زاخۆ بەرانبەر شۆرتە دێ بزاڤێن تۆلڤەكرنێ و رێزێن پێشیێ كەت
چاڤەڕێ یە ئەڤرۆ ل دانێ ئێڤاری ل سەر ئاستێ پێشكەفتیان و لاوان هەردو تیمێن باسكێت بۆلا یانەیا زاخۆ دێ مێڤاندارییا تیمێن یانەیا شورتە یا بەغدایی ل هۆلا گرتییا بنگەهێ لاوان كەت ژ چارچووڤەیێ هەڤڕكیێن گەڕا 14ێ ژ خولا پلا نایابا ئیراقێ ب هیڤیێن تۆلڤەكرنێ.
ل سەر ئاستێ پێشكەفتیان تیما باسكێت بۆلا یانەیا زاخۆ ل دەمژمێر چاری ئێڤاری دێ پێشكەفتیێن شورتە مێڤان كەت پشت گەرمییا جەماوەرێ خوە و ئارمانجا سەركەفتنێ و تۆلڤەكرنێ، كوڕێن خابووری د نوكە دا 22 خال هەنە ژ نەهـ سەركەفتن و چار خوسارەتی رێزا چارێ دهێت، بەرانبەر دا شورتە 23 خال هەنە رێزا سێیێ دهێت، د یارییا قۆناغا ئێكێ دا تیما شورتە شیابوو ب ئەنجامێ 59 بەرانبەر 71 خالان سەركەفتنێ بینت، ژلایەكێ دووڤە تیما لاوان دێ ل دەمژمێر دو یێ پشتی نیڤرۆ ل هەمان هۆلا وەرزشی بەرانبەر ئێك یاریێ كەن.
بۆ ڤێ یاریێ و دووماهی بەرهەڤیێن وان ستێرا یانەیا زاخۆ و هەلبژارتیێ ئیراقێ جەگەر عەلی كاپتنێ تیمێ بۆ رۆژنامەیا ئەڤرۆ گۆت: هەرچەندە تا رادەیەكێ مەزن چارگۆشەیا زێرین مە مسۆگەر كرییە، لێ یارییا ئەڤرۆ ب بەرانبەر ئێك ژ بهێزترین تیمێن د خولا ئیراقێ دا یە و هەڤڕكا ناسناڤی یە، ژبەركو تیما شورتە چەندین یاریزانێن خودان شیان یێن هەلبژارتیێ ئیراقێ و پیشەكار هەنە، لێ دێ د ناڤ ئەرد و جەماوەرێ خوە دا كەین ئەڤە ژی پالدەرە كو ب زاخەكا بلند ئاست و هونەرێ خوە باشتر بكەین و بشێن د ماوەیێ هەر چار چارێن یاریێ دا كۆنترۆلا خالان و یاریێ بكەین.
هەروەسان ناڤهاتی گۆت: ڤەگەڕیانا من بۆ ناڤ یاریێ یا د گۆمانێ دا ژبەر هنگاڤتنا من لێ مە كۆمەكا یاریزانێن خودان شیان هەنە كو راهێنەرێ مە پشتبەستنێ ل سەر بكەت تایبەت كوڕێن باژێرێ زاخۆ، و هیڤییا مە ئەوە ئەڤرۆ دلێ جەماوەرێ خوە خوەشبكەین و بەردەوامیێ بدەینە سەركەفتنان.
