رێیا مرنێ ژ گەلی بۆ دێرەبوونێ ھاتیە ڤەگوھاستن
ئەڤرۆ نیوز ، عەلی حاجی:
د دیدارەکێ دا رائید ئەیوب سەعید بەرپرسێ بنگەھێ ھاتن وچوونا گەلیێ زاخۆ دیار کر ل ماوەیێ ٩ ھەیڤێت بوری پشتی ڤەکرنا تونێلا گەلیێ زاخۆ و جووت سایدکرنا رێکا دناڤبەرا زاخۆ بۆ دھوکێ ، ٨٠% ژ روودانێت ھاتن وچوونێ کێم بوینە لێ رێیا دێرەبوونێ بۆ گرشینی بوویە رێیا مرنێ.
زێدەتر گۆت: رێژەیا ھاتن وچوونێ ل سنورێ پشکا مە کێم بوویە ب جووت سایدکرنا رێکا دناڤبەرا زاخۆ بۆ دھۆکێ دا و ڤەکرنا تونێلا گەلیێ زاخۆ و دانانا کامیرێن سەرپێچیان ب ئەگەرێ سەرەکیێ کێم بوونا روودانان دزانم ، ھەر چەندە بەری ڤەکرنا تونێلێ گەلەک روودانێت مرنێ ل گەلیێ زاخۆ پەیدا دبون کو ب گەلیێ مرنێ ھات بوو ناڤ کرن و رێیاا ترومبێلێن بارھەلگر ژی ھاتبوو گوھۆرین کو ب رێکا دێرەبوونێ را دچوونە پارێزگەھا دھوکێ ، پشتی ڤەکرنا تونێلێ ھەتا نوکە ب خوش بەختانە چوو روودانێن ترافیکی نەھاتینە تومار کرن کو ببیتە سەدەمێ گیان ژدەست دانا شوفێر و ھاولاتیان.
ناڤھاتی زێدەتر گوت : سالا بوری ٢٠١٨ دا ٢٣ روودان ل سنورێ بنگەھێ مە ھاتینە تومار کرن کو تێدا ٢٣ کەس بریندار ببون و ٧ کەسان گیانێ خوە ژدەست دا بوون لێ پرانیا وان کەسێن گیانێ ژ دەست داین و بریندار بوین ل سەر رێیا دێرەبوونێ ھەتا گوندێ گرشینێ بوون، کو ل نوکە دا ب رێیا مرنێ ھاتیە ناڤکرن ژبەر کو رێکەکا ئێک سایدی یە و بویە رێیەکا بازرگانی و ھاتن و چوونا ترومبێلێن بارھەلگر زێدەباری تێکچوونا وێ.
