رێڤەبەریا چاندنا دهۆكێ: د بازاڕێن نێڤدەولەتی دا حەزەكا زۆر ل سەر سماقا كوردی هەیە
زنار تۆڤی:
ئەحمەد جەمیل، رێڤەبەرێ گشتیێ چاندنێ ل پارێزگەها دهۆكێ دیاركر، ئەڤ سالە گەشەیەكا باش و بەرچاڤ د بەرهەمئینانا سماقێ دا هەیە، ب رەنگەكی، كو رووبەرێ چاندی ب سماقێ گەهشتیە 12 هزار و 550 دۆنەمێن ئەردی ل پارێزگەها دهۆكێ.
ناڤهاتی بۆ ئەڤرۆ گۆت: «ئەم پێشبینی دكەین، بەرهەمێ سماقێ ئەڤ سالە ل پارێزگەها دهۆكێ بگەهیتە حەفت هزار و 480 تەنان، هەڤبەركرن ل گەل پار، ب رێژەیا 20%ێ زێدە بوویە و سماق بوویە زێرێ سۆرێ هەرێما كوردستانێ«.
رێڤەبەرێ گشتیێ چاندنێ ل پارێزگەها دهۆكێ خویا ژی كر، بهایێ سماقێ د بازارێن هەرێما كوردستانێ دا زۆر یێ باشە، ئەڤە ژی دبیتە ئەگەر، كو پتر گرنگی ب ڤی بەرهەمی بهێتەدان و گۆت: «هەتا نوكە هەرێما كوردستانێ 665 تەنێن سماقێ هنارتینە بازارێن وەلاتێ توركیا، ئەڤە وێ چەندێ نیشا ددەت، كو حەزەكا زۆر ل سەر سماقا كوردی د بازارێن نێڤدەولەتی دا هەیە.
