دا و پێدڤیێن ساخله‌میێ بۆ به‌رهه‌نگاریا وان حاله‌تان هاته كرن.
د. ئه‌فراسیاب موسا، رێڤه‌به‌رێ گشتی یێ ساخله‌میا پارێزگه‌ها دهۆكێ دیار كر كو ژ بۆ هه‌لسه‌نگاندنا ره‌وشا ساخله‌میا پارێزگه‌ها دهۆكێ، نه‌خاسمه ژی بۆ پاشه‌رۆژی هه‌كه هات و حاله‌ته‌كێ نه‌چاڤه‌رێكری په‌یدا ببیت یان ژی هه‌ر ڤایرۆسه‌كێ دی په‌یدا ببیت چ هه‌ماهه‌نگی و به‌رهه‌ڤی هه‌بن بۆ به‌رهه‌نگاریا نه‌خۆشیان، چونكو سه‌قا به‌ره‌ڤ گوهۆڕینێ یه، له‌و دبیت هنده‌ك نه‌خۆشی په‌یدا ببن كو به‌ری نوكه نه‌بووینه و گۆت: “پیدڤیه ئه‌ڤ هه‌موو ره‌وشه دگه‌ل رێكخراوا ساخله‌میا جیهانی بهێته هه‌لسه‌نگاندن بۆ وێ چه‌ندێ هه‌كه هات و نه‌خۆشیه‌ك په‌یدا ببیت زوو به‌رهه‌نگاریا وێ بهێته كرن”.
رێڤه‌به‌رێ گشتی یێ ساخله‌میا پارێزگه‌ها دهۆكێ ل دۆر ڤاكسینا كۆرۆنایێ خویا كر كو هه‌ر كه‌سه‌كێ د سه‌ر ژییێ 60 سالیێ دا بیت و نه‌خۆشیه‌كا دۆمدرێژ هه‌بیت، دشێت قورچا سێیێ یا ڤاكسینا كۆرۆنایێ وه‌ربگریت، ئه‌و ژی هه‌كه هات و شه‌ش هه‌یڤ د سه‌ر دانانا ڤاكسینێ ڕا بۆری بن و گۆت: “هه‌موو كارمه‌ندێن ساخله‌میێ دشێن قورچا سێیێ وه‌ربگرن، دیسا ده‌رگه‌هێن بنگه‌هێن ساخله‌میێ دڤه‌كرینه و وه‌لاتی دشێن رۆژانه قه‌ستا وان بكه‌ن و ڤاكسینێ وه‌ربگرن، ل قوتابخانه‌یان ژی ب هه‌ماهه‌نگی دگه‌ل په‌روه‌ردا پارێزگه‌ها دهۆكێ ده‌ست ب دانانا ڤاكسینا كۆرۆنایێ هاتیه كرن و ئه‌و قوتابیێن د سه‌ر ژییێ 12 سالیێ دا ڤاكسین دێ بۆ هێته دانان”.
