رەشید سندی.. مێژووەک د دیدارەکێ دا
ديدار، سالار محةمةد دؤسكى:
2-2
وی دەمی ئەز بەرپرس بووم ل گەل هێرشا بوو چوونا ناڤ بارەگایی لەشكرێ ئیراقێ، ل دەڤەرا ناڤبری، دەمژمێر 30و 9 شەڤ مە (10) ئارپیچی دانانێ وی دەمی دیوارێ فەوجێ یێ بەرابوو هەر ژبن هاتە هاڤێتن و هێرشێ دەست پێكر، چەند سەركردێن پێشمەرگەی ل گەل (محەمەد حەسەن محەمەد سەلیم بەرواری) هێرش كرن و چوونە ناڤ فەوجێ، هاریكارێ (عەبدوالرحیمی) بوو (عەزیز گەراڤی) پێشمەرگەكێ گەلەك زیرەك بوو وی شەری دا گەلەك توپ هاتنە هاڤێتن و هەتا لەشكرێ ئیراقێ شكەستی و گەلەك ژێ هاتنە كوشتن، و یێ مای ژی جهێن خوە هێلان و دەست ب رەڤینێ كر و گەلەك ژ لەشكری خوە رادەستی پێشمەرگەی كرن، دووڤدا شەش حەفت دەبابە ل مە پەیدا بوون و هاڤێتە مە ل گەل دوشكان و گەلەك پێشمەرگە شەهید و بریندار كەفتن و ئەم شكەستین و نەچار بووین ژ ناڤ مەعسكەری دەركەفتین، و ئەڤە دهێتە هژمارتن ژ شەرێن نەخوشێن شۆرەشا ئیلۆنا مەزن كو تێدا پشكدار ببووم، چونكە گەلەك شەهید مەدان و گەلەك بریندار ژی كەفتن و ئەڤە جارا ئێكێ بوو ل شۆرەشا ئیلۆنێ پێشمەرگە بڤی رەنگی هێرشێ بكەت و بچیتە دناڤا مەعسكەری دا.
فەرماندە رەشید سندی گۆتژی: شەرێ (پیرەمەگورن و دولا شەهیدا) ژ شەرێن هەرە مەزن بوون ل شۆرەشا ئیلۆنێ كو دڤێت چ جاران نەهێنە ژبیكرن، ئەڤ شەرە بۆ ئەگەر حوكمەتا ئیراقێ بهێـە نەچاركرن و بهێتە ئاشێ هوویر ل گەل سەركردایەتی یا كوردستانێ، و داخوازا دانوستاندنێ بكەت، و ببیتە ئەگەرێ رێككەفتنا 11 ئادارێ ل سالا 1970 ژدایك ببیت، وی شەری (عومەر ئاغایێ دولەمەری) سەرپەرشێ شەری (دولا شەهیدا) بوو و زێرەڤانێن خودێ ژێ رازی (مەلا مستەفا بارزانی ) ئەوان هێرش كر، و گەلەك ژێ كوشتن و گەلەك دوژمن كەفتە دەستی و گەلەك دەست كەفتی ب دەست ڤە هاتن، شەرێ (پیرەمەگورن) بەرپرسێ وی شەری ئەز هاتبوومە دانان و (سەبری عەبدوالرحمان) ئامر بەتلیون گەلەك ل گەل مە بوون، و دەڤەرا (پیرەمەگرون) ئەو چیایێ دچیت هەتا دگەهیتە (دوكان) ژ سپێدێ هەتا ئێڤاری ژ دوژمنی هاتە پاقژكرن، و گەلەك دەستكەفتی ب دەست ڤە هاتن و تەرمێ گەلەكا نەشیان ل گەل خوە ببەن و مابوونە جهێ شەری دا، ئەو ژێ شەرێ سالا 1969ێ بوو و ئەڤ هەر دو شەرە ئەگەرێن سەرەكی بوون كو حوكمەتا ئیراقێ شكەستنێن مەزن ل سەر دەستێ پێشمەرگەی و هزكا مەزن بۆ هێزا كوردی بینیت.
رەشید سندی زێدەتر گۆت: بوومە ئامر بەتلیۆن و دووڤدا بوومە ئامر هێز و دووڤدا بوومە سەركردێ لەشكرێ دو یێ پارێزگەها هەولێرێ، و دووڤدا بوومە بەرپرسێ نڤێسینگەها لەشكری یێ هەمی پێشمەرگەی ژ زاخۆ هەتا خانەقین.
