رێڤه‌به‌رێ به‌ره‌ڤانیا باژێری ل دهۆكێ:هه‌ر تاوه‌ره‌كێ بهێته دانان دڤێت مه‌رجێن به‌ره‌ڤانیا باژێری تێدابن
ئه‌ڤرۆ، سالار محه‌مه‌د دۆسكی:
رێڤه‌به‌رێ به‌ره‌ڤانیا باژێری ل دهۆكێ ئاشكرا كر، دڤێـت مه‌رجێن به‌ره‌ڤانیا باژێری ل سه‌ر هه‌موو تاوه‌ران بهێنه سه‌پاندن و ئێدی رێكێ ناده‌ن تاوه‌ر بهێنه دروستكرن هه‌كه مه‌رجێن سلامه‌تیێ تێدا نه‌بن، خواست ژی هه‌می خودانێن گه‌راجان رێگریێ ل حه‌واندنا ترۆمبێلێن سیسته‌مێ غازێ بگرن و گۆت: مه شه‌ش لژنێن پشكنینێ ل سه‌رانسه‌ری پارێزگه‌ها دهۆكێ پێك ئینان بۆ دووڤچوونا كومپانی و ئه‌و كه‌سێن ب دانانا سیسته‌مێ غازێ رادبن هه‌تا نوكه مه 1030 جه دیتینه و 75 جه هاتینه راوه‌ستاندن.
عه‌مید حه‌سه‌ن خورشید تاهر، رێڤه‌به‌رێ به‌ره‌ڤانیا باژێری ل دهۆكێ بۆ رۆژناما ئه‌ڤرۆ گۆت: مه كار ل سه‌ر رێكخستنا میلاكێ رێڤه‌به‌ریێ كریه و ل دووڤ بسپوری و شاره‌زایێ مفا ژ شیان و سه‌ربوران هاتیه وه‌رگرتن، ره‌نگه هه‌بووینه ب بهانا (شوفێر، پوسته و گه‌هاندن، یان به‌ر مالا كه‌سه‌كی) هه‌ر هه‌می زڤرینه كارێ خوه‌یێ دروست و بێ جوداهی، دیسا گه‌له‌ك ئه‌فسه‌ر هاتنه گوهورین و مه‌ره‌م ژ گوهه‌رینێ خوه رێكخستنه و زێده‌تر خزمه‌تكرن و پاراستنا خه‌لكێ مه‌یه.
رێڤه‌به‌رێ به‌ره‌ڤانیا باژێری ل دهۆكێ ئه‌و ژی ئاشكراكر كو رێڤه‌به‌ریا ناڤبری 37 بنگه‌ه هه‌نه ژ ئاكرێ هه‌تا گه‌لیێ زاخو و فه‌یدیێ و سه‌رانسه‌ری پارێزگه‌ها دهۆكێ، د هه‌مان ده‌م دا مه پێدڤی ب ده‌ه بنگه‌هێن دی یه ل ده‌ڤه‌رێن (باعه‌درێ، خانكێ، ئه‌تریش، خانكێ، كانی مازێ، چه‌مانكێ، حه‌وشكێ، مسیریكێ) هه‌می جهـ د دوورن و پێدڤی ب ترۆمبێلان و میلاكی نه و بنگه‌هێن مه هه‌ین ژی هه‌تا حه‌فت بنگه‌هان ل ئاڤاهیێن خه‌لكی دانه و سالانه كرێ ژلایێ حوكمه‌تێ ڤه بۆ دهێته‌دان، لێ پشتی ده‌ست بكاربوونا مه و پشته‌ڤانیا جه‌نابێ وه‌زیرێ نافخوه و پارێزگه‌رێ دهۆك شیاین ل جهێن جودا چه‌ند پارچێن ئه‌ردی وه‌ربگرین و كاری ل سه‌ر دكه‌ین كو بهێنه ئاڤاكرن وه‌ك بنگه‌ه بهێنه نیاسین.
