رێڤه‌به‌رێ ئاڤا زاخۆ: مه داخواز یا كری كرێیا ئاڤێ بهێته كێمكرن
زاخۆ، عه‌لی حاجی:
رێڤه‌به‌رێ ئاڤا ئیدارا سه‌ربخوه یا زاخۆ د كۆنگره‌یه‌كێ رۆژنامه‌ڤانی دا دیار كر، وان داخواز ژ وه‌زیرێ باژێرڤانی و گه‌شت و گوزارێ ل حوكمه‌تا هه‌رێما كوردستانێ كریه، كرێیا ئاڤێ ژ 45 هزار و دیناران بۆ 25 هزار دیناران بهێته كێمكرن و د بێژیت: ئه‌م چاڤه‌رێی بڕیارا وه‌زاره‌تێ ل دۆر بابه‌تی دكه‌ین.
ئه‌ندازیار سالح حه‌سه‌ن، رێڤه‌به‌رێ ئاڤا ئیدارا سه‌ربخوه یا زاخۆ گۆت: “به‌ری نوكه ئاڤ ب گوره‌ی رووبه‌رێ خانی و شقه‌یان دهاته وه‌رگرتن، به‌لێ نوكه ل گوره‌ی رێژه‌یا بكارئینانا ئاڤێ پاره ژ وه‌لاتیان دهێته وه‌رگرتن، هه‌ر وه‌لاتیه‌كێ پتر ئاڤێ بكاربینیت، پاره‌یێ كرێیا ئاڤێ ژی پتر دێ بۆ چیت، لێ نابیت هه‌یڤانه ژ ٤٥ هزار دیناران ببۆریت”.
گۆتژی: “ئه‌و وه‌لاتیێن هه‌تا نوكه پیڤه‌رێ ئاڤێ گرێ نه‌دای یان ژی پیڤه‌ر دانای، لێ ل نك كۆمپانیێ نه‌هاتیه تۆماركرن، هه‌یڤانه ٨٠ هزار دینار بۆ دچیت، ده‌ما ئه‌و وه‌لاتی قه‌ستا رێڤه‌به‌ریا مه دكه‌ن ب رێیا لژنه‌یه‌كێ دووڤچوونا كێشه‌یا وان وه‌لاتیان دهێته كرن و ئه‌و گۆژمێ پاره‌ی دهێته كێمكرن و ب تنێ 20 هزار دینار بۆ هه‌یڤه‌كێ ژ وان وه‌لاتیان دهێته وه‌رگرتن”.
رێڤه‌به‌رێ ئاڤا ئیدارا سه‌ربخوه یا زاخۆ خویا كر، ل دووڤ داتایێن وان ل زاخۆ زوورترین رێژه‌یا بكارئینانا ئاڤێ بۆ هه‌یڤه‌كێ هاتبیته تۆماركرن 18 هزار لێتر بووینه و گۆت: “ده‌مێ وه‌زیرێ باژێرڤانی و گه‌شت و گوزارێ سه‌ره‌دانا ئیدارا سه‌ربخوه یا زاخۆ كری، مه داخواز ژێ كر بهایێ كرێیا ئاڤێ بهێته كێمكرن، ئانكو ل جهێ 45 هزار دیناران 25 هزار دینار ژ وان وه‌لاتیان بهێنه وه‌رگرتن و ئه‌م چاڤه‌رێی بڕیارا دووماهیێ یا وه‌زاره‌تێ دكه‌ین”.
