زاخۆ و ئاكرێ چاڤ ل سه‌ركه‌فتنێ یە و لبنانیه‌ك ئێكه‌م دادڤانێ پیشه‌كاره
قەیس وەیس:
چاڤه‌ڕێ دهێته كرن ئه‌ڤرۆ سێ یاریێن مایی ژ هه‌ڤڕكیێن گه‌ڕا دویێ یا خولا پلا نایابا كوردستانێ یا فوتبۆلێ بهێنه ئه‌نجامدان، یانه‌یا چوارقۆرنه دێ یا چاڤه‌ڕێ كری بیت دڤێ گه‌ڕێ دا و بۆ جارا ئێكێ یه د دیرۆكا خولێ دا دادڤانه‌كێ لوبنانی پشكدار بیت ئه‌وا بڕیاره هه‌موو یاری ل ده‌مژمێر دو پشتی نیڤرۆ بهێنه كرن.
زاخۆ دێ بزاڤێن ئێكه‌م سێ خال كه‌ت
تیما یانه‌یا زاخۆ دێ ل یاریگه‌ها سێمێلێ مێڤاندارییا یانه‌یا ڕانیه كه‌ت ب هیڤیێن ئێكه‌م سه‌ركه‌فتن د خولێ دا، د یارییا ئێكێ دا تیما زاخۆ خوساره‌تیه‌كا نه چاڤه‌ڕێ كری به‌رانبه‌ر یانه‌یا ڕزگاری دا بوو ب سێ گۆلان به‌رانبه‌ر گۆله‌كێ، بۆ ڤێ یاریێ كوڕێن خابۆری ژلایێ جه‌ماوه‌رێ خوه ڤه داخوازیكرینه ئێكه‌م سه‌ركه‌فتن ب ده‌ستڤه بینن.
ئاكرێ ڕژده بۆ سه‌ركه‌فتنا دویێ
ژلایێ خوه‌ڤه تیما یانه‌یا ئاكرێ قاره‌مانا وه‌رزێ بۆری ڕژده به‌رده‌وامیێ بده‌ته سه‌ركه‌فتنان ده‌مێ ل یاریگه‌ها شه‌هید فرانسۆ حه‌ریری یا دویێ دبیته مێڤانا یانه‌یا هه‌ولێرێ، د یارییا بۆری دا ئاكرێ ب چار گۆلان به‌رانبه‌ر سێ گۆلان سه‌ركه‌فتنه‌كا بزه‌حمه‌ت ل سه‌ر چوارقۆرنه ئینابوو، دبه‌رانبه‌ردا هه‌ولێر دگه‌ل سه‌یدسادق ب گۆله‌كێ وه‌كهه‌ڤبوو، ژلایه‌كێ دووڤه سه‌یدسادق دێ بیته مێڤانا پێشمه‌رگه‌یا هه‌ولێرێ.
دادڤانه‌كێ بیانی دێ یاریێن خولێ بڕێڤه‌به‌ت.
فدراسیۆنا فوتبۆلا كوردستانێ بڕیار دا دادڤانێ لوبنانی و خودانێ پله‌یا نوخبه یا ئاسیایی محه‌مه‌د عیسا بۆ یاریێن وه‌رزێ نوو یا خولا پلا نایابا ببته دادڤانێ ئێكێ ئه‌وێ ژلایێ فدراسیۆنا ئیراقێ ژی هاتییه داخوازكرن یارییان بڕێڤه‌ببه‌ت، بۆ زانین دادڤانێ لوبنانی د نوكه دا ل هه‌ولێرا پیته‌خت ئاكنجی بوویه ئه‌وێ ژبه‌ر كاودانێن نه ئارام ل وه‌لاتێ لوبنانێ هاتییه كوردستانێ.
