رەوشا هونەرێ كوردی ل باكۆرێ كوردستانێ د ئاستەكێ خراب دایە
ئەڤرۆ
زنار تۆڤی:
سترانبێژ ئەمراه كورد، د دیدارەكێ دا بۆ رۆژناما ئەڤرۆ دیاركر كو ئەو خەلكێ باژێرێ سەرحەدێ یە ل باكۆرێ كوردستانێ و ئەڤە هەژدە سالن ئەو سترانان دبێژیت و هەتا نوكە كلیپەك بەلاڤكریە و یێ بەرهەڤیان بۆ تۆماركرنا سترانەكا نوو دكەت، ژ پەیڤ و ئاوازێن وی ب خوەنە، ل گەل هندێ ئەو ئامیرێ سازێ ژی دژەنیت، ژبەر دەست كورتیا بارێ ژیانێ هەتا نوكە وی چو ئەلبۆم بەلاڤ نەكرینە و حەز دكەت ئەلبۆمەك هەبیت.
ناڤهاتی گۆت: نوكە رەوشا هونەر و سترانا كوردی ل باكۆرێ كوردستانێ د ئاستەكێ خراب دایە، چونكی دەولەتا تورك سانسۆر دانایە سەر سترانێن كوردی و هەموو دەزگەهێن راگەهاندنێ یێن كوردی گرتینە، لەوما ئەم كارێن خۆ یێن هونەری ب رێیا سۆشیال میدیایێ بەلاڤە دكەین، سەرەرایی هەبوونا ئاستەنگان ل هەمبەری كارێ مە، بەلێ مە دەست ژ هونەرێ كوردی بەرنەدایە، هەروەسا هەڤكاری دناڤبەرا مە و هونەرمەندێن تورك ژی هەیە و ئەم هاریكاریا هەڤدۆ دكەین
لێ ئەز نە یێ گەشبینم كو رەوشا هونەرێ كوردی ل باكۆرێ كوردستانێ باش ببیت، ژبەركو دەولەتا تورك گەلەك ئاستەنگان ل پێشییا هونەرێ كوردی دروست دكەت، ڤێ چەندێ وەكریە، كو هونەرمەندێن مە نەشێن وەكو پێدڤی سترانێن كوردی بێژن، بەلێ بزاڤێن واند بەردەوامن و وان خۆ ل زمان وكلتۆرێ كوردان كریە خودان.
