رێڤه‌به‌رێ حه‌ج و عومرێ ل دهۆكێ:هه‌ر ئافره‌ته‌كا حه‌زا سه‌رپه‌رشتیكرنا گرۆپێن ئافره‌تان بۆ عومرێ هه‌بیت دێ پشته‌ڤان بین
ئه‌ڤرۆ، سالار محه‌مه‌د دۆسكی:
رێڤه‌به‌رێ حه‌ج و عومرێ ل پارێزگه‌ها دهۆكێ ئاشكرا كر كو هه‌ر ئافره‌ته‌كا حه‌ز هه‌بیت كومپانیه‌كا حه‌ج و عومرێ دامه‌زرینیت، ئه‌م وه‌ك رێڤه‌به‌ری هه‌روه‌سا وه‌زاره‌تا ئه‌وقافێ ژی دێ پشته‌ڤان و هاریكار بین و ئه‌ڤ پێنگاڤه دێ چوونا عومرێ لده‌ف ئافره‌تان زێده‌تر لێ كه‌ت.
مه‌لا سه‌رمه‌د جه‌میل ئالیخان، رێڤه‌به‌رێ حه‌ج و عومرێ ل پارێزگه‌ها دهۆكێ بۆ رۆژناما ئه‌ڤرۆ دیار كر كو كۆمپانیێن حه‌ج و عومرێ سه‌ر ب رێڤه‌به‌ریا حه‌ج و عومرێ ڤه نه و هه‌تا نوكه 70 كومپانی ل رێڤه‌به‌ریا توماركرنا كومپانیان ل پارێزگه‌ها دهۆكێ هاتینه تۆمار كرن.
مه‌لا سه‌رمه‌د گۆت: (ل عیراقێ ئافره‌ت هه‌نه ل دووڤ رێنمایان بكارێ برنا وه‌لاتیان رادبن بۆ عومرێ به‌لێ ل كوردستانێ هه‌تا نوكه نینن و ئه‌ف هزره مه پێشكێشكریه كو هه‌ر ئافره‌ته‌كا هه‌بیت بڤی كاری رابیت دێ پشته‌ڤان و هاریكار بین، لێ هه‌تا نوكه چ ئافره‌تان داخواز بڤی ره‌نگی نه‌كریه، دیسا چ ئاریشه نینن نه قانوونی و نه ئایینی و ئه‌ڤه خزمه‌ته‌كا وه‌لاتی و ئایینی یه بهێته كرن).
رێڤه‌به‌رێ حه‌ج و عومرێ گۆتژی: (ئه‌م ب رێكا رۆژناما ئه‌ڤرۆ دبێژین لدووڤ رێنمایان هه‌ر ژنه‌كا حه‌ز ل سه‌ر هه‌بیت دێ پشته‌ڤان و هاریكار بین و مه چ جیاوازی نینه، هه‌ر ژنه‌كا حه‌ز هه‌بیت دڤێت یا به‌رهه‌ڤ بیت بۆ ئه‌ڤی كاری ژ هه‌ر روویه‌كی ڤه، هه‌ر ژنه‌كا داخواز بكه‌ت دێ پشته‌ڤان بین و دێ داخوازا وێ بلند كه‌ین بۆ وه‌زاره‌تێ).
مه‌لا سه‌رمه‌د جه‌میل ئه‌و چه‌نده ژی گۆت: (مه پێدڤی ب هه‌بوونا ئافره‌تان هه‌یه و هه‌تا هه‌كه كومپانی نه‌بیت ژی، مه پێدڤی پێ هه‌یه رێكخه‌ری ل گه‌ل كومپانیێن زه‌لامان هه‌بیت و هه‌تا فه‌رمانبه‌را كومپانیێ ژی بیت و هه‌تا وی ده‌می كومپانیه‌ك ژی وێ ده‌لیڤێ بۆ ژنه‌كێ ڤه‌كه‌ت دێ پشته‌ڤان بین، چونكی هه‌یڤانه به‌هرا پتر ژن دچنه عومرێ).
رێڤه‌به‌رێ حه‌ج و عومرێ د به‌رده‌وامیا ئاخفتنێن خوه‌دا گۆت: (هه‌كه كومپانیه‌كا ئافره‌تان هه‌بیت ره‌نگه رێژا ژنێ ژی پتر لێ بهێت ژ بۆ چوونا عومرێ، چونكی ئه‌و ژن دێ رێنیشانده‌ر بیت و دێ بۆ ژنان ئاخڤیت و ره‌نگه گه‌له‌ك ژن هه‌بن پرسیار هه‌بن و شه‌رم ژ زه‌لامان بكه‌ن و دێ گه‌له‌ك هزره‌كا سه‌ركه‌فتی بیت ژنه‌ك و زه‌لامه‌ك پێكڤه كار بكه‌ن و هه‌كه هه‌ڤژین ژی بن دێ هێشتا باشتر بیت و هه‌ر كه‌سه‌كێ بڤی كاری رابیت دێ پشته‌ڤان بین).
