رەحیم عەبوودی: مالكی و عەبادی و سوودانی بۆ پۆستێ سەرۆك وەزیران بەربژارن
سەركردەیەكێ رەوتێ حیكمە یێ نیشتمانی كو عەمار ئەلحەكیم سەرۆكایەتییا وێ دكەت راگەهاند، هەڤڕكی ل سەر پۆستێ سەرۆك وەزیرێن داهاتیێ ئیراقێ د ناڤبەرا سێ كەسایەتییاندا هەیە، هەڤدەم رەتكر هیچ پارچەبوونەك د ناڤ چارچۆڤەیێ هەماهەنگیێدا هەبیت.
رەحیم عەبوودی، سەركردە ل رەوتێ حیكمە یێ نیشتمانی گوت» نوكە دیارترین ئەو ناڤێن وەك بەربژار بۆ پۆستێ سەرۆك وەزیرێن داهاتیێ ئیراقێ هەر ئێك ژ نووری مالكی، حەیدەر عەبادی و محەمەد شیاع سودانی نە».
سەبارەت دەنگوباسێ هەبوونا ناكۆكیێ د ناڤبەرا ئالیێن شیعیدا، عەبوودی رەتكر هیچ پارچەبوونەك د ناڤ چارچۆڤەیێ هەماهەنگیێدا هەبیت و ئاماژە ب وێ چەندێ كر كو ئەو ل سەرخوە پێنگاڤان د هاڤێژن بۆ كۆمكرنا هەموو ئالییان، ب ئارمانجا دیاركرنا بەربژارەكێ ب هێز كو شیانێن بڕێڤەبرنا قووناغا داهاتی هەبیت».
وی سەركردەیێ رەوتێ حیكمە دووپاتكر كو قووناغا داهاتی یا پڕە ژ ئاستەنگان و پێدڤی ب حوكمەت و جڤاتەكا نوونەران یا ب هێزە.
دیاركر ژی» بلا دیمەنێ ئەوا ل ڤەنزوێلا روودای ل بەرچاڤێ مەبیت، هەر پێنگاڤەكا شاش دبیت ئیراق ژی ب وی ئاقاریدا بچیت، لەوما دڤێت گەلەك ب هووری ئەو كەسە بهێنە دیاركرن كو هەژی بڕێڤەبرنا ڤێ قووناغێ بن».
