رەشید سندی.. مێژووەک د دیدارەکێ دا
ديدار، سالار محةمةد دؤسكى:
1-2
ئێك ژ فەرماندەیێن پێشمەرگەیێ كوردستانێ ل شۆرەشا ئیلۆنێ ئاشكراكر، كو شۆرەشا ئیلۆنێ هێزا پێشمەرگەی ل گەلەك شەران حوكمەتا ئیراقێ شكاند و نەچار كر ل گەل سەركردایەتی یا كوردستانێ دانوستاندنێ بكەت، د هەمان دەمدا ئەو ژی ئاشكرا كر كو د كومبوونێن دانوستاندنێ دا ل گەل بەغدا بەرهەڤ ب بوو، و سەرۆكێ شاندنێ ئیراقێ یێ وی دەمی سەددام حسێن گەلەك ژ مەلا مستەفا بارزانی خواست بزڤڕیتە كومبوونێ و گۆت ئەم نابێژین كەركووك یا عەرەبییە.
فەرماندەیێ پێشمەرگەیێ كوردستانێ ل شۆرەرشا ئیلۆنێ رەشید سندی، د دیدارەكێ دا ل گەل رۆژناما ئەڤرۆ گۆت: ئەو دەرچوویێ كولیژا لەشكری یا شاهانە بووم ل بەغدا ل سەر دەمێ شاه (فەیسەلێ دووێ) ل سالا 1957ێ دەرچووم، و باوەرنامە ل سەر دەستێ شاهێ ئیراقێ من وەرگرت، دووڤدا پشكداری دو خولان بووم ل (رەشید و مویسل) و من دەوام ل مویسل دكر، ل دەسپێكا هەیڤا ئادارێ ل سالا 1963 گەهشتمە ناڤ رێزێن شۆرەشا ئیلۆنا مەزن وی دەمی ژیێ من (32) سال بوو.
رەشید سندی هەروەسا گۆت: بنەمالا مە رۆلەكێ مەزن هەبوو دبزاڤا رزگاری خوازا مللەتێ كورد دا و دیسا بابێ مە (حەجی بەدری ) گەلەك پشتەڤانێ خواندنێ بوو و هەر دەم ڤیا ئەم بخوینین، برایێ منێ مەزن (محەمەد شەریف) و (سلێمان حەجی بەدری) رۆلەكێ مەزن هەبوو دشۆرەشا كوردی دا و بابێ مە پشتەڤانیا مە دكر بۆ خواندنێ وی دەمی خەلكی گۆت بلا زارۆكێن تە هاری تە بكەن، و نەدانە بەر خواندنێ و بابێ من گۆتێ هوون خەلەتن و زارۆكێن خوە فرێكەنە بەر خواندنێ و بلا فێربن و فێری زمانی بن، وی دەمی خەلكی هزر كر هەر كەسەكێ زارۆكێن خوە فرێكەتە بەر خواندنێ دهێتە خڕاندن، و بەرۆڤاژی بنەمالا مە و تایبەت بابێ من گەلەك پشتەڤانیا مە دكر بۆ خواندنێ.
فەرماندە رەشید سندی زێدەتر دیاكر: پشتی چوویمە ناڤ رێزێن شۆرەشا ئیلۆنێ و ئێكەم شەرێ پشكداربوویم ل شۆرەشا ئیلۆنێ شەرێ (شیڤە شوورێ) بوو دگۆتنێ وێ دەڤەرێ (ئومەرمەندان) كو دكەڤیتە د ناڤبەرا (تەق تەق و كەركووكێ) دا بوو، وی دەمی لەشكرێ ئیراقێ ژ كەركووكێ هات هنداڤ (ئومەرمەندان) مە دگۆتێ (كەرێ سمائیل بەگیێ) وی دەمی لەشكرێ ئیراقێ ئەو دەڤەر گرتن و چەكەكێ گەلەك مەزن ئینا و مە لێدا ژ سپێدێ هەتا مەغرەب شەر بوو، وی دەمی دو ئومبلانسا خوە سپێدێ هەتا شەر ب دووماهی هاتی (12) جاران هاتن و چوون دكر و بریندار و كوشتی دگەهاندە كەركووكێ، دووڤدا مە پرسیار كر چونكە وی دەمی مە رێكخستیێن نهێنی هەبوون، و دیاربوو كو وی شەری دا (106) كەس ژ لەشكرێ ئیراقێ هاتبوونە كوشتن و پێشمەرگەی (6) شەهید هەبوون و چەند كەسەك بریندار بوون.