رێڤه‌به‌رێ به‌ره‌ڤانیا باژێری ئه‌و ژی گۆت: ئاگر ڤه‌مراندن ئێكه ژ كارێن مه و گه‌له‌ك هزر دكه‌ن ب تنێ كارێ مه ئاگر ڤه‌مراندنه، به‌لكو د گه‌له‌ك روودانێن دی دا پولیسێ به‌ره‌ڤانیا باژێری خزمه‌تا وه‌لاتیان دكه‌ت وه‌ك (ئاگرڤه‌مراندن، عه‌رد هه‌ژیان، بومبه‌كا كێمیا وی بیت، لافاو، گیانه‌وه‌ره‌كێ درونده بیت) هه‌ر تشته‌كێ مه‌ترسی بیت ل سه‌ر گیانێ وه‌لاتیان ئه‌ركه ل سه‌ر مه ب پارێزین.
ناڤبری گۆت: پولیسێن به‌ره‌ڤانیا باژێری گه‌له‌ك تایبه‌تمه‌ندی هه‌نه د بیاڤێن (بایلوجی، مه‌له‌ڤانگه‌ه، ئاگر ڤه‌مه‌راندن). پولیسێن ئاگرڤه‌مراندنێ دڤێت گه‌نج بن و ژ ئه‌نجامێ گه‌له‌ك گڤاشتنا ل سه‌ر حوكمه‌تا هه‌رێما كوردستانێ چ ژ شه‌رێ داعش بگره و برینا بودجا هه‌رێمێ ژلایێ به‌غدا ڤه ماوێ چه‌ندین ساله چ پولیس بۆ مه نه‌هاتینه دامه‌زراندن و مه پێدڤی ب 450 پولیسانه، چونكه باژێرێ مه‌زن بووی قه‌زا و ناحیه و تاخێن نوو زێده بووینه، هه‌تا نوكه میلاكێ مه ب گشتی زه‌لامن و سێ ئافره‌تن و ئه‌گه‌ر دامه‌زراندن ڤه بوو دێ رێژا 10% ده‌لیڤێ ده‌ینه ئافره‌تان بۆ كارۆبارێن كارگێری بهێنه دامه‌زراندن.
رێڤه‌به‌رێ به‌ره‌ڤانیا باژێری هێشتا ژی گۆت: هه‌تا راده‌كێ باش ترۆمبێلێن ئاگرڤه‌مراندنێ پشته‌ڤانیا وه‌زیرێ نافخوه دباشن و رۆژێن بوری وه‌ك پارێزگه‌ها دهۆكێ ل گه‌ل ئیدارا سه‌ربه‌خۆیا زاخۆ مه (13) ترۆمبێلێن نوو وه‌رگرتینه و ئه‌ڤه گه‌له‌ك باشن بۆ جادێن به‌رته‌نگ و رێكێن چیایی و گه‌له‌ك سوپاسیا جه‌نابێ وی و سه‌رۆكێ حوكمه‌تێ دكه‌ین بۆ ڤێ پشته‌ڤانیێ لێ هێشتا مه پێدڤی پێ هه‌یه و مه ترۆمبێلێن مه‌زن ژی داخاز كرینه، مه شه‌ش فرۆكه هه‌نه و دبه‌رهه‌ڤن بۆ هه‌ر كاره‌كێ پێدڤی خزمه‌تا خه‌لكی بكه‌ن.
ل دور ئاڤاكرنا تاواران ژی، رێڤه‌به‌رێ به‌ره‌ڤانیا باژێری گۆت: ئاڤاكرنا تاوه‌ران ب شێوه‌كێ باش نه‌هاتینه دروستكرن و جهێن وان دروست نین و پێدڤی یه جهێن وان دروست بن و دڤێت مه‌رجێن به‌ره‌ڤانیا تێدا هه‌بن وه‌ك ئاسانسوره‌كا بله‌ز بۆ قورتالكرنێ ژ هه‌ر روودانه‌كێ، بوری بۆ هه‌می قاتا، ئومباره‌كا ئاڤێ یا ده‌ه هزاری بیت و ژ ئه‌ڤرۆ پێڤه هه‌ر تاوه‌ره‌كێ بهێـته دروستكرن و ئه‌ڤه نه‌بن ئه‌م رازینابین وه‌ك به‌ره‌ڤانیا باژێری، چونكه بۆ مه پاراستنا گیانێ وه‌لاتیان ژ هه‌ر تشته‌كی گرنكتره و مه كومبوون ل گه‌ل فه‌رمانگه‌هێن په‌یوه‌ندار ئه‌نجامداینه و دێ به‌رده‌وام بین و هه‌ر تاوه‌ره‌كێ نوكه كار ل سه‌ر ئاڤاكرنێ ژی بكه‌ت دڤێت مه‌رجێن مه بجه بینیت.
