زاخۆ كەمپا خوە ب دووماهی ئینا و هەولێر دێ ل دهۆكێ یارییان كەت
ل دووڤ پلان و بەرنامەیێن كادرێن ڕاهێنانێ بڕیارە دڤێ حەفتیێ دا هەموو یانەیێن وەرزشی بەرنامەیێن خوە یێن ڕاهێنانێ و كەمپێن دەرڤە و نافخوە ب گوهۆڕن بۆ دانانا پلانێن یاریێ ژبۆ باشترین بەرهەڤی بۆ وەرزێ نوو یا خولا ستێرێن ئیراقێ یا فوتبۆلێ 2025-2026 ئەوا دهێتە چاڤەڕێ كرن هەڤڕكیێن وێ ل 13ێ ڤێ مەهێ ب پشكدارییا 20 یانەیان ژ وانا چار یانەیێن كوردستانی نە.
دهۆك و زاخۆ چاڤەڕێ ڕاكرنا سزایانە
دهێتە پێشبینیكرن ئەڤرۆ هەتا سوبەهی فدراسیۆنا فوتبۆلا ئیراقێ بڕیارا دووماهیێ ل سەر ڕاكرنا سزایان ل سەر هەردو یانەیێن دهۆك و زاخۆ بدەت ئەوا پشتی یارییا كۆپا ئیراقێ دەرئەنجامێ روودانێن پشتی یاریێ ل یاریگەها شەعب هاتییە پێش، ل دووڤ ژێدەرێن نێزیك ژ فدراسیۆنا فوتبۆلا ئیراقێ كو شاندەكێ لژنەیا سزایان و دێسپلینێ هاتبوونە پارێزگەها دهۆكێ و دگەل سەرۆكێ هەردو یانەیێن دهۆك و زاخۆ كۆمبوون ژبۆ وەرگرتنا سۆزنامەیێن جودا كو كۆنترۆلا یاریگەهێ و جەماوەری بهێتە كرن، ئەڤ لژنە ڕاپۆرتا خوە پێشكێشی فدراسیۆنێ كرییە و پێشبینی دهێتە كرن ئەڤرۆ هەتا سوبەهی بڕیارەك بهێتە دەركرن.
زاخۆ كەمپێ خوە ب دوووماهی ئینا و ڕاهێنەر ڕازییە
پشتی بۆ ماوەیێ حەفتییەكێ ژ كەمپێ خوە یێ ڕاهێنانێ ل ئستەنبۆلا وەلاتێ توركیا شاندێ تیما یانەیا زاخۆ ڤەگەڕیا باژێرێ خوە و بڕیارە ئەڤرۆ دەست ب ڕاهێنانان بكەت، ل دووڤ زانیارییان ڕاهێنەرێ زاخۆ یێ قەتەری ویسام ڕزق ژ كەمپێ ڕاهێنانێ ڕازییە و هیڤی خواست ئەو بشێن ئارمانجێن خوە و كارگێریێ بجهبینن باشترین ئاست و ئەنجامان بینن، بۆ زانین د وەرزێ ئەڤ سالە دا زاخۆ دێ پشكداری دو قارەمانیێن جودا بیت، خولا ستێرێن ئیراقێ و كۆپا كەنداڤی كو بڕیارە ل 30ێ ڤێ مەهێ ئێكەم یارییا خوە یا دەرڤە بەرانبەر خودانێن ئەردی یانەیا ئەلقادسیە یا كوێتی بن.
هەولێرێ یاریگەها دهۆكێ هەلبژارت
هەرچەندە پێشتر هاتبوو ڕاگەهاند تیما فوتبۆلا یانەیا هەولێر دێ یارییا خوە یا ئێكێ ژ خولی بەرانبەر نەجەف ل یاریگەها زاخۆ كەت، لێ ژبەر نووژەنكرنا یاریگەها زاخۆ ، یانەیا هەولێر نەچاربوو یاریگەها دهۆكێ ب هەلبژێریت ئەوا بڕیارە ل 15ێ ڤێ مەهێ هێتە كرن، یانەیا كەلا ومنارە قارەمانا ئیراقێ یا چار وەرزان ب سەرپەرشتییا ڕاهێنەر باسم قاسم پشت گەرمی ب پترییا یاریزانێن كوردستانی كرییە و گەشبینە پشكدارییەكا سەركەڤتی هەبیت.
خشتەیێ سێ یاریێن هەرچار یانەیێن كوردستانی
یاریێن گەڕا ئێكێ دێ بڤی شێوەیی بن.
رۆژا شەمبی 13- 9- 2025
تەلەبە- زاخۆ، یاریگەها ئەلمەدینە ل دەمژمێر 8:30 شەڤ.
نەورۆز- كارەبا، یاریگەها نەورۆز ل دەمژمێر 8:30 شەڤ.
رۆژا ئێكشەمبی 14- 9- 2025.
دهۆك- ئەلگەرمە، یاریگەها دهۆك، ل دەمژمێر 8:30 شەڤ.
رۆژا دوشەمبی 15- 9- 2025.
هەولێر- نەجەف، یاریگەها یانەیا دهۆك، دەمژمێر 8:30 شەڤ.
یاریێن گەڕا دویێ
19-9-2025
زاخۆ- جەوییە، یاریگەها زاخۆ دەمژمێر 8:30 شەڤ.
ل 20-9- 2025
نەورۆز- نەفت میسان، یاریگەها نەورۆز دەمژمێر شەشی ئێڤاری.
مینا- هەولێر، یاریگەها ئەلمەدینە، دەمژمێر 8:30 شەڤ.
ل 21-9- 2025
شورتە- دهۆك یاریگەها شەعب، ل دەمژمێر شەشێ ئێڤاری,
یاریێن گەڕا سێیێ 25-9-2025
زاخۆ- دیالا یاریگەها زاخۆ، ل دەمژمێر شەشێ ئێڤاری
شورتە- نەورۆز، یاریگەها شەعب ل دەمژمێر8:30 شەڤ.
ل 27-9- 2025
كارەبا- هەولێر، یاریگەها زەورا، دەمژمێر شەشێ ئێڤاری
دهۆك- كەرخ، یاریگەها دهۆكێ ل دەمژمێر 8:30 شەڤ.
