زاخۆ و ئاكرێ دێ یانەیێن هەولێرا پایتەخت مێڤانكەت
قەیس وەیس:
چاڤەڕێ دهێتە كرن ئەڤرۆ دەست ب گەڕا حەفتێ ژ هەڤڕكیێن قۆناغا ئێكێ یا خولا فوتبۆلا كوردستانێ بۆ یانەیێن پلا نایاب ب ئەنجامدانا سێ یارییان بهێنە كرن، هەردو یانەیێن پارێزگەهێ ئاكرێ و زاخۆ دێ مێڤاندارییا یانەیێن هەولێرا پایتەخت، یارییا سێیێ دێ دناڤبەرا یانەیا ڕزگاری و پێشەسازی دا بیت ئەوێن هەردو یانە بۆ جارا ئێكێ هاتینە پلا نایابێ ئەوا بڕیارە هەموو یاری ل دەمژمێر دو یێ پشتی نیڤرۆ بهێنە كرن.
ل یاریگەها خوە و د ناڤ پشتەڤانێن خوە دا تیما یانەیا زاخۆ دێ مێڤاندارییا یانەیا برایەتی كەت، كوڕێن خابووری ئەوێن ل حەفتییا بۆری ژ هەولێرا پایتەخت و باژێرێ پیرمام ب خالەكێ ڤەگەڕیان پشتی دگەل خودانێن ئەردی پێشمەرگەیا هەولێر ب گۆلەكێ وەكهەڤ بووی، دێ هەموو بزاڤان كەت د ڤێ یاریێ دا چ خالان ژ دەست نەدەت ئەوا نوكە 11 خال كومكرین ل رێزا چارێ دهێت، مێڤانا وێ برایەتی خودانا حەفت خالانە ل رێزا 10ێ دهێت.
ژلایێ خوەڤە یانەیا ئاكرێ ژی دناڤ ئەرد و جەماوەرێ خوە دا مێڤاندارییا یانەیا هندرین كەت، كوڕێن پایتەختێ نەورۆزێ د چار یارییان دا سێ سەركەفتن ئیناینە و وەكهەڤییەك، د گەڕا شەشێ دا ل هەولێرا پایتەخت ب سەركەفتن ل سەر یانەیا برایەتی ب گۆلەكێ بێ بەرانبەر ئینابوو و پێشڤە هاتییە ڕێزا شەشێ ب نەهـ خالان، د بەرانبەر دا تیما هندرین بتنێ دو خال هەنە ل رێزا 13ێ دهێت.
ژ یاریێن دی یێن سوبەهی بهێنە كرن، شەقلاوە- چوارقۆرنە، شێروانە- پێشمەرگەیا هەولێر، دەربەندیخان- هەولێر، سەیدسادق- سیروانی نوو، یانەیا ڕانیە د ڤێ حەفتیێ دا دێ یا چاڤەڕێ بیت.