فەرماندە رەشید سندی دوپاتكر: دەمێ شەرێ (مەتینا) وی دەمی ئەز ل دەڤەرێن (هەولێر و كەركووكێ و سلێمانیێ) بووم، ئەز نە ل دەڤەرا بەهدینان بووم و دەسپێكێ پێشمەرگە شكەست چونكە نەیێ بەرهەڤ بوو، و ئەڤ شەرە ژ نیشكەكێ ڤە بوو و لەوما پێشمەرگەی ل دەسپێكێ شكەستن ئینا، وی دەمی (ئەسعەد خۆشەڤی) فەرماندێ دەڤەرا بەهدینان بوو، وی شەری دا كورێ خودێ ژێ رازی (عیسا سوار) شەهید بوو، (سلێمانێ حاجی بەدری ) یا ل دەڤەرا زاخۆ ب (150) كەسان ڤە چوو شەرێ (مەتینا) (عەلی هالو بوصەلی سندی) ئەو ژی ب (150) پێشمەرگا ڤە ژ زاخۆ بەر ب شەری چوون، دناڤا دۆسكیا (فەیسەلێ حەسەن نزاركی و فارس كورەماركی، عەریف سلێمان) ب هێزەكا مەزن ڤە چوونێ ، و پێشمەرگە ب سەر چیای كەفتن و لەشكرێ دوژمنی شكەست و چیایێ مەتینا پاقژ بوو و پێشمەرگە سەركەفتن.
فەرماندێ ناڤهاتی گۆت: بیرا من دهێت ل شۆرەشا ئیلۆنێ گەلەك جاران (دێوالیێ سەعید ئاغا)ی هاریكاریا پێشمەرگەی كریە، ب تایبەت ل دەڤەرا بەهدینان و گەلەك جاران حوكمەتێ رێ دگرتن و نەدهێلا خەلكێ گوندان بهێتە ناڤ باژێری بخوە تشتی بكریت یان بەرهەمێ خوە ب فرۆشیت، و (دێوالی ئاغا دۆسكی) بریار دا كو هاریكاریا وی خەلكی بهێتەكرن و ب شەڤ رێك بۆ هاتنە ڤەكرن، و خەلكێ دەڤەرا سندی و گولیان و بەرواری و دوسكی و هەمی دەڤەرا گەنم و جەهێ خوە دئینا و هاتنە ناڤ باژێری و بەرهەمێ خوە دفرۆشت، دیسا گەلەك جاران من ب چاڤ دیتی یە خودێ ژێ رازی (دێوالیێ سەعید ئاغا)ی هاتیە دەف رەحمەتی (مەلا مستەفا بارزانی) ل گەل روینشتی یە.
فەرماندەیێ لەشكریێ شۆرەشا ئیلۆنێ زێدەتر دیاكر: ل شۆرەشا ئیلۆنێ دەمێ پشكدار بوویم شەرێ ژ هەمیان بزحمەت تر ل سالا 1968ێ شەرێ (دوكان) بوو، سەركردایەتی یا كوردستانی بریار دا قەزا (دوكان) بهێتە دروپێچكرن، دا بەغدا سەنگ و هێزا سەركردایەتی یا كوردی بزانیت، بۆ وی شەری ئەز و (موقدەم عەزیز ئاكرەیی) بۆ وی شەری هاتینە راسپاردن، سەركردایەتیێ خواست پێشمەرگەی بەرهەڤ بكەین، بۆ ئەنجامدانا وی شەری ڕاهێنانا پێ بكەین، وی دەمی سەرپەرشتێ هێزا هەلگورد خودێ ژێ رازی (ئدریس بارزانی) بوو، و مە هێزا هەلگورد بۆ وێ هێرشێ بەرهەڤكر و مە (40) رۆژا راهێنان ب پێشمەرگەی كرن، و هەتا دەمێ هێرشێ هاتی و بەری شەر دەست پێ بكەت، مە دیفچوونا كاودانێن دەڤەرێ و فەوجا (دوكان) كر، كا هێرشا پێشمەرگەی ل چ دەڤەر دا دەرباز بیت و پلانا خوە مە دروست كر و بەرهەڤیێن گەلەك باش بۆ هێرشێ هاتنەكرن، مە ژ هەمی روویەكی ڤە بەرهەڤیێن باش كرن، و مە گەلەك خوە نێزیكی دەڤەرێ كر، پلانا شەری هوسا هاتەدانان كو هێرشا پێشمەرگەی بۆ سەر (دوكان) ب شەڤ بیت و نە تەڤەكا هەیڤێ یا رون بیت و نەیا تاری بیت، و ئەڤە ب وێ مەبەستێ بۆ دا پێشمەرگە نەكەڤیتە ناڤ زەڤیا ئەلغاما و دیسا دا بشێن رێكا هاتن و چوونێ ببینین، وی دەمی (عەلیێ خەلیل) بەرپرس بوو ل سەر چوار توپێن (120) ملم.
