زاخۆ سەرێ لیستێ گرت
عەلی حاجی:
پشتی سەرکەڤتنا تیما فوتبۆلا یانه‌یا زاخۆ ل سەر حدود ب سێ گولان بەرامبەر گولەکێ ب شێوەیەکێ دەمکی پێشڤه هاته سەرێ لیستا خولا ستێرێن ئیراقێ ب كۆمكرنا 35 خالان و مفا ژخوساره‌تییا زه‌ورا خودانا سه‌رێ لیستێ و پاشئێخستنا یاریێن شورته و ته‌له‌به وه‌رگرت.
لدۆر سەرکەڤتنا زاخۆ حەمید ئیسماعیل سەرپەرشتێ تیما زاخۆ بۆ رۆژنامەیا ئەڤرۆ دیار کر سەرکەڤتنا وان ل سەر تیما حدود ئێک ژ گرنگترین سەرکەڤتنا بوو ژبەرکو تیما مە د نوکە دا دناڤ کەشەکێ ئارام دا دەرباز دبیت و روحیەتا هەڤرکیێ ژی سەر ل ناسناڤێ ئەڤ سالە باشتر کر و نابیت د ڤان یاریان دا ب چو رەنگان ئەم خالانژ دەست بدەین هەر چەندە یاریێن ب ڤی ڕەنگی د زەحمەتن ژی،د نوکە دا تیما مە دشێت زێدەتر ژ شێوازەکێ یاریێ بکەت نەخاسمە پشتی هاتنا یاریزانێن نوو دناڤ تیما مە دا،کوالێتیا یاریزانێن مە گەلەک باشە و دشێن هەر دەمەکێ جیاوازیێ دروست بکەن و ئەڤە ژی ئەوە یا مە بڤێت چونکی کارگێریا یانەیێ کار بۆ وێ چەندێ کربوو.
ژلایێ خوە یاریزان رەمەزان سەدیقی گۆت: یاریا بەرامبەر حدود ژ یاریێن ب زەحمەت بوو لێ ب روحیەتا سەرکەڤتنێ چوو بووینه د یاریێ دا، ئەوا مە ڤیایی شیا ب دەستڤە بینن، دڤێت ئێدی ئەم ل سەر ڤێ ڕێیا دروست بەردەوام بین ژبەرکو ئه‌ڤچه‌نده دێ مه به‌رڤ هەڤرکیێ ل سەر ناسناڤی ببەت،خول یا درێژە و دڤێت هەناسەیەکا درێژ هەبیت بۆ هەمی یاریان، یاریێن ب زەحمەت ل پێشیا مە ماینە لێ ئەم ئاشقێن یاریێن ب زەحمەتین و ئەو یارییە هێزەکا دیتر دەتە مە.
