زاخۆ به‌رهه‌ڤه سه‌ركه‌فتنا دویێ ل سه‌ر ته‌له‌به بینت
ئه‌ڤرۆ، عه‌لی حاجی:
چاڤه‌ڕێ یه ئه‌ڤرۆ ده‌مژمێر 2:45 پشتی نیڤرۆ تیما ته‌پا پێی یا یانا زاخۆ مێڤانداریا یانا ته‌له‌به یا به‌غدایی بكه‌ت ژ چارچووڤێ قۆناغا 32ێ یا قاره‌مانیا كاسا ئیراقێ ل یاریگه‌ها زاخۆ یا نێڤده‌وله‌تی ب ئارمانجا دوباره سه‌ركه‌فتن كو پشتی ل ئه‌ینیا بوری یا خولا پلا نایابا ئیراقێ شیابوویی ب دو گۆلان بیێ به‌رامبه‌ر سه‌ركه‌فتنێ ل سه‌ر تۆماربكه‌ت.
لدور دووماهی به‌رهه‌ڤیێن تیما زاخۆ ئه‌لند محه‌مه‌د ئه‌ندامێ یانێ بۆ رۆژناما ئه‌ڤرۆ گوت: هه‌موو به‌رهه‌ڤی بۆ سه‌ركه‌فتنێ هاتینه كرن و پشته‌ڤانێن یانێ دێ كارتیكرنا خوه یا ئه‌رینی ل سه‌ر ئاست و ئه‌نجامی مه هه‌بن، گه‌شبینین سه‌ركه‌فتنا خوه یا به‌ری چار رۆژان دوباره لسه‌ر ته‌له‌به بینن، هه‌رچه‌نده یاری ب سانه‌هی نابیت تایبه‌ت یانا ته‌له‌به ژی لسه‌ر پلان و نه‌خشێن راهێنه‌رێ مه دزانن و دێ قه‌ره‌بوویا خوساره‌تیا یاریا خولێ ب كاسا ئیراقێ كه‌ن، لێ راهێنه‌رێ مه عه‌بدولوه‌هاب ئه‌بۆلهێل ژی كار ل سه‌ر هێز و كێماتیێن وان كرینه، یا گرنگ تیما مه د ره‌وش و ده‌رونه‌كێ باش ده‌رباز دكه‌ت و ئۆمێدین ئه‌ڤرۆ به‌رده‌وامیێ بده‌ینه سه‌ركه‌فتنان و ئارمانجا مه د كاسا ئیراقێ دا به‌رده‌وامیا سه‌ركه‌فتنا یه هه‌تا دووماهیێ و پووته‌كێ تایبه‌ت ب ده‌ینه ڤێ قاره‌مانیێ لێ هه‌ڤڕكیێن خولا پلا نایابا ئیراقێ ژی گه‌له‌ك یا گرنگه و دڤێت هزرا وێ ژی بكه‌ین.
لدووماهیێ ناڤهاتی گوت: مه پشته‌كا مه‌زن هه‌یه ئه‌وژی جه‌ماوه‌رێ یانا زاخۆ یه كو كلیلكا سه‌ركه‌فتنا و هێزا یاریزانا یه و ئه‌م چو گڤاشتنێ ل سه‌ر یاریزانێن خوه ژی ناكه‌ین پێخه‌مه‌ت نه‌كه‌ڤنه د چو خه‌له‌تیان دا و ئه‌نجامێن نه چاڤه‌ڕێ كری، لێ گه‌شبینم دێ ئه‌نجامێ سه‌ركه‌فتی ده‌ستڤه ئینن.
