رێڤهبهرێ گشتیێ چاندنێ: ئهڤ ساله رێژا گهنمی 100% زێدهبوویه
ئهڤرۆ، سالار محهمهد دۆسكی
رێڤهبهرێ گشتیێ چاندنێ ل پارێزگهها دهۆكێ راگههاند، حۆكمهتا عیراقێ سهرهدهریێ ل گهل مه دكهت وهك وهلاتهكێ جیران و گهلهك گرفتا بۆ مه دروست دكهت، دیار كر ژی كو رێژا گهنمی ل ئهڤ ساله ب رێژا 100% زێدهبوویه.
ئهندازیار ئهحمهد جهمیل ئهبو زهید، رێڤهبهرێ رێڤهبهریا گشتیێ چاندنێ ل پارێزگهها دهۆك بۆ رۆژناما ئهڤرۆ گۆت: ئهڤ ساله ژ بهر هشكهسالیێ نێزیكی 300 دونهمێن گهنمی ل دهڤهرا سێمێلێ نههاتینه درین و ئهوا هاتیه درین كارتێكرن ل سهر ههبوو و دهڤهر بۆ دهڤهرێ و بهرههم ب گشتی یێ كێم بوو، لێ ئهڤ ساله پتر گهنم هاته وهرگرتن و ئهڤ ساله 58 هزار تهنێن گهنمی هاتنه وهرگرتن و ل سالا بۆری 7 هزار تهن وهرگرت بوون و 100% هاتبوو زێدهكرن.
ناڤبری گۆت: دهمێ گهنم دهێته وهرگرتن ئهو گهنم دهێته بكارئینان بۆ ئارێ خوارنێ و ل عیراقێ ب گشتی و ههكه گهنم ل كوردستانێ نهمینیت وهزارهتا بازرگانیا عیراقێ گهنمی بۆ مه فرێدكهت و ههكه ل پارێزگهههكا باشور نهمینیت ئهم گهنمی ژ دهۆكێ بۆ رهوانه دكهین.
رێڤهبهرێ چاندنێ ل پارێزگهها دهۆكێ ئهو ژی گۆت: ب شێوهكێ بهرچاف ئاڤا ژێر عهردی كێم بوویه و رێنمایێن كولانا بیران ههمی ئێكن، ل سالا 2015 دهركهفتینه و مه چهند پێشنیاز بلندكرینه كو مهرجێن كولانا بیران بهێنه ب زحمهتكرن و ل بهرامبهر دا پێگوهورهك بهێته پهیداكرن، بهنداڤ و سكرێن ئاخێ بهێنه دروستكرن و تایبهت كارتێكرنا هشكهسالیێ گهلهك كارتێكرن كریه ل سهر رهوشا چاندنێ.
ناڤبری ئهو ژی گۆت: پرۆژێ بازاركرنا گهنمی پرۆژهكێ مهزنه، نوكه كارێ ل سهر دروستكرنا وی دهێتهكرن، سایلو، كارگههێن ئاری، ساڤاری، مهعكرونێ و ههمی پێدڤیێن ئاری بۆ خوه ڤهدگریت و ههمی پێكهاتا ب خوهڤه دگریت و سایلو دشێت 60 تهنێن ئاری وهربگریت، دیسا كومپانیا كاگین گرۆپ مژوولی پرۆژهكێ مهزنه كو دو لایهنان بخوه ڤهدگریت رووهكی و سامانێ ئاژهلی، كاودانێن سامانێ ئاژهلی دهێته گوهورین 1000 چێل دهێنه خودانكرن، سایلو و كارگههێن دروستكرنا ئاری یه و شیرێ ههمی پارێزگههێ دێ وهرگریت و شیری دێ بهرهم دئینت و ههمی پێدڤیێن سپیاتیان دێ دابین كهت.
ناڤبری گوت: رهوشا پهلهوهران د ئاستهكێ باش دایه، لێ هندهك جاران بهایێ وان دهێته خوارێ، لێ بهایێ عهلهفی گهلهكێ گرانه و رۆژێن بوری كومبوونهك ل گهل خودانێ، كارگههێن عهلهفی هاتهكرن و هندهك جاران ئهم هاریكاریا وان دكهین بۆ كێمكرنا بهایێ عهلهفی و وان ژی سوز دا دهاریكاربن ل گهل كارگههێن پهلهوهران مه 211 پرۆژێن پهلهوهران ههنه ل پارێزگهها عیراقێ ههنه و زێدهتر ژ خواستا خوه ههنه.
رێڤهبهرێ گشتیێ چاندنێ ئهو ژی گۆت: ژ سالا 2014 وهره بودجا رێڤهبهریا مه یا كێمه و كێشا مه ل گهل حوكمهتا عیراقێ یه و ههمی گاڤا نه دپێگیرن ب رێكهفتنێن خوه و دهمێ بهربوومێ مه دگههیتێ كێشا بۆ دروست دكهن وهك وهلاتهكی سهرهدهریێ ل گهل مه دكهن و دڤێت ههمی پێدڤیێن گهنمی ئهو وهك جوتیارێن باشور و ناڤهراست بۆ جوتارێن كوردستانێ دابین بكهن و مخابنی ڤه ئهو نادهنه مه.
