زاخۆ بوو قه‌ره‌بوویا خالان ل كه‌ركووكێ یه
ئه‌ڤرۆ،
فۆتۆ: ئازاد زۆم
دهێته چاڤه‌ڕێ كرن ئه‌ڤرۆ ل ده‌مژمێر چارێ ئێڤاری تیما باسكێت بۆلا یانه‌یا زاخۆ ل باژێرێ كه‌ركووكێ ببیته مێڤانا یانه‌یا نه‌فت ئه‌لشیمال د یاریا خوه یا 15ێ ژ چارچووڤێ هه‌ڤڕكیێن خولا پلا نایابا ئیراقێ و قۆناغا دویێ به‌ر ب ده‌ربازبوون بۆ قۆناغا پله‌یی ئۆڤ ئه‌وا دێ به‌ری وێ ل سه‌ر ئاستێ لاوان ژی ده‌مژمێر دو یێ پشتی نیڤرۆ دناڤبه‌را هه‌ردو یانه‌یان هێته ئه‌نجامدان.
ل دۆر دووماهی به‌رهه‌ڤیێن باسكێت بۆلا زاخۆ جوتیار عه‌لی هاریكارێ راهێنه‌ری بۆ رۆژناما ئه‌ڤرۆ گۆت: د نوكه دا ئه‌م یێن قۆناغه‌كا ڤه‌بڕ و هه‌ستیار دا و دڤێت هه‌ر یاریه‌كا بكه‌ین ژبلی سه‌ركه‌فتنێ چو بژاردێن دی مه نه‌بن پێخه‌مه‌ت بگه‌هینه ئارمانجا خوه، یاریا ئه‌ڤرۆ ل گه‌ل خودانێن ئه‌ردی نه‌فت ئه‌لشیمال ژبلی كو هه‌ڤڕكه‌كا بهێزه لێ دڤێت قه‌ره‌بوویا یاریا بوری بكه‌ین ئه‌وا ل یاریگه‌ها مه‌دا تووشی خوساره‌تیێ كربووین، له‌وما هه‌موو یاریزان ل دووڤ پلانێن تایبه‌ت یێن كادرێ راهێنانێ د به‌رهه‌ڤن ب هیڤی نه سه‌ركه‌فتنا ئێكێ د ده‌ستپێكه‌كا باش یا سالا نوو بینن، سه‌رباری ئه‌ركێ مه ب سانه‌هی نابیت لێ دێ بزاڤێ كه‌ین تایبه‌ت د چارێكێن سێیێ و چارێ دا ئه‌نجامی ئێكلابكه‌ین.
بۆ زانین تیما یانه‌یا زاخۆ ژ 14 یاریان ب 23 خالان ژ نه‌ه سه‌ركه‌فتن، پێنج خوساره‌تیان ل رێزا شه‌شێ دهێت و یانه‌یا نه‌فت ئه‌لشیمال ژ 15 یاریان ب 21 خالان رێزا حه‌فتێ دهێت ئه‌وا یانه‌یا نه‌فت ب 29 خالان سه‌رێ لیستێ پاراستی.
