رێڤه‌به‌رێ گشتی یێ ئاڤێ: ئه‌ڤ ساله قه‌یرانا كێمئاڤیێ دێ په‌یدا بیت
هه‌ولێر، قائید میرۆ:
نه‌بارینا بارانێن پێدڤی كاریگه‌ری ل سه‌ر ره‌وشا ئاڤێ یا هه‌ی و پێشبینی دهێته كرن قه‌یرانا ئاڤێ په‌یدا ببیت و رێڤه‌به‌رێ گشتیێ ئاڤێ ژی دبێژیت: بارانێن ئه‌ڤ ساله كاریگه‌ریێن زۆر ل سه‌ر ئاڤا بن ئه‌ردی نه‌بووینه.
ئاری ئه‌حمه‌د، رێڤه‌به‌رێ گشتیێ ئاڤێ ل هه‌رێما كوردستانێ بۆ رۆژناما ئه‌ڤرۆ دیار كر، ئه‌ڤ ساله ل هه‌رێما كوردستانێ ره‌وشا ئاڤێ یا باش نینه و هشكه‌سالی پێڤه یا دیاره، چونكو رێژا ئاڤا بن ئه‌ردی به‌ر ب كێمبوونێ یه و هژماره‌كا زۆرا بیرێن ئاڤێ یان هشك بووینه یان ژی یێ به‌ر ب هشكبوونێ دچن و پێدڤی ب لێدانا بیرێن نوو هه‌یه، له‌وڕا پێدڤیه پلانا به‌رهنگاربوونا هشكه‌سالیێ هه‌بیت.
ئاری ئه‌حمه‌د گۆت: “راسته ئه‌ڤ ساله ژلایێ سه‌قای ڤه سه‌رمایه‌كا مه‌زن هه‌بوو رێژه‌كا باران و به‌فرێ باریه، به‌لێ وه‌كو پێدڤی ئاڤا به‌فر و بارانێ نه‌چوویه بن ئه‌ردی، ئه‌ڤه ژی بوویه ئه‌گه‌رێ كێمبوونا ئاڤا بن ئه‌ردی و دێ هێدی هێدی كاریگه‌ریێن كێمئاڤیێ ده‌ركه‌ڤن”.
