رێکخراوەک: سیستەمێ کوری و ئوکرانی ب کێر کورستانێ ناھێت
ئەڤرۆ نیوز، نەوزاد ھلۆری:
روودانێن ھاتنووچۆنێ ل ھەرێما کوردستانێ ب گشتی بەر ب زێدەبوونێ ڤە دچن، سەرۆکێ رێکخراوا رەوشەنبیریا ھاتنووچۆنێ کو ژ روویێ جڤاکی و رەوشەنبیری کار ل سەر کێمکرنا روودانان دکەت دیارکر پێدڤی یە کار ل سەر ھوشیاریا جڤاکی بھێتەکرن چونکی قوربانیێن روودانێن ھاتنووچۆنێ تنێ شوفێر نینە.
تەھا مەھدی، سەرۆکێ رێکخراوا رەوشەنبیری یا ھاتنووچۆنێ ل دەڤەرا سۆران بۆ ئەڤرۆ نیوز گۆت: زێدەباری کو زوربوونا ھژمارا ترومبێلان و پێگیرنەبوونا شوفێرا بۆ رێنمایێن ھاتنووچۆنێ و بەرتەنگی یا رێیان ئەگەرێن سەرەکی یێن زێدەبوونا روودانێن ھاتنووچۆنێ نە ل کوردستانێ، لێ دڤێت ئەوێ یەکێ ژی بزانین کو نەھوشیاریا جڤاکی بۆ ھاتنووچۆنێ و رەوشەنبیر نەکرنا شوفێر و وەلاتیان ژی ئەگەرێ زێدەبوونا روودانێن ھاتنووچۆنێ یە، ژبەر ڤێ گرنگە پەیمانگەھەکا تایبەت بو پێگەھاندنا جڤاکی بھێتە دروستکرن و یێ دەرچۆیێ ئەوێ پەیمانگەھێ نەبیت مولەتێ وەرنەگریت، ل وێ پەیمانگەھێ ھەموو ھوکاریێن ھاتنووچۆن و ترومبێل و شوفێری و ھەر تشتێ گرێدایی ھاتنووچۆنێ بھێتە رونکرن.
زێدەتر گۆت: سیستەمێ کوری و ئوکرانی نوکە ل ھەرێما کوردستانێ ل سەر ھاتنووچۆنێ دھێتە بجھکرن، ب چ شێوەیان کێری کوردستانێ ناھێت، ژبەرکو شێوە و ژینگە و سرۆشتێ جوگرافی و جڤاکی و قانوونیێ کوردستانێ جودایە، ژ بەرڤێ گرنگە ب گورەی کوردستانێ بھێتە دروستکرن.
