رەشید بابەشەهابی: موزیكا كوردی ل رۆژهەلاتێ كوردستانێ د ئاستەكێ باش دایە
زنار تۆڤی:
رەشید بابەشەهابی، مۆزیكژەنە و خەلكێ باژێرێ سنەیە ل رۆژهەلاتێ كوردستانێ و د ژییێ 48 سالیێ دایە، بۆ ئەڤرۆ دبێژیت: د ژییێ 15 سالیێ د وارێ هونەری دا كاركریە و ئامیرێ كەمانچێ دژەنیت و ئەڤە 28 سالە د وارێ مۆزیكێ دا كاردكەت و ل زانكۆیا تەهرانێ خواندیە، نوكە مامۆستایێ ئامیرێ كەمانچێ یە ل باژێرێ سنە، ل پەیمانگەها هونەرێن جوان، هەروەسا چار سالان سەرپەرشتێ مۆزیكێ بوویە ل زانكۆیا كوردستان، ب رێیا هونەرێ خۆ ئەز خزمەتا گەل و وەلاتێ خۆ دكەم.
هەروەسا گۆت: هەتا نوكە من چەندین بەرهەمێن مۆزیكێ بۆ چەندین هونەرمەندێن كورد تۆماركرینە و هەتا نوكە من ل گەل چەندین مۆزیكژەنێن كورد كاركریە، هەروەسا مە گرۆپەكێ هونەری ل هامبۆرگ هەیە و مە چەند كۆنسێرت ل ئورۆپا گێراینە، نوكە ژی مە گرۆپەك هەیە ب ناڤێ ئاڤایی شەیدا و ئەم كارێن هونەری ئەنجام ددەین، هەروەسا من دو پەرتووك چاپكرینە د وارێ هونەر و موزیكێ دا.
ل دووماهیێ گۆت: مۆزیكا كوردی ل رۆژهەلاتێ كوردستانێ د ئاستەكێ باشدایە، هەر چەندە دبیت وەكو پێدڤی ئەو شیان لبەر دەستێ هونەرمەند و مۆزیكژەنان نەبن، كو كارێن هونەری یێن باش ئەنجام بدەن، هەورەسا پێدڤییە مۆزیكا هەموو دەڤەرێن كوردستانێ بهێنە كۆمڤەكرن و نۆتێن مۆزیكێ بهێنە نڤێسین و ببنە پەرتووك، چونكی بۆ ئەنجامدانا كارێن هونەری پشتەڤانی دڤێت و ئەو كارێن مە كرین ژی، مە ل سەر كیستێ خۆ كرینە، كەسێ هاریكاریا مە نەكریە، دیسا من هیڤی هەیە، كو مۆزیكا بیانی ب تایبەتی ژی مۆزیكا ئارابێسك و توركی دناڤا مۆزیكا كوردی دا نەبیت، چونكی مە مۆزیكا خۆ یا كوردی هەیە و تام و خۆشیەكا تایبەت د مۆزیكا كوردی یا رەسەن دا هەیە، ل گەل هندێ ژی من ڤیایە هەردەم خزمەتا مۆزیك و هونەرێ كوردی بكەم.