هەمان فەرماندێ پێشمەرگێ كوردستانێ ل شۆرەشا ئیلۆنێ گۆت: دەمێ سەركەفتین ل شەرێ (پیرەمەگرون) گەلەك كەیفا من هات و دلێ من گەلەك پێ خوش بوو و بەری ببیتە بەیانا 11 ئادارێ وی دەمی ئامر هێزێ پێشمەرگەی بووم ل (گلالە) و خودێ ژێ رازی (مەلا مستەفا بارزانی) خواستم سەرەدانێ بۆ بكەم، و دەمێ چوویم گۆتی دێ شاندەكێ حوكمەتا ئیراقێ هێتە ڤێرە ئەڤجا دڤێت توژی پشكداری شاندێ سەركردایەتی یا كوردستانێ بی و پشكداری دانوستاندنا بكەی، و فەرماندە (عەلیێ خەلیل) ژی وی دەمی بەرپرسێ هێزا دهۆك بوو ل دەڤەرا دۆسكیا ئەو ژی هاتە داخوازكرن، كو پشكداری دانوستاندنا ببیت و هەمان دەم (عەبدوالرزاق ئەتروشی) هاتەگازیكرن بۆ هەمان شاند وی دەمی ل دەڤەرا (هەورمان) بوو، ئەم هەر سێ ئامر هێز ل سەر فەرمانا خودێ ژی رازی (مەلا مستەفا بارزانی) بۆ شاندنێ كوردستانی یێ دانوستاندنێ ل گەل مەكتەبا سیاسی ئەم ل گەل حوكمەتا ئیراقێ كۆمبووین، وی دەمی سەرۆكێ شاندنێ حوكمەتا ئیراقێ (سەددام حسێن) بوو و ئەڤە ل بەیانا 11ی ئادارێ بوو، بیرا من دهێت ئێك ژ ئەندامێن شاندێ ئیراقێ دگۆتنێ (عەبدوللا فەیاز) ئەندامێ قیادا قوتری یا حزبا بەعس بوو، و ئەم دكومبوونێ دا بووین و كومبووون ب سەر پەرشتیا (مەلا مستەفا بارزانی ) و (سەددام حسێن) بوو و ئەندامێن مەكتەبا سیاسی یا پارتی دیموكراتی كوردستان و قیادا قوتری یا حزبا بەعس تێدا دپشكداربوون، و دانوستاندن ل سەر بەیانا 11ی ئادارێ وی دەمی نێزیكی (40) كەسان بووین ژ هەر دو ئالیان و زێدەتر ئەندامێن دانوستاندنا ژ هەر دو شاندا سیاسی و لەشكری بوون، و كومبوون ل (قەسر سەلام) بوو و گەنگشە یا بەردەوام بوو، (عەبدوللا فەیاز) ئەندامێ شاندێ ئیراقێ گۆت كەركووك یا عەرەبییە، و ئێكسەر (مەلا مستەفا بارزانی) رابوو و گۆت مادەم هوون دبێژن كەركووك یا عەرەبییە ئەەم نارونەخوار و ژ كومبوونێ دەركەفت، و ل گەل دەركەفتنا وی ئەم هەمی شاندێ كوردستانی دەركەفتین و كاودان تێكچوون، و هەمان دەم (سەددام حسێن) ژی دەركەفت و هاتە بەرامبەر (مەلا مستەفا بارزانی) و گۆتێ بەختێ تە و خودێ دا بزڤر ڤە بلا بەس بیت، كوشتنا كورد و عەرەبا و بلا بەس ئێكودو بكوژین، ئەوی (عەبددوللا فەیاز) ئاخفتنەك بخوە گۆت و ئەو بۆچوونا وی یە و دەربرینێ ژ شاندێ مە ناكەت، و دەمێ ئەڤ ئاخفتنە گۆت ( مەلامستەفا بارزانی) ڤەگەریا دانوستاندنان ڤە، و شاندێ كوردستانی رونشتە خوار و (سەددام حسێن) دووبارە ئاخفتنا خوە گۆت: كو ئەو بتنێ بۆچوونا كەسوكی یە و دەربرینێ ژ شاندنێ حوكمەتا ئیراقێ و سەركردایەتی یا ئیراقێ ناكەت، و ئەم نابێژین كەركووك یاعەرەبییە، وی كەسی سەرێ خوە شوركر.
فەرماندێ پێشمەرگەی ل شۆرەشا ئیلۆنێ ئەو ژی گۆت: مە گەلەك شەر كرین ل شۆرەشا ئیلۆنێ وەك شەرێ چیایێ (سەفین) دیسا شەرێ خانەقین وی دەمی مە لەشكرێ ئیراقێ ئاسێ كر بوو و گەلەك ژێ هاتنە كوشتن و گەلەك هاتنە دەستەسەركرن، شەرێ (دۆزخۆرماتوور) وی دەمی (عەریف سلو و خالد سندی و عەلی ناسر) و گەلەكێن دی ژی پشكداربوون مخابن بیرامن نەماینە و گەلەك شەرێن ژی .
ل دووماهیێ فەرماندێ پێشمەرگەی گۆت: شەرمزاری یە بوو مە كوردان ڤێ قوناغێ ئەم دبێ تفاق بین یا هاتیە سەرێ مە كوردان نەهاتیە سەرێ چ مللەتان، ئەم هاتینە كێمیا بارانكرن و قڕكرن و دڤێت ئەم هەمی ببینە ئێك و تفاق و كورد ل هەر چار پارچێن كوردستانێ ئێك بگرن، دا مافێن مللەتێ كورد بهێنە پاراستن، كورد (50) ملیون كەسە و بتنێ نەتەوەك مایە ل جیهانێ دا هەتا نوكە نەبوویە دەولەت، و گوهداری یا دوژمنان نەكەن و خو نەترسینن ژ دوژمنان ببنە تفاق و داخازا مافێن خوە بكەن.
