رەشید جومعە: سەرۆكێ حوكمەتا هەرێمێ خەونا یانەیا دینارتە ب جهـ ئینا
صەباح زوهێر:
د داخویانیەكێ دا رەشید جومعە سەرۆكێ یانەیا دینارتە دیار كر چێكرنا یاریگەها تەپا پێی یا یانەیێ خەونا مەبوو، ئەڤە چەندین سالە ئەم بێ یاریگەه و ئەوا مە هەیی ژی یا خراب بوو، ب خوەشحالیڤە پشتی هاتنا سەرۆكێ حوكمەتا هەرێما كوردستانێ مەسرۆر بارزانی بۆ قەزا ئاكرێ ئەڤ خەونا مە بجه ئینا و ئەم دلخوشكرین ب راگەهاندنا جێبەجێكرنا ڤێ یاریگەهێ كو ئەڤە بۆ ماوێ چەند روژایە دەست ب جێبەجێكرنا پروژەیی كریە.
سەروكێ یانەیا دینارتە ئاماژە دا وێ چەندێ كو رەوشا دارایی یا یانەیێ ل ئاستەكێ گەلەك خراب دایە و هەتا نها ژی یانێ هیچ پاسەك بۆ ڤەگوهاستنا یاریزانان نینە، چەندین قەر ل سەر مە هەنە و د شیا ندا نینە ئەدا بكەین و گۆت ژی: بۆ دابینكرنا ترۆمبێلا پاسێ بۆ یانێ مە ئەڤ گازندە گەهاندییە لایەنێن پەیوەندیدار، لێ هەتا نها بوو مە نەهاتیە دابینكرن و ئەڤ هاتن و چوونە ژی بوومە بارگرانیە و پارە دهێتە خەرج كرن، چونكی ئەو پارێ نها بۆ مە دهێتە دان گەلەك یێ كێمە تێرا پێدڤیێن مە ناكەت لەوما داخوازێ ژ لایەنێن پەیوەندیدار دكەین رێكە چارەیەكێ ببینن بۆ باشتركرنا رەوشا دارایی یا یانەیا دینارتێ.
رەشید جومعە ئەو چەندە ژی گۆت: داهاتێ مە تنێ دو ملیۆن دینارێن ئیراقی نە كو ژلایێ پارێزگەها دهۆكێ ڤە دهێتە دابینكرن، ئەڤە ژی پارەكێ زورێ كێمە، لێ پلانەك هەیە و داخواز ژمە كرییە كو هژمارەكا بانكی چێكەین و مە ئەڤ پێنگاڤە ژی هاڤێتیە، چونكی پلان دایە كو وەزارەت سالانە بڕە پارەیەكێ ب رێكا هژمارا بانكی بۆ مە دابین بكەت.
