رێیەکا نوو ژ کێڤلا بۆ گوندسێن پشت سکرێ دھۆکێ دێ ھێتە چێکرن
ئەڤرۆ:
ل دووڤ راسپاردێن د. عەلی تەتەر، پارێزگارێ دھۆکێ بۆ ئامادەکرنا ڤەدیتنەکێ بۆ چێکرنا رێیەکا نوو ژ (کێڤلا بۆ تەحا و مشارا گوندێن پشتا سکرێ دھۆکێ) دھێتە بەرھەڤکرن، بۆ ڤێ مەرەمێ ژی تیمەکێ ئەندازیاری یێ بسپۆر و شارەزا د بیاڤێ چێکرنا رێک و پران دا، کو ژ رێڤەبەر و ئەندازیارێن رێک و پران و ئەندازیارێن پلاندانانێ ل پارێزگەھا دھۆکێ پێکھاتبوو، ل رۆژا ٢٧/٢/٢٠٢١ سەرەدانا جھێ ناڤبری کربوو و ژ نێزیک سەحکرە سەمتا رێیا (کێڤلا سەرێ تەحا – لیناڤا) ب درێژیا (٩)کم.
ئارمانج ژ چێکرنا رێیا نوو ئەوە فشارا ھاتنوچوونا ترۆمبێلان ل سەر رێیا گەلیێ دھۆکێ بھێتە کێمکرن، نەخاسمە د رۆژێن بێھنڤەدان، ھەلکەفت، دەرکەفتنا وەلاتیان دا بۆ گەشت و سەیرانان.
ھەروەسا سەنتەرێ باژێرێ دھۆکێ ب گوندێن دەروبەرێن سکرێ دھۆکێڤە بھێنە گرێدان و بزاڤا گەشتیاری ژی بھێتە خۆرتکرن و ئاسانکرن.
ھەژی گوتنێ یە ل دووڤ پلانا کابینا نەھێ یا حکومەتا ھەرێما کوردستانێ بۆ خوشکرنا رێک و پران و ئاسانکرنا ھاتنوچوونا گشتی و ل دووڤ فەرمانا پارێزگارێ دھۆکێ ئەڤ پرۆژە پێشتر ژلایێ لیژنا پلاندانانا پرۆژێن ستراتیژی و گرنگ ھاتیە دیارکرن، ھەروەسا چەندین پرۆژێن دی ژی ھاتینە بەرھەڤکرن بۆ وێ یەکێ داھاتێ ناڤخویی بھێتە زێدەکرن و دەلیڤێن کاری ژی پتر بۆ وەلاتیان بھێنە دابینکرن.
