زاخۆ دێ نیڤا پێكهاتیێ تیما خوه گوهۆڕیت
زاخو،عه‌لی حاجی
د داخویانیه‌كێ دا ئه‌ندامێ كارگێریا یانا زاخۆ بۆ رۆژناما ئه‌ڤرۆ دیاركر وان شه‌ش یاریزانێن پێشه‌كار ده‌ست نیشان كرینه پشتی د تاقیكرنا راهێنه‌ری دا بسه‌ركه‌ڤن ژ نوو دێ گرێبه‌ستا وان هێته گرێدان.
زێده‌تر دلژار عه‌دنان گۆت: ئه‌وا پێدڤی د یاریێن بوری یا خولا نایابا ئێراقێ دا یاریزانێن تیما مه ئه‌نجامدان و نه‌شێن زێده‌تر ئاستی پێشكێش بكه‌ن، د نوكه دا ده‌رگه‌هێ ڤه‌گوهاستنێن زڤستانی ده‌ستپێكریه و یانا زاخۆ ژ بۆ ده‌ستنیشانكرنا یاریزانێن نوو لژنه‌یه‌ك دروست كرینه ژوانا راهێنه‌ره، هه‌تا نوكه شه‌ش یاریزانێن پێشه‌كار هاتینه ده‌ستنیشان كرن ل دگه‌ل دو یاریزانان گه‌هشتینه رێكه‌ڤتنێ دیسان ل گه‌ل یاریزانێن پێشه‌كار د دانوستاندنێ دانه لێ پشتی د تاقیكرنێ دا بسه‌ركه‌ڤن ژ نوو دێ هه‌ڤبه‌ستا وان هێته گرێدان كو ژ وه‌لاتێن تونس، لیبیا، به‌رازیلی و هنده‌ك وه‌لاتێن ئه‌فریقی نه، هه‌ردیسان گرێبه‌ستا پێشه‌كارێن به‌ری نوكه دگه‌ل تیمێ ئێكلاكرینه و چاڤه‌رێنه مووچه‌یێ خوه وه‌ربگرن و رێزێن تیمێ بجه بهێلن لدووڤ داخوازیا راهێنه‌رێ تیمێ كو ژ ئاستێ وان رازی نه‌بوو.
ناڤهاتی گۆت ژی: ئیداره‌یا سه‌ربه‌خوه‌یا زاخۆ پشته‌ڤانیا خوه دوپاتكریه و میزانیا مه ژی ژ بۆ ئینانا یاریزانێن باشتر بلندتر كریه ژبه‌ر هندێ ژی ئه‌م ل یاریزانێن ئاست بلندتر و ب مووچه‌كێ باشتر دگه‌رین داكو ئاستێ تیما مه باشتر بیت ل دووڤ خاسته‌كا جه‌ماوه‌ری بیت .
ل دووماهیێ دلژار عه‌دنان گۆت: ئه‌م له‌زێ د دوورخستنا یاریزانێن خوه یێن ئێراقی دا ناكه‌ین هه‌تا كو دشێن یاریزانێن ژ وان باشتر ل جهێ وان بدانینن ژبه‌ركو د ڤه‌گوهاستنێن زڤستانی دا ئینانا یاریزانێن باش گه‌له‌ك ب زه‌حمه‌ته و یانه‌یێن ئێراقی ب زه‌حمه‌ت ده‌ست به‌رداری یاریزانێن خوه‌بن.
