رێڤەبەریا گشتی یا ئەوقافێ: هەر كەسێ سفكاتیێ ب ئایینەكی بكەت پێرابوونێن قانوونی ل هەمبەر دێ هێنە وەرگرتن
ئەڤرۆ
ئاكرێ، رەمەزان زەكەریا:
وەكو وەرازیبوون هەمبەر سفكاتیكرن ب پێغەمبەرێ ئیسلامێ، رێڤەبەریا گشتی یا ئەوقاف و كاروبارێن ئایینی ل پارێزگەها دهۆكێ سكالا ل سەر وی كەسی تۆماركر، كو سفكاتی ب پێغەمبەری كری.
محەمەد خالد، رێڤەبەرێ گشتیێ ئەوقاف و كاروبارێن ئایینی ل پارێزگەها دهۆكێ د كۆنگرەیەكێ رۆژنامەڤانی دا دیار كر، ئەوان ب شێوەیەكێ فەرمی ل دادگەها دهۆكێ سكالا ل دژی وی كەسێ سفكاتی ب ئایینێ پیرۆزێ ئیسلامێ كری تۆماركر و گۆت: (هەر كەسێ سفكاتیێ ب كەسایەتیا پێغەمبەرێ خوشتڤی (محەمەد) سلاڤێن خودێ ل سەر بن یان هەر ئاینەكی و درووشمەكێ ئایینی و پیرۆزیێن ئایینی ژ هەر ئاینەكی بكەت دێ پێرابوونێن قانوونی هەمبەر وان گرینەبەر ب گورەی ئەو قانوونێن كو بەركارن ل دادگەهێن هەرێما كوردستانێ، ئەڤ كەسێ كو چەند رۆژێن بۆری ل دهۆكێ سفكاتی ب پێغەمبەری كری، مە داخوازكریە پێرابوونێن قانوونی ل گەل بهێنە وەرگرتن).
زێدەتر گۆت: (داخوازكرێ گشتی ژی پشتەڤانیا مە كر، ژ بەركو ئەڤ یەك گرێدایی بیروباوەرێن مللەتەكی یە، دیسا رێڤەبەریا كاروبارێن مەسیحیان و ئێكەتیا زانایێن ئایینێ ئیسلامێ ژی پشتەڤانیا مە كریە و ئەوان ژی سكالا تۆماركریە ل سەر وی كەسێ خوە ب مەتران دایە نیاسین و ب رێیا تۆرێن جڤاكی سفكاتی كری، هەر چەندە وی كەسی لێبۆرین كریە، بەلێ لێبۆرین د ڤێ یەكێ دا نینە، چونكی ئەڤە سەرپێچیەكا گشتی یە و پتری 98% خلكێ مە موسلمانن).
