رێکخراوەک دەلیڤا کاری بۆ 60 کرێکارێن سەرسنکێ دابین دکەت
ئەڤرۆ نیوز ، مەحمود نھێلی:
رێکخراوا نووژین و ب ھەڤکاری ل گەل رێکخراوا ( G I Z ) رابووینە ب کار خستنا ٦٠ کرێکارێن کچ و کور ، ب رێیا سەخبێکرن و کەزاختنا دارستانا سنوورێ ناحیا سەرسنکێ ب درێژاھیا چار کیلومەتران ب ڤێ یەکی رۆژانە ئەڤ کرێکارە دناڤ پرۆژەی دا کار دکەن.
نەشوان حوسنی، رێڤەبەرێ ناحیا سەرسنکێ بۆ ئەڤرۆ نیوز دیارکر، کو ئەڤە ئێکە ژ پرۆژێن رێکخراوا نووژین، کو ژلایێ رێکخراوا ( G I Z ) ڤە پشتەڤانیا مادی لێ دھێتە کرن و گۆت: ( ئەڤ پرۆژە پێک دھێت ژ کەزاختن و سەخبێری و پاقژکرنا دارستانێ ھەر ژ سەنتەرێ ناحیا سەرسنکی ھەتا گوندێ ئاشەوا ب درێژاھیا چار کێلومەتران و فرەھیا ٥٠٠ مەتران).
ناڤھاتی دیار ژی کر، کو ئەڤ پرۆژە دێ بۆ دەمێَ ٦٠ رۆژان یێ بەردەوام بیت و رۆژانە ٦٠ کرێکارێن کچ و کور ل سەر کار دکەن و گۆت: “زێدەباری ئەڤ کارە دێ خزمەتا دارستانێ و ژینگەھێ و جوانیا سروشتی کەت، دبیتە ئەگەرێ ب کار بوونا ھەژمارەکا زۆرا کرێکار و ھەژارێن خەلکێ دەڤەرێ و ژلایێ مادی ڤە ژی مفا ژێ دھێتە وەرگرتن”.
