زاخۆ دێ بزاڤێن پاراستنا سه‌رێ لیستێ كه‌ت و هه‌ولێر به‌رانبه‌ر نه‌جه‌فیان دێ شه‌ڕێ سه‌ركه‌ڤتنێ كه‌ت
عەلی حاجی:
چاڤه‌ڕێ دهێته كرن ئه‌ڤرۆ سێ یاریێن دی ژ هه‌ڤڕكیێن گه‌ڕا 21ێ یا خولا ستێرێن ئیراقێ یا فوتبۆلێ بهێته كرن، یانه‌یێن زاخۆ و هه‌ولێر دێ به‌رانبه‌ر ته‌له‌به و نه‌جه‌ف د یاریێن ئاگرین دانه، ئه‌لقاسم دێ بیته مێڤانا مینا.
ل یاریگه‌ها خوه ل ده‌مژمێر7:30 شه‌ڤ جه‌ماوه‌رێ یانه‌یا زاخۆ ب ژڤانن بۆ پشته‌ڤانییا كوڕێن خابووری دیارییه‌كا بهێز و ئاگرین دا ده‌مێ مێڤاندارییا یانه‌یا ته‌له‌به یا به‌غدایی دكه‌ن، زاخۆ ل سه‌رێ لیستا خولێ دهێت ب كۆمكرنا 39 خالان ژ 11سه‌ركه‌فتن و شه‌ش وه‌كهه‌ڤییان، یانه‌یا مێڤان 34 خال هه‌نه رێزا شه‌شێ دهێت، بزاڤێن یانه‌یا كوردستانی سه‌ركه‌فتنه ژبۆ پاراستنا سه‌رێ لیستێ هه‌كه خوه ده‌مكی ژی بیت.
لدور دووماهی به‌رهه‌ڤیێن تیما زاخۆ بۆ ڤێ یاریێ هشیار شەهباز سكرتێرێ یانه‌یێ بۆ رۆژنامەیا ئەڤرۆ دیار کر یارییەکا گرنگە بەرامبەر تیمەکا هەڤرکه دگەل مە ژبەر هندێ پشتی یاریا دگه‌ل هەولێرێ ل حه‌فتییا بۆری هەر ئێکسەر مە دەست ب بەرهەڤیان بۆ دیدارا تەلەبە کر، ئەڤێ یاریێ حسابه‌تێن خوه هه‌نه بۆ رێزبه‌ندیێن سه‌رێ لیستێ و پێشڤه‌چوونێ ل سه‌ر ئاستێ ئیراقێ هه‌موو چاڤه‌ڕێ نه دێ بۆ مە گەلەکا گرنگ بیت ژبەرکو سەرکەڤتنا ل سەر تەلەبە دێ سەرێ لیستێ پارێزین و دێ هەڤرکەکا دیتر ژی ژ مە دویتر کەڤیت، له‌وما دێ یا ب زەحمەت بیت لێ ئەم دێ بۆ ئارمانجا سەرکەڤتنێ یاریێ کەین ژبەرکو د نوکە دا مە تیمەکا رێکوپێک و باش هەیە و دشێت هەڤرکیێ بکەت.
ژلایێ خوە سەمیر زاخۆیی رێڤەبەرێ تیمێ گۆت: ئەم ب هەموو ڕەنگان ئامادەنە بۆ ڤێ یاریێ و هەمی یاریزانان ب شێوەیەکێ باش بۆ ڤێ یاریێ خوە بەرهەڤ کریە و ب چ ڕەنگێ هەبیت دێ ڤێت سەرکەڤتنێ تومار بکەین ل سەر تەلەبە ،تیما تەلەبە ژ تیمێن ب ساناهی نینە د ڤی وەرزی دا و ژ تیمێن هەڤرکە ژی لەوما ئەو ژی دێ هەمی هەولان دەت باشتریژ ئاست پێشکێش بکەت،د ڤێ یاریێ دا مە پێدڤییەکا مەزن ب جەماوەرێ خوە هەیە و پشتەڤانیەکا باش ل تیمێ و یاریزانان بکەت و نابیت یاریێن د یاریگەها مە دا خالان ژ دەست بدەین
ژلایه‌كێ دووڤه یانه‌یا هه‌ولێر ل ده‌مژمێر پێنجێ ئێڤاری بیته مێڤانا یانه‌یا نه‌جه‌ف د یارییه‌كا دی یا بزه‌حمه‌ت بوو یانه‌یه‌كا كوردستانی، هه‌ولێر خودانا 29 خالانه ل رێزا نه‌هێ دهێت ژ هه‌شت سه‌ركه‌فتن و پێنج وه‌كهه‌ڤییان.
سوبه‌هی سێ یاریێن مایی دێ بڤی شێوه‌یی هێنه كرن، نه‌فت میسان- ئه‌لكه‌رمه، جه‌وییه- حدود، زه‌ورا- كه‌ربه‌لا، بۆ زانین یاریێن دهۆك دگه‌ل شورته هاته پاشئێخستن ژبه‌ر پشكدارییا هه‌ردو تیما د كۆپا كه‌نداڤی و ئاسیایی دا، دیسان یارییا دیالا و نه‌ورۆز ژی هاته پاشئێخستن.
به‌ری ب دووماهی هاتنا هه‌ڤڕكیێن گه‌ڕا هه‌لوه‌ستێ رێزبه‌ندیێ بڤی شێوه‌یه
1- زاخۆ 39 خال
2- شورته 38 خال ژ 19 یارییان.
3- زه‌ورا 37 خال.
4- دهۆك 34 خال ژ 19 یارییان.
5- ته‌له‌به 34 خال ژ 19 یارییان.
6- جه‌وییه 34 خال.
7- ئه‌لقاسم 31 خال.
8- نه‌فت میسان 29 خال.
9- هه‌ولێر 29 خال.
10- نه‌فت 28 خال.
11- ئه‌لكه‌رمه 27 خال.
12- نه‌ورۆز 27 خال.
13- نه‌جه‌ف 26 خال.
14- ئه‌لكه‌رخ 25 خال.
15- كاره‌با 23 خال.
16- مینا 20 خال.
17- نه‌فت ئه‌لبه‌سرا 20 خال.
18- كه‌ربه‌لا 15 خال.
19- حدود 13 خال.
20- دیالا 10 خال.
