رێیێن باش بۆ نەخۆشێن شەکرێ ل ھەیڤا رەمەزانێ
ئەڤرۆ نیوز:
رەمەزان نێزیک بوو، تایبەتمەندان داخوازا خوە بۆ نەخۆشێن شەکرێ دوبارە کر کو ل دووڤ ھندەک شیرەتان بچن دا بشێن ب سەرکەفتیانە رۆژیان بگرن.
پتر ژ ٣٨٢ ملیۆن مرۆڤان نەخۆشیا شەکرێ یا ھەی، پتر ژ ٣٤ ملیۆنان ل رۆژھەلاتا ناڤین دژین، ئەڤە ل دووڤ ئامارێن ئێکەتیا نیڤدەولەتی یا نەخۆشیا شەکرێ، کو دوپات کریە کو وەلاتێن سعوودیێ و کوێتێ و قەتەر و مسر ھژمارا پتر یا ڤان نەخۆشان لێ دژین.
پتریا ڤان نەخۆشان ژڤانە ل گەل رەمەزانێ و رۆژیان، تایبەتمەند دبێژن ھەکە ل دووڤ ڤان شیرەتان چوون دێ رۆژیا وان یا سەرکەفتی بیت.
تایبەتمەند دبێژن پێدڤیە ل ھەیڤا رەمەزانێ ژی سێ دانێن خوارنێ بخۆن، فتارە و پاشیڤ و دانەکێ ژی د ناڤبەرا وان دا، ھەروەسا یا باش ئەوە گەلەک ئاڤێ و تەراتیێن بێ شەکر ڤەخۆن.
تایبەتمەند دبێژن یا باش ئەوە نەخۆشێ شەکرێ پاشیڤێ گیرۆ بکەت ھەتا بەری بانگێ سپێدێ و نابیت شیرینیان و تشتێن قەلاندی بخۆن و ب تنێ لبەکا فێقی و سێ قەسپان بخۆن.
دیسان تایبەتمەندان دیار کر کو ئاستێ شەکرێ ب سەعەتەکێ یان دویان بەری فتارێ گەلەک کێم دبیت، لەورا یا باش نینە خو ب وەستینن یان بنڤن دا پتر ئاستێ شەکرێ نزم نەبیت.
نیشانێن نزمبوونا شەکرێ د ناڤ خوینێ دا وەکو شارەزا دیار دکەن، ھەستکرن ب برسێ ل گەل گێژبوون و سەرئێشان و خوھدان و ھەستکرن ب لاوازیێ و دودلی، یا پێدڤیە پشکنینا خوینێ بھێتە کرن ھەکە کێمتربوو ژ ٨٠ دڤێت رۆژیا خوە ب کۆپەکێ خۆشاڤێ بشکێنیت خو ھەکە بانگێ مەغرەب ژی نەدابیت. یا پێدڤیە بەردەوام سەرەدانا نۆشداری بکەت دا خوە پشت راست بکەت کا دێ شێت رۆژیان گریت یان نە.