زاخۆ به‌رده‌وامه ل سه‌ر گوهۆڕینان
ئه‌ڤرۆ، زاخۆ، عه‌لی حاجی
د داخویانیه‌كێ دا سه‌رپه‌رشتێ تیما ته‌پا پێی یا یانا زاخۆ دیاركر ئه‌و به‌رده‌وامن ل سه‌ر گوهۆڕینان و سێ یاریزان دوورخستینه و دێ سێیێن دی ئینن خوه به‌رهه‌ڤكرن بۆ وه‌رزێ نوو یێ خولا پلا نایابا ئیراقێ.
زێده‌تر نوعمان كۆچه‌ر بۆ رۆژناما ئه‌ڤرۆ گۆت:ل دووڤ پلانا باشترین به‌رهه‌ڤی ئه‌م به‌رده‌وامین ل سه‌ر هێزكرنا ئاستێ تیما خوه بۆ وه‌رزێ نوو یێ خولا نایابا ئیراقێ و هه‌تا نوكه شه‌ش یاریزان ژ تیمێ هاتینه دوورخستن و گرێبه‌ست ل گه‌ل چار پیشه‌كاران هاتیه ئیمزاكرن ژوانا یێ به‌رازیلی جۆناتا سانتۆس ئه‌ڤچه‌نده ژی پێخه‌مه‌ت چاره‌سه‌كرنا ئه‌وان كێماسیێن دناڤ رێزێن تیمێ دا هه‌ین و بڕیاره دڤێ حه‌فتیێ دا سێ یاریزان بهێنه دوورخستن ئه‌و ژی گۆلپارێزه‌كیه پشتی هاتنا محه‌مه‌د سالح، دیسان یاریزانه‌كێ هێلا به‌ره‌ڤانیێ و ئێكێ هێرشبه‌ره، لێ هه‌كه مه چو پێگهۆرێ وان نه دیتن نه‌چارین وان یاریزانان بهێلین و ده‌ست ژێ نه به‌رده‌ین تایبه‌ت یێ هێرشبه‌ر له‌وما دڤێ حه‌فتیێ دا دێ چاڤه‌ڕێ بین.
ناڤهاتی ئه‌وچه‌نده دیاركر كه‌مپێ راهێنانێ ل هه‌ولێرا پایته‌خت ب بوو جهێ مفایی و ئه‌نجامدانا یاریێن هه‌ڤالینی د به‌رژوه‌ندیا تیمێ و كادرێ راهێنانێ دا برێڤه‌چوو و گه‌شبینم تیما مه بۆ وه‌رزێ نوو باشتر بیت ژ سالا بوری و دێ هه‌ڤڕك بین.
