زاخۆ وەکھەڤیا ١٢ێ د خولێ دا تۆمارکر
ئەڤرۆ، عەلی حاجی
تیما تەپاپیێ یا یانا زاخۆ نەشیا سەرکەفتنا خوە ل گەل مێڤاندارا خوە یانا کەرخ یا بەغدایی پارێزیت پشتی ب گۆلەکێ وەکھەڤبووین، د یاریا واندا ئەوا دوھی ژ چوارچووڤێ ھەڤڕکیێن گەڕا ئێکێ ژ قۆناغا دوێ یا خولا پلا نایابا عیراقێ یا تەپاپیێ ھاتیە ئەنجامدان کو دبیتە وەکھەڤیا ١٢ێ د خولێ دا و یا سیێ لدیڤ ئێک تۆمارکری.
گۆلا زاخۆ ژلایێ ھێرشبەرێ وێ زیاد ئەحمەد د خولەکا ٢١ێ دا تۆمارکر پشتی مفا ژ تەپەکا ڤەگەڕیایی یا ھەڤالێ خوە ئەحمەد زیرۆ وەربگریت ئەوا ب ئاسنێ گۆلێ کەفتی و شیایی ب سەری تۆماربکەت، گۆلا وەکھەڤیێ یا کەرخێ ژلایێ یاریزانێ وێ حەسەن عەبدولکەریم بوو، سەرباری بزاڤێن یاریزانێن زاخۆ بۆ تۆمارکرنا گۆلا دوێ لێ بیێ ئەنجامبوو و یاریی ب وەکھەڤی ب دووماھی ھات، ژ ئەنجامێن یاریێن دی دوھی، جەویە ١-چنە کارەبا، سەماوە چنە-چنە نەفت وەسەت، سیناعات چنە-چنە نەفت، بڤان ئەنجامان یانا جەویە ب ٤٤ خالان جھێ خوە ل سەرێ لیستێ پاراست ئەوا زەورا و شورتە ب ٣٦ خالا رێزێن دوێ و سیێ لدویڤ ئێک دھێن، زاخۆ ب ٣٠ خالان بەروەخت ل رێزا شەشێ و کەرخ ب ٢٣ خالان رێزا ١١ێ دھێت.
بۆ زانین ئەڤرۆ دەمژمێر ئێکێ پشتی نیڤرۆ یاریگەھا یانا دھۆک دێ مێڤانداریا یانا ھەولێر و ئەمانە بەغدا کەت ژ چارچووڤێ ھەمان گەڕ پشتی لسەر داخوازا یانا ھەولێرێ کو یاریگەھا دھۆکێ ھەلبژارتی بۆ ئەنجامدانا دو یاریێن خوە ژبەرکو یاریگەھا فرانسۆ حەریری ل ھەولێرا پایتەخت لبن نیژەنکرنێ دایە، یانا ھەولێر خودانا ١٩ خالان رێز ١٥ێ دھێت و ئەمانەت بەغدا ب ٢٤ خالان رێزا نەھێ لسەر لیستا خولا عیراقێ دھێت، ھەروەسا ئەڤرۆ شورتە و زەورا کۆپیتکا یاریێن ڤێ گەڕێ دێ ھەمبەری ئێکبن.