رێڤه‌به‌رێ به‌ره‌ڤانیا باژێری ل دور بۆتلێن غازێ ژی گۆت: ده‌مێ هه‌ر دو روودانێن سلێمانیێ و دهۆكێ یێن غازێ دروست بووین، هه‌ر ئێكسه‌ر مه شه‌ش لژنێن پشكنینێ ل سه‌رانسه‌ری پارێزگه‌ها دهۆكێ پێك ئینان بۆ دووڤچوونا كومپانی و ئه‌و كه‌سێن ب دانانا سیسته‌مێ غازێ رادبن هه‌تا نوكه مه 1030 جه دیتی نه و 75 جه هاتینه راوستاندن و ل ده‌سپێكێ مه سه‌مونخانه پشكنینكرن و هه‌تا 31/12/2022 مه پشكنینكرن و ل نێزیك دێ كومبوونه‌كا دی ل گه‌ل كومپانیان هێته‌كرن و ماوێ 90 رۆژان وه‌ك موله‌ت دێ بۆ وان جهان هێته‌دان ئه‌وێن خه‌مساری و كێماسی تێدا دڤێت وی ماوه‌ی دا دروست بكه‌ن و پشتی 90 رۆژان دڤێت سیسته‌مه‌كێ جیهانی بیت.
ل دور ترۆمبێلێن غاز ژی ، ناڤبری گۆت: ل گه‌ل ئه‌وا كومپانیا ئاخفتینه و مه لاریبوون نینه ل سه‌ر گوهورینا ترۆمبێلان بۆ سیسته‌مێ غازێ لێ ب مه‌رجه‌كی سیسته‌مه‌كێ دروست بیت و ل گه‌ل خودانێن گه‌راجا ئاخفتینه و ب چ ره‌نگا نابیت ترۆمبێلێن غاز بچنه گه‌راجێن ژێر زه‌مین یان شوقه بیت یان هولان، دڤێت گه‌راجێن ترۆمبێلێن غاز گوره‌پان بن ئه‌ڤێن ڤه‌كری و داخازێ ژ خودانێن گه‌راجا دكه‌م ترۆمبیلێن غازێ قه‌ده‌غه بكه‌ن و نه‌هێلن بهێنه گه‌راجی و بلا تابلویێن قه‌ده‌غه‌كرنێ ب هلاویسن.
هێشتا گۆت: د ماوێ بوری دا ل گه‌ل رێڤه‌به‌ریا ئه‌وقافا دهۆك ب رێكا مامۆستایێن ئاینی مه داخاز ژ وه‌لاتیان كریه كو ژ ئه‌نجامێ هه‌ر روودانه‌كێ دا هاریكاریا تیمێن مه بكه‌ن و هاریكاریا وه‌لاتیان بكه‌ن ب دانا خوینێ و دیسا ب رێكا په‌روه‌ردێ و زانكۆیێ مه سمینار گه‌هاندینه قوتابیان و هه‌تا 550 جهان شیاینه په‌یاما خوه بگه‌هینێ و دێ خولێن مه دبه‌رده‌وام بن ل گه‌ل فه‌رمانگه‌هێن میری و دناڤا وه‌لاتیان دا كا دێ چه‌وا خه‌لكێ خوه پارێزین.
ل دووماهیێ ناڤبری گۆت: ب پشته‌ڤانی و هاریكاریا وه‌زیرێ نافخوه رێبه‌ر ئه‌حمه‌د و د.عه‌لی ته‌ته‌ر پارێزگه‌رێ دهۆكێ، به‌ری ده‌ست بكاربوونا مه ئه‌و چار سال بوو ئومبارێن كه‌ل و په‌لێن یه‌ده‌ك د ڤالابوون و پشتی بورینا 100 رۆژان ل سه‌ر بده‌ست بكاربوونا مه شیاین جاره‌كا دی وان ئومباران ژ كه‌ل و په‌لێن یه‌ده‌ك پڕبكه‌ینه‌ڤه.
