رێڤەبەری یان خوارنگەهـ؟
بوشرا محەمەد عەلی
بۆ دەمێ چەند سالانە ل پڕانیا رێڤەبەری و فەرمانگەهێن باژێرێ مە دیاردەیەكا نەساخلەم هەیە (مەرەما من ژ نە ساخلەم ئەوە كو چو بڕیار یاسا بۆ نینن) ئەوژی خوارنا تێشتێ یە ژلایێ پتریا فەرمانبەران ڤە ل جهێ كارێ خوە و ئەڤە چەندە گەلەكا نەڕەوایە، چنكو فەرمانبەر دڤێت ل مالا خوە یان ب رێڤە ل خوارنگەهەكێ تێشتا خوە بخۆت پاشی بهێتە دەواما خوە و هەر دەمێ گەهشت كو پێدڤیە ل دەمژمێر هەشتی سپێدێ ل جهێ خوە یێ كاری بیت، چنكو ئەو ئێدی مۆلكێ حكومەتێ یە و ئەركە ل سەر وی كار و ئەركێن خوە بجه بینیت و دەمێ كەسەك سەرەدانا وان دكەن مامەلا وی بێی گیرۆبوون بۆ چێكەت، لێ مخابن لڤێرە دو ئاریشە هەنە، یا ئێكێ ل دووف یاسایێ دڤێت ل دەمژمێر هەشتی سپێدێ ل جهێ خوە یێ كاری بیت، لێ ئەڤە گەلەكا كێمە و ل پتریا رێڤەبەریا هەتا هەشت و نیڤ ژی دەوام دەست پێ ناكەت، ئاریشەیا دویێ ژی دێ بینی فەرمانبەرەكی هندەك ماست و نان یان هەر خوارنەكا دی بیت هەتا هندەك جاران ژی دگەهیتە قازانان دگەل خوە دئینن و سفرێن مەزن ددان و ڤێ چەندێ ژی نەكێمی نیڤ دەمژمێرێ بۆ دڤێت، ئانكو ئەڤە بۆ دەمژمێر نەه هێشتا دەمێ ب دروستی دەست پێ نەكری، ل ڤێرە ئەز بەحسێ هەموو رێڤەبەری یان فەرمانگەهان ناكەم، چنكو گەلەك ژوان د وەسا نیینن، لێ دشێم بێژم پتریا وان ئەڤ دیاردە ئانكو خوارنا تێشتێ یا لێ هەی و ب ئاشكرای دهێتە دانان و ئەڤ گیرۆبوونە كارتێكرنێ ل رێڤەبرنا مامەلەیێن خەلكی دكەن و ئەڤ چەندە یا رۆهن و ئاشكرایە، لەورا دخوازم كاگیرَیا پارێزگەهێ ب دروستی بهێنە سەرخەت و ڤێ دیاردەیێ نەهێلن، چنكو ب راستی ژی نەیا شارستانی یە و دڤێت دەلیڤەیێ ب وی رەنگی نە دەنە قەرمانبەران كو دەمژمێرا ئێكێ یا دەوامێ یا خاڤ و سست بیت و ئەم وەك وەلاتی مافێ مەیە ڤێ گازندەیێ بكەن، چنكو وەكو مە گۆتی ل هندەك رێڤەبەریان خەلكەك هەتا دەمژمێرەكێ دمینە ل هیڤیا هندەك فەرمانبەران هەتا دهێنە دجهێ كارێ خوە وئەڤە چەندە نەیا دروستە، چنكو چو ئەو كەس نە دڕێ پێ داینە جهێ كارێ خوە بكەن خوارنگەه، چنكو ئەو رێڤەبەری یە نە خوارنگەهە.
