رێیا چار گوندێن دەڤەرا بەرواری بالا پێدڤی ب سەخبێركرنێیە
بەرواری بالا ، زنار تۆڤی:
رێیا هەر چار گوندێن ئێكمالێ و هێسێ و مێركاجیا و خرابەیی، ل دەڤەرا بەرواری بالا بوویە كەندوكور و هەتا نوكە رێیا وان گوندان نەهاتیە چێكرن، هەر چەندە خەلكێ وان گوندان گەلەك جاران دخواز ژ جهین شولەژێ كرینە كو رێیا گوندێن چێكەن، بەلێ هەتا نوكە نەهاتییە چێكرن.
سەلام محەمەد، وەلاتییەكێ گوندێ ئێكمالێ یە ل دەڤەرا بەرواری بالا، بۆ رۆژناما ئەڤرۆ دبێژیت: رێیا گوندێ ئێكمالێ و گوندێن مێركاجیا و هێسێ و خرابەیی، ل دەڤەرا بەرواری بالا، گەلەك یا نەخۆشە و هەموو بوویە كەندوكور و ب زۆری ترۆمبێل دشێن بهێنە وان گوندان، هەر چەندە گەلەك جاران مە وەكو خەلكێ وان گوندان داخواز ژ ناحیا كانی ماسێ و قەزا ئامێدیێ و جهێن شۆلەژێ كرینە، كو رێیا گوندێن مە چێكەن و سەخبێر بكەن، بەلێ هەتا نوكە نەهاتینە چێكرن و سال بۆ سالێ خرابتر لێ دهێن، درێژاهییا وێ رێكێ نێزیكی هەشت كیلۆمەتر و نیڤایە، دیسان هەر جارەكا مرۆڤ ب ترۆمبێلێ بچیتە گوندێ مە یان ژی ئێك ژ وان گوندێن دیتر، زیانێن مەزن دگەهنە ترۆمبێلێن مە، هندی هند ئەو رێك یا نەخۆشە و هەموو كەندوكورە، لەوما ئەم دخوازین جهێن شولەژێ رێیا گوندێن مە چێكەن.
ناڤهاتی گۆت ژی: سالانە ب سەدان تەنێن بەرهەمێ سێڤان و بەرهەمێن دیتر یێن فێقی ژ وان گوندان دهێن و هەموو گوند ژی دئاڤانە و خەلك لێ هەنە و نوكە نێزیكی 50 خانی ل گوندێ ئێكمالێ د ئاڤانە، هەر دەمێ ترۆمبێلێن مە دو جاران هاتنوچوونێ د وێ رێكێ را بكەن، ئەم نەچار دبین ترۆمبێلێن خۆ دبەینە دەف فیتەرێن ترۆمبێلان داكو ترۆمبێلێن مە سەخبێر بكەن، ژبەركو زیان دگەهیتێ ژبەر هەبوونا كەندوكوران و لەرزینا ترۆمبێلان، دیسان دەمێ ئەم فێقی ژی دئینین، هەموو دناڤ ترۆمبێلان دا خراب دبیت و ل وەرزێ زڤستانێ ژی رێیا گوندێ مە ژبەر بەفرێ ناهێتە ڤەكرن و گەلەك جاران ل وەرزێ زڤستانێ ئەم یێن ئاسێ بووین ل گوندی.
سەلام هێشتا دبێژیت: ل وەرزێ هاڤینێ پتری سەد مالان دهێنە گوندی و كارێ چاندنێ دكەن، هەروەسا ل وەرزێ زڤستانێ ژی خەلكێ گوندێ مێركاجیا دمیننە ل سەر گوندێ خۆ، ئەم دخوازین رێیا وان گوندان بهێتە چێكرن، چونكی ژبەر خراببوونا رێكێ خەلكێ وان گوندان نەشێن قەستا گوندێن خۆ بكەن، ڤێ چەندێ زیانێن مەزن گەهاندینە خەلكێ مە.
ئەندازیار هەڤال عەلی، بەرپرسێ تەكنیكی ل رێڤەبەریا سەخبێری و پاراستنا رێك و پرا ل پارێزگەها دهۆكێ بۆ رۆژناما ئەڤرۆ گۆت: ل سالا 2021 ێ، ڤەدیتن بۆ رێیا گوندێن ئێكمالێ و هێسێ و مێركاجیا و خرابەیی هاتییە كرن، ل 16 ی ئادارا هەمان سال ئەو ڤەدیتیە چوویە پارێزگەها دهۆكێ، ل وی دەمی پتر ژ ملیارەك و 500 ملیۆن دیناران بۆ هاتینە تەرخان كرن، ئەو رێك ب دو قوناغان داهێتە چێكرن، قووناغا ئێكێ دا رێیا سەرەكێ یا وان گوندان ب درێژاهییا هەشت كیلۆمەتر و 400 مەتران هێتە چێكرن و قووناغا دیتر ژی هەشت كیلۆمەتر و 900 مەترن، كو ئەو ژی چێكرنا كولانێن ناڤخۆیی یێن وان هەر چار گوندانە.
بەلێ هەكە رەزامەندی ل سەر چێكرنا رێیا وان گوندان بهێتەدان، دڤێت ڤەدیتنەكا دیتر بۆ بهێتە كرن، چونكی نوكە قێر و ئەو مادێن رێك پێ دهێنە چێكرن گرانتر لێ هاتینە، دبیت نوكە نێزیكی دو ملیار دینار لێ بهێنە خەرجكرن.
