هشيارى كاميرێن لاپتۆپێن خوه بن
ئه‌ڤرۆ نيوز، فاتما مزوورى:
سه‌رۆكێ نڤيسينگه‌ها ڤه‌كولينێن فيدرالى FBI شيره‌ت ل هه‌موويان كرن كو كاميرێن خوه يێن لاپتۆپى ڤه‌شێرن، ژ به‌ر كو دبيت بۆ سيخوريێ بهێنه ب كارئينان، هێلانا كاميرێ بێى ڤه‌شارتن دبيت ب ساناهى بهێته دزين، پاشان ژى بۆ وێنه‌گرتنا هه‌ر تشتێ ل ده‌وروبه‌رێن وێ بهێته ب كارئينان.
ئه‌ڤه دبيت پێزانينه‌كا نوو نه‌بيت، پشتى ل خزيرانا بۆرى گه‌له‌ك گه‌نگه‌شه ل سه‌ر ڤى بابه‌تى هاتيه كرن، ده‌ما هنده‌ك وێنه ل نڤيسينگه‌ها دامه‌زرێنه‌رێ فه‌يسبۆكى مارك زوكربێرگ هاتينه به‌لاڤركرن كو يێ كاميره و مايكرفۆنا كۆمپيۆته‌رێ خوه دگريت، ب رێيا دو په‌رێن كاغه‌زى يێن بچووك دا كو ژ مه‌رترسيێن تايبه‌تمه‌نديێ ب پارێزيت. هه‌كه دامه‌زرێنه‌ر و خودانێ كۆمپانيه‌كا مه‌زنا جڤاكى يا جهانى يا وه‌كو فه‌يسبۆكى كاره‌كێ ژ ڤى ره‌نگى بكه‌ت دا كو خوه ژ تايبه‌تمه‌نديێ ب پارێزيت دا كو سيخورى ل سه‌ر نه‌هێته كرن، تشته‌كێ سه‌ره‌كى يێن وه‌كو مه ژ ڤێ چه‌ندێ ب ترسن.
پشتى سمينارا جێمس كۆمى رێڤه‌به‌رێ FBI ل حه‌فتيا بۆرى بۆ بنگه‌هێ ڤه‌كولينێن ستراتيژى يێ نێڤده‌وله‌تى ل واشنتۆن جاره‌كا دى ئه‌ڤ بابه‌ته كه‌فته به‌ر دانوستاندنێ و د چارچۆڤێ گۆتنێن خوه دا، كۆمى ب ره‌نگه‌كێ ئاشكه‌را هوشدارى ل دۆر مه‌ترسيار “وێب كام” دا ل دۆر تايبه‌تمه‌نديێ، شيره‌ت ژى ل ب كارئينه‌ران كرن كو ب پارچه‌كا كاغه‌زا له‌يزيك ب پێچن يان ژى هه‌ر تشته‌كێ دى بۆ هندێ كه‌س نه‌شێت ب رێيا چو به‌رنامان ئه‌وێ كاميرێ ڤه‌كه‌ت و وێنه و ڤيديۆيان بگريت، ئانكو رێ ل هه‌مبه‌ر تۆماركرنا وێنه‌ى بگريت.
كۆمى ته‌كست ل سه‌ر وێ چه‌ندێ كر كو هه‌موو فه‌رمانبه‌رێن حكومى ل وه‌لاتێن ئێكگرتى يێن ئه‌مريكى كاميرێن كومپيۆته‌رێن خوه ڤه‌دشێرن، ئه‌ڤه دڤێت ل سه‌ر هه‌موو كارمه‌ندان ژى بهێته ئه‌نجامدان.
رێڤه‌به‌رێ FBI زانى ژى كو دێ ئه‌ڤ شيره‌تا وى وه‌كو يارى پێكرنه‌كێ بيت هه‌ر وه‌كو وى ئاماژه پێكرى، به‌لێ وى دا زانين كو ژ به‌ر رژديا وى يه ژ بوو پاراستنا تايبه‌تمه‌نديا وه‌لاتيان و گۆت: “چو جوداهى د ناڤبه‌را گرتنا كاميرا لاپتۆپى و گرتنا ده‌رگه‌هێ ترۆميێلێ دا نينه”.
