زاخۆ د تاقیكرنه‌كا ب هێز دا هه‌مبه‌ری خودانا رێزا دویێ
ئه‌ڤرۆ، قه‌یس وه‌یس
دهێته چاڤه‌ڕێ كرن ئه‌ڤرۆ شه‌ش یاریێن ماین ژ چارچووڤێ هه‌ڤڕكیێن گه‌را هه‌شتێ یا قۆناغا ئێكێ بۆ یانه‌یێن پلا نایابا ئیراقێ یا ته‌پا پێی ل یاریگه‌هێن جودا هێنه كرن و هه‌رسێ یانه‌یێن كوردستانێ یاریێن گرنگ هه‌نه.
ل باژێرێ به‌غدا تیما یانا زاخۆ د تاقیكرنه‌كا ب هێز دا دێ بیته مێڤانا یانا كاره‌با ل یاریگه‌ها ئه‌لمه‌دینه ده‌مژمێر دو یێ پشتی نیڤرۆ هێته كرن، كورێ، خابۆری ب ئه‌نجامێن لاواز و نه ئاستێ نه چاڤه‌ڕێ كری پێنچ خالان رێزا 17ێ دهێت ژ سه‌ركه‌فتنه‌ك، دو وه‌كهه‌ڤی و چار خوساره‌تی ئانكو سه‌رجه‌مێ 24 خالان ب تنێ پێنچ كۆمكرینه، بوویه جهێ دلگرانیا كارگێریا یانێ و جه‌ماوه‌رێ وه‌رزشی یێ یانا زاخۆ، داخویانیێن به‌رپرسێن زاخۆ هوسا دیاركریه كود بیت پشتی ب دووماهی هاتنا قۆناغا ئێكێ دێ گوهۆڕینێن باش هه‌بن ژبۆ چاره‌سه‌ركرنا ئاریشه‌یێن تیما خوه، ژلایێ خوه‌ڤه خودانێن ئه‌ردی یانا كاره‌با د باشترین ره‌وش دایه ئه‌وا ب 14 خالان رێزا دویێ ل سه‌ر لیستا خولێ دهێت، له‌وما ئه‌ڤ یاریه بۆ ئیدارا سه‌ربه‌خوه‌یا زاخۆ ب سانه‌هی نابیت و دێ بیته تاقیكرنه‌كا ب هێز لێ راهێنه‌رێ وان حه‌یده‌ر عه‌بدولئه‌میر رژده ب ئه‌نجامه‌كێ باش زاخۆ ژ به‌غدا ڤه‌گه‌ڕینیت.
ژلایێ خوه‌ڤه یانا هه‌ولێر دێ ل یاریگه‌ها خوه مێڤانداریا یانا نه‌فت یا به‌غدایی كه‌ت، تیما پایته‌ختێ كوردستانێ دێ بزاڤێن سه‌ركه‌فتنێ ل سه‌ر پایته‌ختێ ئیراقێ كه‌ت و خالێن خوه ژ هه‌شت خالان ب كه‌ته 11 خالان ئه‌وا نوكه ل رێزا 15ێ دهێت ب زاخا سه‌ركه‌فتنا بۆری به‌رده‌وامبیت، تیما نه‌فت تنێ سێ خال هه‌نه و رێزا 18ێ دهێت، ژلایه‌كێ دووڤه تیما نه‌وروز ئه‌وا به‌ری ده‌ستپێكرنا یاریێن ڤێ گه‌ڕێ ب نه‌ه خالان رێزا 13ێ دهێت دێ یاریه‌كا گرنگ هه‌مبه‌ر خودانێن ئه‌ردی تیما كه‌ربه‌لا بیت خودانا رێزا 16 ب هه‌شت خالان.
ژ یاریێن دی یێن ئه‌ڤرۆ، جه‌ویه و شورته كۆپیتكا یاریێن ڤێ گه‌ڕێ دا، زه‌ورا- نه‌فت وه‌سه‌ت- نه‌فت میسان- سیناعه
