رێیەكا پیادە و گوزاری دێ ل دەوروبەرێن سەنتەرێ ئامێدیێ هێتە چێكرن
ئامێدیێ، مەحمود نهێلی
ژ بۆ پتر گرنگی دان ب كەرتێ گەشت و گوزارێ و گەهاندنا پرۆژێن خزمەتگوزاری بۆ دەڤەرێ، رازیبوون ل سەر چێكرنا جادەیەكا پیادە هاتیە كرن كو دێ ل دور ئامێدیێ زڤریت، زێدەباری دێ گەشتیاران گەهینتە جهێن گوزاری و شوونواری و دێ روویەكێ جوان ژی دەتە باژێرێ ئامێدیێ و بۆ ئەنجامدانا ڤی پرۆژەی كۆژمێ دو ملیار و 500 ملیون دیناران هاتینە تەرخانكرن.
وارشین سەلمان دەڤەردارێ ئامێدیێ بۆ رۆژناما ئەڤرۆ دیار كر، پرۆژێ چێكرنا رێیا پەیادە یا ل دور ئامێدیێ ئێكە ژ وان پرۆژێن گرنگێن دەڤەرێ و ئەڤ پرۆژیە دبیتە پرۆژیەكێ گەشتیاری و شوونواری و چەندین جهێن شوونواری یێن كەڤنار و دیروكی یێن ئامێدیێ دێ پێكڤە گرێدەت و گۆت: ئەڤ جادەیە دێ ل دور ئامێدیێ زڤریت و هەر ل قوتابخانا قوبەهان تا دگەهیە دەرگەهێ كەڤنێ ئامێدیێ (دەرگەهێ مووسل) و چەندین جهێن دێ یێن شوونواری دێ پێكڤە گرێدەت.
ناڤهاتی دیار ژی كر، زێدەباری ڤێ یەكێ دێ بیتە پرۆژیەكێ گەشت و گۆزاری و گەشتیار و خەلكێ دەڤەرێ ژی دێ شێن وەك جهێن بهێنڤەدانێ و هەروەسا بوراندنا دەمی و جهێن پیاسە و خوە هەتا بۆ وەرزشكرنێ مفای ژێ وەگرن.
دەڤەردارێ ئامێدیێ گۆت: ژ بۆ ئەنجامدانا ڤی پرۆژەی كۆژمێ 2 ملیار و 500 ملیون دیناران هاتینە تەرخانكرن و نوكە هاتیە رەوانەكرن بۆ بەلێندەرەكی، دەسپێكرنا ڤی پرۆژەی ژی دێ ل دووڤ رەوشا سەقای دمینت. تەكەز كر، هەر دەمەكێ كەش و هەوا یێ گونجایی بیت دێ ئەڤ پرۆژەیە كەڤیتە د وارێ بجهئینانێ دا.
ئەنجامدانا ڤی پرۆژەی ژی تا رادەیەكی بوویە جهێ كەیفخوەشیا خەلكێ دەڤەرێ ژبەر كو زێدەباری مفا وەگرتن بو گەشت و گۆزارێ دێ ژلایێ چاندنێ ڤە ژی مفا ژێ هێتە وەرگرتن و دێ رێیا جوتیاران بۆ ناڤ رەز و باغێن وان نێزیك و ئاسان كەت.
كاوە ئامێدی وەك ئێك ژ ئاكنجیێن سەنتەرێ دەڤەرداریا ئامێدیێ بۆ رۆژناما ئەڤرۆ دیاركر، ئەنجامدانا ڤی پرۆژەی دێ گەلەك گرنگیا خوە هەبیت بو خەلكێ ڤێ دەڤەرێ و گۆت: ئەڤ پرۆژەیە دێ د وارێ گەشت و گۆزاری دا گوهورینەكی ل سەنتەرێ ئامێَدیێ ئەنجام دەت، چونكە زێدەباری ئەڤ رێیە دێ جوانیەكێ دەتە باژێرێ ئامێدیێ و دێ گەشتیاران ژی ب جهێن گوزاری و هەروەسا دێ ب جهێن شوونەواری ڤە گرێدەت وەك قوتابخانەیا قوبەهان و هەروەسا دەرگەهێ ئامێدیێ و چەندین جهێن گۆرزاری یێن دیتر.
دیاركر ژی كر، ئەڤ پرۆژیە دێ بیتە ئەگەرەك بو دیتنا دەلیڤەیا كاری بو چەندین گەنجان و ئەڤە ژی جهێ دلخوشیێ یە بو هەموو خەلكێ دەڤەرێ ب گشتی و ئەڤە خەونەك بوو بۆ مە و جهێ دەستخوەشیێ بۆ حوكمەتا هەرێما كوردستانێ و هیڤیا مە ئەڤ پرۆژێن ب ڤی رەنگی د بەردەوام بن.
ئەندازیار ئەڤراز حەسەن سەرۆكێ باژێرڤانیا ئامێدیێ بۆ رۆژناما ئەڤرۆ دیاركر، ئەڤە پرۆژەیەكێ گەشتیاری یە و رێیەكا پیادەیە و ب تنێ بۆ پیانە و گۆت: درێژاهیا ڤێ رێكێ 3700 میترن و ب فرەهیا 4 میتران دێ ل دوور ئامێدیێ زڤریت و زێدەباری قوتابخانا قوبەهان.
دیار ژی كر، ئەڤ رێیە دێ ب بەرێ بازی هێتە چێكرن ب رەنگەگێ بازنەیی و ئاڤ و كارەب و جهێن بهێنڤەدانێ ژی تێدا هەنە و ئەڤ پرۆژەیە ژلایێ رێڤەبەریا گشتی یا باژێرڤانیێن پارێزگەها دهوكێ ڤێ دێ هێتە سەرپەرشتیكرن.
ژلایێ خوە ڤە حەمید محەمەد سالح رێڤەبەرێ گەشت و گۆزارا ئامێدیێ بۆ رۆژناما ئەڤرۆ دیاركر، پرۆژیێ چێكرنا ڤێ جادیێ دێ ژلایێ گەشت و گوزاری ڤە گەلەك مفا ژێ هێتە وەگرتن و گۆت: ژبەر كو ئەڤ رێیە دێ ل دوور ئامێدیێ زڤریت، دێ گەلەك جهێن شوونواری پێكڤە گرێدەت و هەروەسا دێ هند جهێن بهێنڤەدانێ دگەل دا هێنە چێكرن و ب ڤێ یەكێ ژی هەم گەشتیار و هەم ژی خەلكێ دەڤەرێ دێ مفای ژێ وەرگرن و هەروەسا خوە هەتا بۆ وێنە گرتنێ دێ مفا ژێ هێتە وەرگرتن، چونكە ئەو دكەڤیتە بەرامبەر سیلاڤێ و چیایێ بشێشی و گارەی و چەندین جهێن دیتر.
